Si do Aposela ki kera ilidaki 4 - Ṉa Alaofua Falu 1923 1949

¹ Ma si maṉa na keko ṉata isana toa eki, wane ni foa ki ma wane ne inoto ana biu baita tha God ma Sadiusi ki kera fula isada,

² Uria na kera liodila faamau sulaania keko kwaifamanatai isana toa eki, ma atha Jesus keko ṉata sulia tatae la faisia toa mae ki.

³ Ma kera rau ani keroa, keka suusida i la lokafu maakwalia ka dani: uria ne thaulafia naa.

⁴ Sui toa oro ana toa eki na kera roṉoa si baea eri keka fitoo; ma toa eri sui bana na kera fitoo naa fuliṉana lima tooni wane.

⁵ Ma lalae e dani, wane gwauwai kera ki, ma ulunao ki, ma wane ni kekeda ki,

⁶ Ma tha Anasi ṉa aofia ni foa, ma tha Kaiafasi, ma tha Jone, ma tha Alikisada, ma toa eki sui bana ana ina lana aofia ni foa, kera ofu mai ana tee si kula i Jerusalema.

⁷ Ma buriana na kera aludaroa keko takwe i maalutada, keka soetoodaroa, Sukwaia ta, mado thata ta, na moro ilia asi do nai?

⁸ Sui tha Pita, na kera faafuṉu nia atha Spirit Abu, ka soree isada, Kamulua toa gwauwai na mulu tatha inaona toa eki, ma ulunao Isirela ki,

⁹ Mada sa kera soekalitamarea itaraena uria maalutana si do lea eri na mere ilia ifana wane ne ai si sukwai, sulia ade la na mere adea fasi keka faamaruki nia;

¹⁰ Kamulua sui, ma toa Isirela ni sui bana, muki thaitoomana si kula eri, Ana thatana tha Jesus Christ na Wane i Nasaretha, na mulu fota fafi nia ana ’ai rarafolo, na tha God e tataea faisia toa mae ki, ani nia wane nai ka takwe kunei inaofamulua, ka maruki naa.

¹¹ Nia na fau ba na ni kamulua toa na mulu kasibiu mulu fare faekwa ania, na kera alua i gwauna lokosuua.

¹² Ma marukia e ai si ni ata wane lau: sulaania e ai lau ta thata si to ifara thalo, ana thata eki na kera falea ifana wela wane ki, na keki faamaruki kia e ai si ei boo ana thata eri.

¹³ Sui si maṉa na kera rikia seeraa la tha Pita ma tha Jone, ma kera thaitoomana ro wane eki kesi to’oa bada ta si do isadaroa ma kero dora ania maalutana do oro ki, wane inoto eki keka kwele; ma kera thaitoomana lea sulidaroa, na kero toto bia tha Jesus.

¹⁴ Ma uria na kera rikia wane eri na kera faamaruki nia kai takwe bi keroa, keka dora ania oli susuu la fafia si do eri.

¹⁵ Sui buriana na kera soree isadaroa sa keko lae faisia ofu la eri, kera ṉata i talaada,

¹⁶ Keka una eri, Si ta na kuki ilia ana ro wane eki? sulaania e to fatai isana toa nai Jerusalema ki sui bana, na kera ilia boo ana abana wane eki bala si do ne inoto; ma kuka dora ana tofe lana.

¹⁷ Ma fasi si do eri ka ai si lae tatha i maalutana toa eki, kuki faamaudaroa, fasi ita asi maṉa eri ka lae alaa kesi ṉata lau isata wane ana thata eri.

¹⁸ Ma kera ailida mai, keka ṉata fifi isadaroa fasi e ai dodoloa kesi ṉata mado kesi kwaifamanatai ana thatana tha Jesus.

¹⁹ Ma tha Pita ma tha Jone kero luuda, keko soree isada, Muki manatatoona, E kokoto inaofatha God meka roṉo kamulua ma mesi roṉoa tha God?

²⁰ Uria na mere dora ana to la faisia ṉata la sulia si do eki na mere rikia ma mere roṉoa.

²¹ Ma ni kera, buriana na kera ṉata lau uria faamau lada, keka alamatanidaroa keko lae, uria na kesi fulatoona ta si do fasi keki kwae keroa fafia, sulaania toa eki; uria na wane eki sui bana kera faabaita tha God fafia si do na kera ilia.

²² Sulaania fai tafulu fa ṉali ma ka sareṉa e sui ana wane eri, na kera ilia bala si do eri ani nia ana faamaruki lana.

²³ Ma kera lubedaroa naa, keko bii oli isana toa keroa ki, keko faaroṉo asi do eki sui bana na wane inoto ni foa ki ma ulunao ki kera soree isadaroa.

²⁴ Ma ni kera, si maṉa na kera roṉoa, keka ṉata lalaa uria tha God ana tee si lio, keka sorea, Lord, oe God no thauwai nia ṉa thalo ma fanua nei iano ma ṉa amali, ma si do ki sui bana nai kula eki:

²⁵ No sorea ana fokona wane ni ra oe tha Defeta, Uria ta na toa ana fanua eeta ki keki rakeiri kwasi, Ma kulee toa ki keki manataia si do ne ai si kwaiadomi ki?

²⁶ Kiṉa ana fanua nei iano ki kera thathaia firu la, Ma wane gwauwai ki kera ofu mai, Uria firu la bia tha Lord, ma bia Christ nia:

²⁷ Sulaania e mamana ana firu la bia Wela abu oe tha Jesus, no kiki nia ana gwai, tha Heroda bia tha Podiasi Paelate, bia Jenetaele ki ma kulee toa Isirela ki, kera ofu bomai,

²⁸ Fasi keka ilia si do eki sui bana no gwalua ana abamu ma manatamu totonao.

²⁹ Ma si maṉa eri, Lord, oki lio fasi uria ṉata lada uria faamau lamilia la: ma oki falea si kula eri ifana toa ni ra oe ki keki seeraa faamau ana ṉata la sulia bae lamu,

³⁰ Si maṉa oki tekwasia abamu uria faamaruki lana mataia ki; ma keki ilia bala si do ki ma do ni kwele la ania ki ana thatana Wela abu oe tha Jesus.

³¹ Ma buriana na kera foa, si kula eri na kera figu mai iei ka igiigi; ma kera faafuṉua toa eki sui boo atha Spirit Abu, ma keka seeraa ana ṉata la sulia bae lana tha God.

³² Ma malului wane eki sui boo na kera fitoo kera to ana tee si lio ma ana tee si manata: me ai ta imole si sorea si do ne rikidaki si do nia ki i talaana; si do kera ki si do i ofuane ki bana.

³³ Ma ana sukwaia baita aposela ki kera faamamanea si do kera thaitoomana sulia tatae lana tha Lord Jesus: ma lea la baita e to fafi kera sui boo.

³⁴ Uria ne ai ta imole iada si to ana rofe la: sulaania toa na ada si gano ki mado biu ki kera usi ania, keka ṉalia mai malefo na kera taala asi do eki,

³⁵ Keka alua isana aaena aposela ki: ma kera toliṉia faisida sui, sulaania rofe la na atona bana ta wane kai rofe ania.

³⁶ Ma tha Josefa, wane na aposela ki kera alaṉia atha Banabasi (ma toolaṉai lana thata eri, Kaluwane ana kwaifamanatai la), wane ana kwalafa tha Lifae, ana toa i Saeporasi,

³⁷ Ne ana ta bali gano, ka usi ania, ka ṉalia mai malefo eri, ka alua isana aaena aposela ki.