Si do Aposela ki kera ilidaki 28 - Ṉa Alaofua Falu 1923 1949

¹ Ma si maṉa na kera maruki mai e sui, keka bii thaitoomana na kera alaṉia auua eri ana Melita.

² Ma toa eki ṉata lade eeta kera ade lea ka tatha uri kamilia: uria kera suunia era, keka thathagoni kamilia sui mai, sulaania na dani aru, ma unii gwagwaria.

³ Sui si maṉa na tha Polo e ofua ifii ’ei, me alua ana era eri, tee baekwa i tolo ka thaka mai uria ne akoako, ma ka ala ana abana.

⁴ Ma si maṉa na toa eki ṉata lade eeta keka rikia do aala eri ne taru ana abana, keka ṉata kwailiu uri kera, keka una eri, Wane ne thauwane nania e ai si ei boo, e thaka mai faisia amali, una ena mena, god ana duu lana si do ne ai si kokoto ki e ai si alamatania kai maruki.

⁵ Ma nia tagaraṉai nia do aala eri ka asia i la era, ma nia ka to lea bana.

⁶ Ma ni kera keka maakwalia si maṉa seena sa kai ubu, mado nia kai asi nia, kai mae fofoa: sui kera mamaakwalia ka tau naa, me ai kesi rikia ta si do taa na sa kai uri nia, manatada ka tae, ma keka sorea ta god.

⁷ Ma fanua kakalia si kula eri na fanua wane inoto ka tatha ana auua eri, thatana tha Pabaliasi; ne thathagoni kamilia mai, ma ka ade lea uri kamilia, ka thare kamilia sulia ulu fa boṉi.

⁸ Ma si maṉa eri maka tha Pabaliasi e teo ka matai ana si fule bia tatafa‐abu: ma tha Polo e kotho mai isana, ma ka foa, sui ka alua abana fafi nia, ka faamaruki nia.

⁹ Ma buriana si ade la eri, toa ana auua eri na kera matai ana mataia oro ki keka lae lau bomai, ma kera faamarukida:

¹⁰ Toa na keka fare baita lau boo ani kamilia asi do oro ki; ma si maṉa na mika lae, keka falea si do na mili rofedaki, mika ṉalia.

¹¹ Ma ulu madami e sui, mika lae i la faka i Alikisadaria, ne toto i la auua eri sulia unii gwagwaria, na kera thauwai nia nuna tha Kasito ma tha Polakasi i seena.

¹² Ma mika olo i Saerakiusa, mika to iei sulia ulu fa boṉi.

¹³ Ma mika akwasia si kula eri, mika lilieba olili, mika fula i Regiama: ma buriana tee fa boṉi thauthau e maṉo mai i mutana, ma ana ruana fa boṉi mika fula i Puteoli:

¹⁴ Ma mika fulatoona tai wane ana baree wai doorana kula eri, na kera ṉata kwaitakoi, keka soree isamilia sa mika to isada sulia fiu fa boṉi: ma sui mika lae uri Roma.

¹⁵ Ma si maṉa na baree wai doorana ni kula eri kera roṉo kamilia, keka lae mai uria toda la iamilia, keka fula asi kula tha Apiasi e kasia uria usi la iei, ma ana Ulu Biu Toa Kwaita ki: ma si maṉa na tha Polo e rikia wane eki, e taṉoa thatana tha God, ma kai lea iana.

¹⁶ Ma lalae mili fula i Roma, senitiurione ka falea kau toa eki na kera kania isana wane ne inoto ana omea: ma tha Polo kera alamatania ka to tee nia bia wane ana firua ne suusi nia.

¹⁷ Ma lalae mai buriana ulu fa boṉi, tha Polo e ailia mai toa na kera inoto ana Ju ki: ma si maṉa na kera ofu mai, nia soree isada, Doora kera, kwasi abula taa mena uria toa kulu, mado biraṉana maka kulu nai nao ki, kera fale nau bada i Jerusalema i abana wane i Roma ki:

¹⁸ Ma wane eki, buriana na kera soekalitaku sulia si do nau ki, keka thathamii lube nau kwa lae, uria na ta si do na sa keki duua ana maea si to ani nau.

¹⁹ Ma si maṉa na Ju ki keki ṉata mai, keka lufia si ade la eri, kera suuwai nau e ai si ei boo kwai ’ai thatana tha Sisa; sui e ai kwasi thathamii alaṉia kulee toa nau ana ta si do.

²⁰ Mania uria si kula eri nau ku aili kamulua mai na ba fasi muki lio i maaku ma muki ṉata bi nau: sulaania uria si do eri Isirela e manatatoo ṉado uria, kera kani nau ana nailii thalo nania.

²¹ Ma kera soree isana, E ai misi rikia ta leta i Judia suli oe, me ai ta wane ana baree wai doorana na kera lae mai uri kunei si faaroṉo kamilia mado si sorea ta si do ne taa suli oe.

²² Ma mili thathamia oki faaroṉo kamilia ana manatamu: uria toa na kilu faamamanea kwaifamanatai la eri, mili thaitoomana sulida na kera ṉata taa seeda ta si kula si ei.

²³ Ma buriana na kera gwalua tee fa boṉi ifana, toa oro iada keka ofu mai isana i la biu ne to mai iei; ma nia fatai nia maalutana kwaifamanatai la eri, ka faamamanea si do ne thaitoomana sulia tooa tha God, ma ka ṉata sulia tha Jesus ana ṉa lo tha Mosesi ma ana porofeta ba ki, fasi kai bulasia ruruuda, too i uusuwadia ka ṉaṉata fanua ka rodo.

²⁴ Ma tai toa iada kera fitoona si ṉata ne sorea, ma tai toa lau kera fitala.

²⁵ Ma si maṉa ne ai kesi to ana tee si lio, keka lae nada, buriana na tha Polo e sorea tee si baea neri, Si do na tha Spirit Abu e sorea atha Aisaia ṉa porofeta isa na maka kulu nai nao ki e too,

²⁶ Be una eri, Oki lae isana toa nai, ma oko sorea, Ana roṉo la muki roṉoi, me ai dodoloa muki thaitoomana; Ma lio la muki lio, me ai dodoloa muki rikia ta si do:

²⁷ Uria na ruruuna toa nai ka raraṉaa naa, Ma kera roṉo fafusi bada ana aliṉada, Bia keka maafu; Ada mado e ai keka lio ana maada, Ma keka roṉoi ana aliṉada, Ma keka thaitoomana ana ruruuda. Ma keka akele buri. Fasi kwa faamarukida.

²⁸ Mania muki thaitoomana, keki falea kau marukia tha God neri ana Jenetaele ki: ma ni kera keki roṉoa.

²⁹ Ma buriana ne sorea si ṉata eki, Ju eki keka lae nada, keka oli susuu kwailiu faamau.

³⁰ Ma tha Polo e to sulia ro fa ṉali laulau i la biu na kai usia ṉado maṉa na kai to iei, ma kai thathagonia mai toa eki sui bana na keki kotho isana,

³¹ Kai ṉata sulia tooa tha God, ma kai tooa si do sulia tha Lord Jesus Christ ki ana seeraa la faamau, me ai ta wane si lufi nia faisia.