Si do Aposela ki kera ilidaki 24 - Ṉa Alaofua Falu 1923 1949

¹ Ma lima fa boṉi e sui, aofia ni foa na tha Ananiasi ka sifo bia tai ulunao ki, ma tee nonii wane, thatana tha Tatalasi, ne thaitoomana lea ṉata la; ma kilu alaṉia tha Polo asi do ki isana wane inoto eri.

² Ma si maṉa na kera aili nia mai, tha Tatalasi ka bii alaṉi nia asi do eki, ka una eri, Felikasi ae, no inoto ka tatha, uria na mili seethathala ana enenoa baita uri oe, ma liotooa oe no onotoona ta si do maṉa ne ai si fula u e alu kokoto asi do oro ki ifana kulee toa nai,

³ Kamilia mili ala fafia liotooa eri asi do ki sui bana ma ta si kula si ei, ana si sore lea la.

⁴ Ma sui, ada kwa faafeda oe ana ṉata tekwa la una eri, ku ṉata kwaitakoi, ku soree isamu sa asi lio ni thathaore la oe oki roṉo kamilia fafia kasi ṉata faekwa.

⁵ Sulaania mili fulatoona wane nai ne ’uria mataia taa ne sisigi, kai thafalia firu la bia toa i Roma i maalutana Ju ki ana fanua nei iano ni sui bana, ma nia wane sukwai ana wane eki na kera tatha inaona toa na kera faamamanea kwaifamanatai lana Nasarini ki:

⁶ Ne thathamia lau boo kai faasua biu baita tha God: ma sui ni kamilia mili rau ani nia, mili thathamia sa wane ni kotu kamilia kai ṉata suli nia sulia lo kamilia.

⁷ Ma wane eri ne inoto ana omea, tha Lisiasi, ka lae mai, ka firu faamau, ka laua faisia abamilia,

⁸ Ma ka soree isana toa na keka alaṉi nia asi do ki keki lae isamu: mo soetooda e sui, keki faaroṉo oe oki thaitoomana maalutana si do eki sui boo, na mili alaṉi nia ania.

⁹ Ma Ju eki keka alaṉi nia lau boo asi do eki bia wane eri, keka sorea si do eki e mamana.

¹⁰ Ma si maṉa na wane inoto eri e fafuilala uri nia fasi kai ṉata, tha Polo e luua, Uria nau ku thaitoomana o wane ni kotu ana kulee toa nai sulia fa ṉali oro ki, e lea iaku kwai ṉata, kwai suusia si do taa eki faisi nau:

¹¹ Uria ne ai si afetai noki thaitoomana, na talitoona tee tafulu fa boṉi ro fa boṉi e sui ita mai asi maṉa nau ku tae uri Jerusalema uria foa la:

¹² Me ai kesi fulatooku i la biu baita tha God si maṉa ku oli susuu bia ta wane mado ku faasurake ana toa oro, ma i la biu ni ofu la ki, ma i la toaa susu eri ka ai lau boo.

¹³ Me ai kesi talaana fatai lana mamana lana si do eki isamu na kera alaṉi nau ania si maṉa eri.

¹⁴ Tee si do ku faamamanea isamu, ana Tala eri na kera alaṉia ana kwaifamanatai la eeta, ku ra boo ifana ṉa God maka kamilia nai nao ki, ku fitoona si do eki bana na kera keda i la lo, ma ana porofeta ba ki:

¹⁵ Ku manatatoo ṉado atha God uria si do eri, na ni kera keka maakwalia lau boo, na si maṉa ana tatae lana toa mae ki kai fula mai, tatae lana toa kokoto ki ma toa na kesi kokoto lau boo.

¹⁶ Ma asi kula eri ku aṉasi lau boo fasi lioku kai dodoloa ṉado uria tha God ma uria imole ki.

¹⁷ Buriana fa ṉali oro ki sui na mai nau kwa bii lae mai maṉa eri fasi kwa ṉalia mai si do kera tona faledaki iada isana kulee toa nau, ma do ni foa la ki:

¹⁸ Si maṉa ku ni ana ra eri, buriana na nau ku faa falu nau, tai Ju na kera lae mai i Asia kera fulatooku i la biu baita tha God, e ai tai toa oro kakali nau, ma ka ai ta ṉalu la:

¹⁹ Me kokoto na sa toa eki keki to i kunei inaofamu, keki alaṉi nau ania, mada sa manatade teo ana ta si do uri nau.

²⁰ Mado wane nai ki keki faaroṉo ana ta si abula la ne taa na kera fulatoona ani nau, si maṉa nau ku takwe inaofana ofu la eri na ba,

²¹ Tee si ṉata eri bonaa, nau ku ’ai faamau maṉa ku takwe i maalutada, Sulia tatae lana toa mae ki kera alaṉi nau inaofamulua itaraena.

²² Ma buriana ne roṉoa si do eki, tha Felikasi, ne thaitoomana filoa sulia Tala eri, ka sorea kai to si ana, ka una eri, Toto tha Lisiasi, wane eri ne inoto ana omea, e sifo mai, nau kwai sorea si do na keki ilia asi do kamulua eri.

²³ Ma nia soree isana senitiurione kai suusia tha Polo, ma kai ade lea iana; ma ka ai si lufia toa na kera ado bi nia faisia ra la ifana mado fula la isana.

²⁴ Sui buriana tai fa boṉi, tha Felikasi e lae mai bia kwaina, ni Durusila, ne Ju, ka kwaiarasi uria tha Polo, ma ka roṉo nia sulia fitoona lana tha Christ.

²⁵ Ma si maṉa nia kwaifamanatai sulia kokoto la, ma inoto la ana seekulua, ma fa boṉi ana kotu baita na toto kai lae mai, tha Felikasi e aanu, ma ka luua, Oki lae amua si maṉa eri; si maṉa nau ku rikia ne farana, nau kwai aili oe mai.

²⁶ Nia manatatoo ṉado lau boo uria malefo ne maakwalia atha Polo fasi kai lubea kai lae: mania nia kwaiarasi uri nia asi maṉa oro, ma ka ṉata bi nia.

²⁷ Ma sui buriana ro fa ṉali, tha Posiasi Fesitasi e taala tha Felikasi; ma uria ne thathamia Ju ki keki ala fafi nia, tha Felikasi e akwasia tha Polo ana nailii thalo eki.