Si do Aposela ki kera ilidaki 27 - Ṉa Alaofua Falu 1923 1949

¹ Ma si maṉa manatada na miki lae i la faka uri Itali, keka falea tha Polo bia tai wane na kera kanidaki lau boo isana tee senitiurione, thatana tha Juliasi, ana omea wane eri ne inoto ka atha ani kera sui.

² Ma mili tae i lala tee faka i Adaramitiama, na karaṉia kai lae uria toaa ni thara ki ana Asia, mika lae i la matakwa, ma tha Arisitakasi, wane i Masedonia ana toaa i Thesalonika, ka lae bi kamilia.

³ Ma afa boṉi iburiana mili olo i Saedona: ma tha Juliasi e ade lea uria tha Polo, ka alamatania kai lae isana toa na kera ado bi nia fasi kai mamalo.

⁴ Ma ita asi kula eri mili lae i la matakwa, mika tatha karaṉia Saeporasi, fanua eri kai suusia thauthau faisi kamilia, uria thauthau kai too mai inaofamilia.

⁵ Ma buriana na mili faifolo i la amali ne otofana Silisia ma Pamofilia, mika fula i Maera, fanua i Lisia.

⁶ Ma senitiurione eri e fulatoona tee faka i Alikisadaria i kula eri na karaṉia kai lae uri Itali, ma nia ṉali kamilia i la faka eri.

⁷ Ma buriana na mili thafee lae sulia fa boṉi oro ki, ma mili aṉasi faamau mili fula otofana Kinidasi, uria na thauthau e suusi kamilia misi tatha i kula eri, mika lae karaṉia Kirita, otofana Salamone, fanua eri kai suusia thauthau faisi kamilia;

⁸ Ma mika aṉasi faamau, mika usuli thara, mika fulatoona tee si kula na kera alaṉia ana Fokali Lea ki; na toaa susu i Lasea ni karaṉia.

⁹ Ma uria na mili lae ka tau na mai, ma mika to karaṉia maea kada na mika lae i la faka si maṉa eri, uria na lalae si maṉa ba na toa kera abu ana faṉa la ka sui naa, tha Polo e ṉata fifi isada,

¹⁰ Ka soree isada, Thaa wane ae, nau ku thaitoomana i manataku lae la unei la amali kai ṉalia mai taa la ma rofe la baita; talitoona si do nai la faka ma faka nai na kai aana e ai, maṉokulua lau boo.

¹¹ Una ena mena, senitiurione eri e fale nia ana manatatoona lana si do wane ne inoto ana ra la i la faka eri ma wane ne ana ania keko sorea, e ai si manata baita asi ṉata tha Polo.

¹² Ma uria na fokali eri e ai si baita lea fasi keki to iei sulia unii gwagwaria, manatana oroṉana toa eki keki akwasia si kula eri, keki lae i la matakwa, sa mado e ai keki fulatoona Fenisi, keki to mai iei sulia unii gwagwaria; tee fokali i Kirita neri, na kai lio uria si kula i maalutana tae lana thato ma notoa ma uria si kula i maalutana tae lana thato ma mutana lau boo.

¹³ Ma si maṉa na thauthau ne ai si sukwai e maṉo mai i mutana, manatada sa kera fulatoona naa si do kera thathamia, keka kwaigwalu ma keka usuli thara i Kirita.

¹⁴ Ma sui e ai si tau ma kuburu baita, na kera alaṉia ana Iurokilidona, ka suusida faisia fanua eri:

¹⁵ Ma si maṉa na thauthau eri ka toea ṉa faka, ne ai si sukwai ana suusi lana, miki lae sulia lae lana thauthau eri, me too iburiamilia.

¹⁶ Ma si maṉa mika tatha fofoa karaṉia tee auua faekwa, thatana Kiloda, ne suusia thauthau faisi kamilia, mika aṉasi faamau, mika alu ni lea la ana foorua:

¹⁷ Ma buriana na kera lafua mai ia e sui, keka ra asi do na kai adomida ki, keka kani rarafolo i matoṉana faka ana ara; ma, uria na kera mau ada mado e ai keka te asi kula ne tete, keka ligisia eba, ma thauthau ka too bonaa iburiada.

¹⁸ Ma si maṉa faka kamilia e gelugelu faamau ana kuburu eri, afa boṉi iburiana keka naṉa ana do nai la faka eki;

¹⁹ Ma ana ula fa boṉi mika rau ana tai si do ana si do lea nai la faka eki, mika naṉa ania ana abamilia i talaamilia.

²⁰ Ma si maṉa na thato ma bubulu ki e ai si laa kakali kamilia sulia fa boṉi oro ki, ma kuburu e baita fafi kamilia, mika sorea ne ai misi maruki bonaa.

²¹ Ma buriana ne tau naa na kesi faṉa, tha Polo e takwe ia i maalutada, ma ka sorea, Thaa wane ae, e lea na sa mulu roṉo nau na ba, ma musi lae faisia Kirita, musi fulatoona taa la nai ma rofe la nai.

²² Ma si maṉa eri ku soree isamulua, kai lea bana iamulua: uria ne ai ta imole iamulua si mae, talitoona bana faka na kai aana.

²³ Sulaania tee angel ana ṉa God na do nia ni nau, ma kwa ra lau boo ifana, e takwe isaku afa rodo eri boo,

²⁴ Ma ka una eri, Osi mau, Polo; oki takwe e ai si ei boo inaofatha Sisa: ma rikia fasi, tha God e alamatania toa eki sui boo ifamu na kera lae i la faka bi oe.

²⁵ Mania thaa wane ae, kai lea bana iamulua: uria nau ku fitoona tha God, na si do eki kai fula mai ’uria si do na kera soree isaku.

²⁶ Ma sui amali kai naṉa ani kulu ifafona tee auua.

²⁷ Ma sui maṉa faina fa rodo e ta isana tafulu fa rodo, si kada na kuburu ka ṉali olili ani kamilia i la amali i Adiria, fuliṉana initoona rodo manatana wane ni ra la i la faka ki e soso sa mika ni karaṉia ta fanua;

²⁸ Ma kera olotoona amali, keka fulatoona ro tafulu abala: ma buriana ta kasi maṉa faekwa, ruana keka olotoona lau, keka fulatoona tee tafulu abala lima abala.

²⁹ Ma uria na kera mau ada mado e ai amali kai naṉa ani kamilia i la mai, keka asigwalu ana fai gwalu ki i buira faka, ma keka thathamia faamau si maṉa fanua kai dani

³⁰ Ma si maṉa na wane ni ra la ana ṉa faka ki keki thathamii thaka faisia faka eri, ma kera sifolaṉai nia foorua kai to naa i la amali, ’uria sa kera asigwalu ana tai gwalu i maana faka,

³¹ Tha Polo ka soree isana senitiurione eri ma isana wane ana firua ki, Mada sa wane nai ki kesi to i la faka, sa muka maruki e ai.

³² Sui wane ana firua ki kera irimusia arana foorua eri, keka ekwatania ka lae faisia faka.

³³ Ma thathala ana dani, tha Polo e ṉata kwaitakoi, ka soree isada sui boo sa keki ania ta si faṉa, ka una eri, Faina fa boṉi e ta isana tafulu fa boṉi na mulu maakwalia si do na kai fula mai, mulu toto faisia faṉa, musi ania ta si do.

³⁴ Mania ku ṉata kwaitakoi, ku soree isamulua muki ania ta si faṉa: uria si do na kai faamaruki kamulua neri: sulaania ta tee kwakwee ifu mena sa ka aana faisia gwauna ta wane iamulua e ai.

³⁵ Ma buriana ne ṉata una eri, nia ṉalia ta si berede, ma ka sore lea atha God inaofada sui: ma nia nia, ka thafalii faṉa.

³⁶ Sui e lea iada sui boo, ma ni kera keka faṉa lau boo.

³⁷ Ma ni kamilia sui na mili to i la faka, amilia ro taleṉee imole ma fiu akwala ma ono imole.

³⁸ Ma buriana na kera abusu e sui, keka adea faka kai thathala, keka naṉa ana uiti eri la amali.

³⁹ Ma toto fanua e thato naa, kesi thaitoomana fanua eri: ma keka rikia tee loua si one ni iei, ma keka bae ofu sa mado e ai keki talaana faaruufai lana faka iei.

⁴⁰ Ma keka u ana ara ne faaṉadoa gwalu eki, keka ekwa ania i la amali, si maṉa na keka lukea si do na kera kania ana do ni atho la; ma keka lolo eba ana eba nai nao ana thauthau, keka lae uria si one eri i thara.

⁴¹ Ma sui kera fula ana kula na ro afe ki ka kwaitodai iei, faka eri ka katu; ma maana faka ka katu, ka to ṉado, ma buira faka eri ka dekwe uria amali ne kwae sukwai ania.

⁴² Ma manatana wane ana firua ki sa keki thauṉia wane na kera kanidaki, ada tai wane keki araṉa faisida, keka thaka.

⁴³ Ma senitiurione eri ka lufida faisia si do kera thathamii ilia, uria ne thathamia kai faamarukia tha Polo; ma nia sorea toa na kera thaitoomana araṉa la keki fusi la amali, keki fula totonao i thara:

⁴⁴ Ma toa na kesi thaitoomana, tai toa iada keki ono i fafona si rebee ’ei, ma tai toa lau i fafona si do ana faka ki. Ma kera ade una eri, kera sui keka maruki, keka fula i thara.