Si do Aposela ki kera ilidaki 5 - Ṉa Alaofua Falu 1923 1949

¹ Ma tee nonii wane thatana tha Ananiasi, bia kwaina na ni Safira, kero usi asi do na kero rikia,

² Ma ta bali ana malefo eri e alua mana ifana, ma kwaina e thaitoomana lau boo ade la eri, sui e ṉalia mai ta bali, ka alua isana aaena aposela ki.

³ Ma tha Pita ka sorea, Ananiasi, uria ta na tha Satan ka faafuṉua ruruumu oki lolea tha Spirit Abu, oko alua mai ta bali ana malefo no usia ana gano eri ifamu?

⁴ Si maṉa ne to u bana, ta na sa do oe i talaamu neri, mado? ma buriana no usi ania, osi inoto ania? Uria ta na oko manataia si do eri i ruruumu? imole e ai no lolea, tha God.

⁵ Ma tha Ananiasi e roṉoa si baea eri, ka asi nia iano ma ka nofi: ma mau la baita e toea toa eki sui bana na kera roṉoa.

⁶ Ma kala wane ki kera tae mai, keka afu nia, keka ṉalia i maa, keka kwaiṉei nia.

⁷ Ma fuliṉana ulu si kadee maṉa iburiana, kwaina, ne ai si thaitoomana bana si do na kera ilia, e kotho mai.

⁸ Ma tha Pita e luua, ka una eri, Oki faaroṉo nau mai sa mado e ai moro usi ana gano ba ana malefo eri. Ma nia sorea, Iu, ana malefo eri boo.

⁹ Sui tha Pita ka soree isana, Nifana ade lana ni kamaroa moro ṉata ofu na moka ilitoona Spirit tha Lord? rikia fasi, aaena toa na kera kwaiṉei nia kwaimu ni maa, ma keki ṉali oe kau.

¹⁰ Ma nia asi nia si maṉa eri u boo isana aaena, ka nofi: ma kala wane eki kera kotho mai, kera fulatoona ne mae naa, keka ṉalia i maa, keka kwaiṉei nia karaṉia kwaina.

¹¹ Ma mau la baita ka toea figua eri sui boo, ma toa ni sui bana na kera roṉoa si do eki.

¹² Ma ana abana aposela ki kera ilia bala si do oro ki ma do ni kwele la ania ki i maalutana toa eki; ma kera figu ana tee si lio i la taofa tha Solomona.

¹³ Sui ana toa na kesi lae u mai, e ai ta wane si seeraa fasi kai safuda: una ena mena, toa eki kera fare baita ani kera;

¹⁴ Ma toa na kera fitoona ṉa Lord keka oro alaa, toa ooro ka oro, wane ki ma kini ki lau boo;

¹⁵ Adedea keka ṉalia naa mataia ki uria sula tale ki, keka aluda keki teo i la thamataia ki ma do ni teo la ki, fasi, si maṉa nia tatha, boro sa nuna mena tha Pita kai nunufia ta imole iada.

¹⁶ Ma malului wane eki ana toaa susu na ni kakalia Jerusalema ki kera figu lau bomai, keka tolea mai mataia ki, ma toa spirit taa ki e thauṉida: ma kera faamarukida ka sui boo.

¹⁷ Sui aofia ni foa e tae mai, bia toa eki sui bana na kera to bi nia (toa na kera faamamanea kwaifamanatai lana Sadiusi ki neri), kera fuṉu ana uga la,

¹⁸ Ma keka aba aposela ki, keka aluda i la lokafu ne to maakwalia toa na kera abula taa ki.

¹⁹ Ma sui angel tha Lord e ifinia maana lokafu eri la rodo, ka toleda kau, ka sorea,

²⁰ Muki lae, muki takwe, muki ṉata i la biu baita tha God isana toa eki sulia si baea sui bana sulia Marukia eri.

²¹ Ma si maṉa na kera roṉoa, keka kotho i la biu eri si maṉa fanua e thafalii dani, keka kwaifamanatai. Sui aofia ni foa e lae mai, bia toa na kera to isana, ka ailia mai ofu la eri, ma figu la eri sui bana ana wane inoto kwalafa tha Isirela ki, ka kwaiarasi uri lokafu sa keka toleda mai.

²² Ma toa eki ana ili lana si do ki na kera lae e ai kesi fulatooda i la lokafu; ma kera oli, keka faaroṉo ania,

²³ Keka una eri, Lokafu eri mili fulatoona na kera fono lea ania ka ala, ma toa ni kwaisuusi la faisia kera takwe i maana olofolo ki: sui lalae mili ifi, misi rikia ta wane i lala.

²⁴ Mania si maṉa na aofia ni foa ma wane ne inoto ana biu baita tha God ma wane inoto ni foa ki kera roṉoa si baea eri, manatade nai rua anida ma asi do na kai fula mai buriana si do eri.

²⁵ Ma tee wane e lae mai, ka faaroṉoda, Rikia fasi, wane ba ki na mulu aluda i la lokafu kera ni la biu baita tha God, keki takwe, keki kwaifamanatai isana toa eki.

²⁶ Sui wane ne inoto ana biu eri bia toa eki ana ili lana si do ki kera lae, keka tole marabibi anida; uria na kera mau ana toa eki ada keka ufauda.

²⁷ Ma buriana na kera toleda mai, keka aluda keka takwe inaofana ofu la eri. Ma aofia ni foa e soetooda,

²⁸ Ka una eri, Kamilia misi ṉata fifi, misi lufi kamulua faisia kwaifamanatai la ana thata eri? ma rikia fasi, mulu faafuṉua i Jerusalema ana kwaifamanatai la kamulua, manatamulua sa muki alaṉi kamilia ana abuna wane eri.

²⁹ Sui tha Pita ma aposela eki kera luua, keka sorea, Tha God ana na miki ade sulia e ai si ei boo, imole ki e ai.

³⁰ Ṉa God maka kulu ba inao ki e tataea tha Jesus, Wane na mulu thauṉia, muka tarufai nia sulia rebee ’ai.

³¹ Ni nia tha God e faabaita ana aba aola nia, Wane Inoto ma Wane ni Kwaifaamaruki, fasi kai falea manata akele la ana Isirela, ma manata lube la ana abula taa la ki.

³² Ma ni kamilia toa ni faamamane lana si do mili thaitoomana sulia si do eki; ma tha Spirit Abu lau boo, na tha God e falea ana toa na kera ade suli nia.

³³ Si maṉa na kera roṉoa si do eri, ka fi i ruruuda ’uria sa kera furia, manatada sa keki thauṉia wane eki.

³⁴ Ma sui tee nonii wane e takwe ia ana ofu la eri, na Farisi, thatana tha Gamaliele, wane ni kwaifamanatai ana ṉa lo, na toa eki sui bana kera fare baita ani nia, ka sorea keka alua wane eki i maa ta kasi maṉa seseka.

³⁵ Ma nia soree isada, Kamulua wane Isirela ki, muki beta suli kamulua asi do na muki ilia sulia wane eki.

³⁶ Sulaania tha Thiudasi e tae mai dini na ba, ka alaṉi nia ana wane baita; ma wane oro, fuliṉana fai taleṉee wane ki, kera to ani nia: ma lalae kera thauṉia wane eri, toa eki sui bana na kera ade suli nia kera lae tataka, ma keka aana.

³⁷ Buriana wane eri tha Judasi, wane i Galili, e tae mai asi maṉa ana keda lana thatana imole ki na ba, ka tole garo ana tei toa keka lae iburiana: wane eri e sui lau boo; ma toa eki sui bana na kera ade suli nia kera foatata anida.

³⁸ Ma si maṉa eri ku soree isamulua, Muki to faisia wane nai ki, muki alamatanida keki to: sulaania mada sa si do eri na kera thathamii ilia mado si ra eri do imole ni bana, toto keki labatania:

³⁹ Ma mada sa do ita mai atha God, kamulua sa muka talaana labatai lana e ai; ada mado e ai keka fulatoomulua na muki firu bia tha God.

⁴⁰ Ma ni nia kera ala fafia ṉata lana: ma buriana na kera ailia mai aposela ki, ma kera kwaeda, keka ṉata fifi isada, keka lufida faisia ṉata la ana thatana tha Jesus, sui keka alamatanida keka lae.

⁴¹ Mania kera lae faisia ofu la eri ana seethathala la, uria na manatana tha God e thaitoomana na kera farana to la ana fare faekwa la uria Thatana.

⁴² Ma sulia boṉi, i la biu baita tha God ma i maafera kera ki, keka kwaifamanatai si sui ma keka ṉata sulia tha Jesus Christ.