Si do Aposela ki kera ilidaki 7 - Ṉa Alaofua Falu 1923 1949

¹ Ma aofia ni foa e sorea, Si do mamana ki neri?

² Ma nia sorea, Doora kera ma maka kera, muki fafuroṉo fasi. Ṉa God ana inotoa e fula fatai isana maka kulu ba inao na tha Aberahamo, si maṉa ne to i Mesopotemia, si maṉa ne ai si ni u i Harana,

³ Ma ka soree isana, Oki lae kau faisia fanua oe, ma ina lamu kera, ma oki lae mai uri fanua na nau kwai fatai nia isamu.

⁴ Sui e lae kau faisia fanua toa i Kaladea, ka to i Harana: ma toto maka nia e mae naa, tha God e idu nia mai faisia fanua eri uria fanua nai, si kula na mulu ni iei si maṉa eri:

⁵ Me ai si falea ta si kula ifana i fanua eri, e ai ta kasi gano mena na nia kai alua aaena i fafona: ma nia alaṉai toto kai falea fanua eri ifana, fanua nia ni bonaa, ma kwalafana iburiana, si maṉa ne ai si welaa u neri.

⁶ Ma si do na tha God e sorea neri, kwalafa nia toto keki to ni laea ata fanua eeta, keki suuwanida keka tona ra, keki fare taa anida, sulia fai taleṉee fa ṉali.

⁷ Ma kulee toa eri na keki tona ra ifada toto nau ṉa Wane ni kotu kwai ṉata suli kera (ṉata lana tha God neri): ma iburiana keki lae kau, keki ra ifaku kunei.

⁸ Ma nia falea alaofua eri ana kwai kakali la ifana: ma sui tha Aberahamo e tharea tha Aisaka, ma ka kwai kali ani nia ana kwaula fa boṉi; ma tha Aisaka e tharea tha Jekofo, ma tha Jekofo e tharea tee akwalee maka ma ro maka ba inao ki.

⁹ Ma maka ba ki, uria na kera gwaudila uria inotoa tha Josefa, kera usi ani nia ka lae uri Ijifita: ma tha God e to bi nia,

¹⁰ Me faamaruki nia faisia taa la eki sui bana ne toto ania, ma ka falea si do kera ala fafia ifana ma liotooa inaofatha Fero ne kiṉa i Ijifita; ma wane eri e alu nia kai inoto fafia Ijifita ma toaa nia sui boo.

¹¹ Sui unii thaofa e liu i fanua i Ijifita ni sui bana bia i Kenana, ma unii fualaṉa: ma maka kulu ba inao ki kesi fulatoona ta si do ni ani lana.

¹² Ma si maṉa na tha Jekofo e roṉoa aialo ni Ijifita, e arasia kau maka kulu ki asi maṉa totonao na ba.

¹³ Ma ana ruana fa fula la tha Josefa e fatai nia isana doorana kera keka thaitoomana; ma kulee toa tha Josefa e to fatai isatha Fero.

¹⁴ Ma tha Josefa e kwaiarasi, ka ailia mai maka nia tha Jekofo isana, ma ina lana kera ki sui bana, fiu akwala ma lima imole.

¹⁵ Mania tha Jekofo e sifo uri Ijifita; ma ka mae, nia, bia maka kulu ba inao ki;

¹⁶ Ma kera fanasia seena wane eki, keka ṉalia uri Sikema, keka alua i lala kwaiṉeia eri na tha Aberahamo e usia ana silifa ana kaluwane tha Hamo ki i Sikema na ba.

¹⁷ Sui lalae si maṉa ana alaṉaia ba, na tha God e othi ania atha Aberahamo, e kwaikaraṉi naa, toa eri e baita ma ka oro alaa i Ijifita,

¹⁸ Ka fula asi kada na tee kiṉa eeta lau ka tae mai, ne ai si thaitoomana tha Josefa.

¹⁹ Wane eri e abula ana liotooa taa uria toa kulu ki, ma ka fare taa ana maka kulu nai nao ki, ka suuwanida keka naṉa ania wela aabu kera ki i maa fasi e ai kesi maruki.

²⁰ Si maṉa na tha Mosesi e futa mai neri, ma riki lana ka lea asia, ma kera thare nia i maafera maka nia sulia ulu madami:

²¹ Sui lalae kera naṉa ani nia, thari tha Fero e gwea, ma ka thare nia kai kaluwane ania.

²² Ma kera to’oa si do ki sui bana ana liotooa toa i Ijifita ki isatha Mosesi; ma nia e sukwai ana ṉata lana ma abula lana.

²³ Sui si maṉa na fai tafulu fa ṉali e sui buriana na kera thare nia, ruruuna e thathamii lae ka makelea doorana kera na kwalafa tha Isirela.

²⁴ Me rikia tee wane iada na kera abula taa uri nia, ka firu faisia, ka duu ifana wane eri na kera malataa iana, ka thauṉia wane i Ijifita:

²⁵ Manatana sa doorana kera kera thaitoomana na tha God kai faamarukida ana abana; me ai kesi thaitoomana maalutana si do eri.

²⁶ Ma afa boṉi iburiana nia ka fatai nia isada si maṉa na keka firu, e thathamia sa kai aluda keka kwaimani lau, ka una eri, Thaa wane ae, kamulua tee baree wai doorana; uria ta na muka abula taa kwailiu uri kamulua?

²⁷ Ma wane eri ne abula taa uria wane nia ka usutania, ka una eri, Ni tei ne alu oe oko wane gwauwai ma wane ni kotu ani kamilia?

²⁸ O thathamii thauṉi nau, ’uria lau boo o thauṉia wane ba i Ijifita i roo?

²⁹ Ma tha Mosesi e roṉoa si baea eri, ka thaka, ka to ni laea i la fanua i Midiana, ma ka tharea ro kaluwane ki i fanua eri.

³⁰ Ma buriana na fai tafulu fa ṉali e sui, tee angel tha Lord ka fula fatai isana ana fanua kwasi i gwa tolo i Sainai, i la era ne lamalama ana kali fa ’ai faekwa.

³¹ Ma tha Mosesi e rikia, ka kwele asi do na kera fatai nia: ma si maṉa ne idu karaṉi mai kai lio, ṉata lana tha Lord ka fula mai,

³² Nau ṉa God maka oe nai nao ki, God tha Aberahamo, ma tha Aisaka, ma tha Jekofo. Ma tha Mosesi ka leleba, e ai si seeraa fasi kai lio.

³³ Sui tha Lord e soree isana, Oki lukea butu ena ki faisia aaemu: sulaania si gano abu no takwe i fafona neri.

³⁴ Nau ku rikia boo taa la na toa nau ki kera to ania i Ijifita, ma nau ku roṉoa kwai lada, ma ku sifo mai fasi kwai faamarukida: mania oki lae mai, kwai arasi oe uri Ijifita.

³⁵ Mosesi eri na kera lalakwatania, ba kera una eri, Ni tei ne alu oe oko wane gwauwai ma wane ni kotu? wane eri boo tha God e arasia mai, wane gwauwai ma wane ana tae la faisi kera, kai ra bia abana ṉa angel ne fula fatai isana ana ’ai ba.

³⁶ Wane eri e toleda kau, buriana ne ilia do ni kwele la ania ki ma bala si do ki i Ijifita, ma i la amali Memenaa, ma i la fanua kwasi sulia fai tafulu fa ṉali.

³⁷ Mosesi eri boo neri, ne soree isaua kwalafa tha Isirela, Tee porofeta tha Lord na God kamulua kai falea mai ifamulua, wane ana dooramulua kera, ’uria lau boo ni nau; wane eri muki roṉoa.

³⁸ Nia neri ne to bia figua eri la fanua kwasi bia ṉa angel ne ṉata isana i gwa tolo i Sainai na ba, me to bia maka kulu nai nao ki: ne ṉalia si ṉata maruki eki fasi kai falea ifakulua:

³⁹ Wane na maka kulu nai nao ki kera lalakwee ade sulia, kera usutai nia faisida, ma ruruude akele buri uri Ijifita,

⁴⁰ Keka una eri isatha Erona, Oki thauwai nia god ki ifamilia na keki tatha inaofamilia: sulaania wane eri tha Mosesi, ne talai kamilia faisia fanua i Ijifita, mili dora asi do ne uri nia.

⁴¹ Ma kera thauwai nia tee kalee buloka afa boṉi eki, keka ṉalia mai ta do ni foa la ifana god eeta eri, keka seethathala uria si do kera thauwai nia ana abada.

⁴² Sui tha God e akele, ka lukatai kera keka ra ifana do sinasina oro lo i thalo ki; alafana na kera keda na ba i la buka porofeta ki, Ni nau na ba na mulu falea do ana fai ae ifaku na kera thauṉidaki ma do ni foa la ki Sulia fai tafulu fa ṉali la fanua kwasi, kamulua kwalafa tha Isirela?

⁴³ Ma mulu ṉalia biui maku tha Moloka, Ma fa bubulu god kamulua eri tha Refana, Nunui do eki na mulu thauwai nia uria faabaita lada la: Ma ni nau kwai adea muki luu uria fanua tau ka tatha ani Babilone.

⁴⁴ Maka kulu nai nao ki ada ṉa biui maku ana faamamane la i la fanua kwasi, alafana si do nia e alua, ne soree isatha Mosesi kai thauwai nia talafana ṉa do totonao ne rikia naa.

⁴⁵ Biui maku eri na maka kulu nai buri ana maka ba inao ki, kera ṉalia mai bia tha Josua si maṉa na keka fula ana fanua Jenetaele ba, na tha God e taridaki faisia maana maka kulu eki, ka fula afa boṉi tha Defeta ki;

⁴⁶ Na tha God e riki nia ka lea, wane ne gani sa kai rikia ta kula ni to la ifana God tha Jekofo.

⁴⁷ Ma tha Solomona ana e kasia tee biu ifana.

⁴⁸ Una ena mena Nia ne Inoto ka tatha e ai si to ana biu na kera thauwanidaki ana abee imole; ’uria si do ṉa porofeta e sorea na ba,

⁴⁹ Ṉa thalo lo na ṉa do ni ono la ana inotoa nau, Ma ṉa fanua nei iano na ṉa do ni alu lana aaeku i fafona: Biu ufita muki kasia ifaku? tha Lord e sorea: Mado si kula ta na nau kwai mamalo iei?

⁵⁰ Ta na sa ku thauwai nia si do eki sui boo ana abaku, mado?

⁵¹ Kamulua toa manatamulua ka nau ni baita ma kesi kwai kakalia ruruumulua ma aliṉamulua, mulu firu ṉado bia tha Spirit Abu: ade la na maka kamulua nai nao ki kera ililia, kamulua muki ilia.

⁵² Ni tei ana porofeta eki na maka kamulua ba ki kesi tona ilamatai nia? ma kera thauṉia wane eki na kera fatai nia totonao si do ki sulia fula lana ṉa Wane Kokoto; nia na mulu bii faaalamai nia ma mulu thauṉia;

⁵³ Kamulua na mulu ṉalia ṉa lo ana alu la na angel ki kera alua, ma musi ade sulia.

⁵⁴ Ma si maṉa na kera roṉoa si do eki, ka fi i ruruuda ’uria sa kera furia, ma keka ṉiṉita ere uri nia.

⁵⁵ Ma ni nia, na kera faafuṉu nia atha Spirit Abu, ka lio tete uri thalo lo, ka rikia inotoa tha God, ma tha Jesus kai takwe ana aba aola tha God,

⁵⁶ Ma nia sorea, Rikia fasi, nau ku rikia kera ifinia thalo lo ki, ma Kaluwane imole kai takwe ana aba aola tha God.

⁵⁷ Sui kera ’ai faamau, keka guta aliṉada, keka lofoia ana tee si lio;

⁵⁸ Ma kera suia kau i thara faisia toaa susu eri, keka ufauna: ma wane eki na kera faamamanea si do kera thaitoomana suli nia kera alua tooni kera ki isana aaena tee wane bii baita, thatana tha Solo.

⁵⁹ Ma kera ufauna tha Sitifini, si maṉa ne ’ai thatana ṉa Lord, ma ka una eri, Lord Jesus, oki ṉalia spirit nau.

⁶⁰ Ma nia boururu iano, ka ’ai ana ’ai la baita, Lord, osi alaṉi kera ana abula taa la nai. Ma buriana ne ṉata una eri e sui, ka biṉa bonaa.