Si do Aposela ki kera ilidaki 26 - Ṉa Alaofua Falu 1923 1949

¹ Ma tha Agiripa ka soree isatha Polo, Keki alamatai oe oki tala ṉata amua ana adomi lamu la. Sui tha Polo ka tekwasia abana, ka ṉata fasi kai suusia taa la faisi nia:

² Manataku ne lea iaku kiṉa Agiripa, kwai ṉata inao famu itaraena, kwai suusia faisi nau si do taa eki sui bana na Ju ki kera alaṉi nau ania:

³ E lea faamau iaku uria o wane no thaitoomana filoa ana biraṉana Ju ki sui boo ma oli susuu la na ni maalutada: mania nau ku ṉata kwaitakoi, ku sorea soki roṉo nau asi lio ana doanita la ne tau.

⁴ Abula laku ita mai i faekwa laku, Ju ki sui bana kera thaitoomana, lalae mai nau kwa baita i maalutana toa nau ki, ma i Jerusalema:

⁵ Keka thaitoomana to laku ita mai ana thafali lana, mada sa keki thathamii faamamanea si do kera thaitoomana suli nau, na sulia kwaifamanatai la toa na kera fare baita ka tatha ana biraṉamilia ana foa la, nau ku to ku Farisi.

⁶ Ma si maṉa eri ku takwe fasi wane ni kotu kai ṉata suli nau maana si do mili manatatoo ṉado uria na alaṉaia na tha God e alaṉai nia ana maka kamilia nai nao ki:

⁷ Si do eri na tee tafulu kulee toa ma ro kulee toa kamilia ki keki seemabe ana ra la afa rodo ma afa thato, uria na kera manatatoo ṉado uria fulatoona lana. Kiṉa Agiripa ae, uria si do eri na mili manatatoo ṉado uria, Ju ki keki alaṉi nau asi do eki!

⁸ Mada sa tha God kai tataea toa mae ki, uria ta na mulu alaṉia si ade la eri asi do na imole e ai si thaitoomana faamamane lana?

⁹ E mamana ni nau manataku i talaaku ne kokoto kwa ilia si do oro ki ne maalimae ana thatana tha Jesus. Wane i Nasaretha.

¹⁰ Ma ku ilia boo si do eki i Jerusalema: ku suusia toa oro ana toa abu ki la lokafu ki, uria wane inoto ni foa ki kera faasukwai nau uria, ma si maṉa kera thauṉida, nau ku alanee mae lada lau boo.

¹¹ Ma nau ku ilia si do na sa kai faamanatai kera iada asi maṉa oro ki la biu ni ofu la ki ta si kula si ei, ku aṉasi sa kwai suuwanida keka bae ni fare toliṉi lana tha Jesus; ma uria nau ku rakeiri faamau urida, ku tona ilamatai kera uri la toaa susu ana fanua eeta ki mena.

¹² Mania si maṉa nau ku lae uri Damasikasi ana sukwaia ma inotoa na wane inoto ni foa ki kera falea iaku.

¹³ Kiṉa ae, i initoona thato, ku ni sula tale, ku rikia lalaa la ita mai i thalo, ne laa ka tatha ana laa lana ṉa thato, ma ka sina kakali nau ma kakalia toa na kera lae bi nau.

¹⁴ Ma si maṉa ni kamilia sui mili asi kamilia i theegano, nau ku roṉoa liṉana si ṉata la ne una eri isaku ana ṉata lana Hibaru ki, Solo, Solo, uria ta noki tona ilamatai nau? e afetai iamu soki ato falaburi i maana sua.

¹⁵ Ma nau ku sorea, Oe ni tei, Lord? Ma nia sorea, Nau tha Jesus noki tona ilamatai nau.

¹⁶ Ma oki tatae, oki takwe ana aemu: sulaania nau ku fula fatai isamu uria si kula eri, fasi kwa alu oe ṉa wane ni ra ma wane ni faamamane lana si do no thaitoomana sulia si do eki no bii rikia, ma sulia si do na toto kwai fatai nau isamu anidaki;

¹⁷ Si maṉa kwai faamaruki oe faisia toa nai, ma faisia Jenetaele ki, na nau kwai arasi oe isada,

¹⁸ Fasi oki ifinia maada, kikui akele faisia maerodo uria ṉa lalaa la, ma faisia sukwaia tha Satan isatha God, fasi keki manata lubea abula taa la kilua ki, ma kikui ṉalia si do na kikui fulatoona i maalutana toa na kera faaabuda ana fitoona laku la.

¹⁹ Mania, kiṉa Agiripa, nau kwasi ade faisia si na kera fatai lalaa mania i thalo neri:

²⁰ Ku soree isana toa nai Damasikasi totonao, ma i Jerusalema, ma ana fanua i Judia ni sui bana, ma isana Jenetaele ki lau boo, keki akeletania manatada ma keki akele uria tha God, keki ilia si ra ne farana manata akele la.

²¹ Uria si kula eri Ju ki kera rau ani nau i la biu baita tha God, karaṉia sa keki thauṉi nau.

²² Mania uria nau ku fulatoona kwaiadomi la ne ita mai atha God, ku takwe ṉado ka fula itaraena, ku faamamanea si do ku thaitoomana isana toa fakoka ki ma toa inoto ki lau boo, kwasi sorea ta si do eeta lau, talitoona boo si do eki na porofeta ba ki ma tha Mosesi kera sorea kai fula mai;

²³ Na ṉa Christ kai to ana taa la e ai si ei boo, ma nia Wane totonao na kai tatae faisia toa mae ki, ma kai fatai nia lalaa la isana toa nai ma isana Jenetaele ki lau boo.

²⁴ Ma si maṉa ne ṉata una eri ana suusi lana taa la faisi nia, tha Fesitasi ka ’ai faamau, ka sorea, Polo, o oewanea; ra baita oe ana teemai lana buka oro ki e bulasi oe uria oewanea la.

²⁵ Ma ni nia e sorea, Fesitasi, wane no inoto ka tatha, nau e ai kwasi oewanea; ku sorea si baea ana mamana la ma taiṉei la.

²⁶ Sulaania ṉa kiṉa e thaitoomana maalutana si do eki, ma nau ku ṉata seeraa isana: uria nau ku thaitoomana boo ne ai ta do asi do eki si to thaufuni faisi nia; uria kesi ilia si do eri ana kasi susui fanua seseka.

²⁷ Kiṉa Agiripa, o fitoona porofeta ba ki? Nau ku thaitoomana no fitoo boo.

²⁸ Ma tha Agiripa ka soree isatha Polo, Ana kasi ṉata faekwa uria bulasi lana ruruuku o thathamia oki adea kwai Christian.

²⁹ Ma tha Polo ka sorea, Ku thathamia inaofatha God, ana kasi ṉata faekwa mado asi ṉata oro, kwai adea na talifili oe e ai, toa eki sui bana na kera roṉo nau itaraena, keki ’uri nau, nailii thalo eki ka ai faisida.

³⁰ Ma buriana ne ṉata una eri e sui, kiṉa eri ka tatae, ma wane inoto eri, ma ni Banisi, ma toa eki na kera ono bida:

³¹ Ma buriana na kera lae faisi nia, kera ṉata kwailiu, keka una eri, Wane nai e ai si ilia ta si do na kuki duua ana maea mado ana nailii thalo ki.

³² Ma tha Agiripa ka soree isatha Fesitasi, Wane nai kuki luka ania kai lae nana, mada se ai si ’ai thatana tha Sisa.