Si do Aposela ki kera ilidaki 23 - Ṉa Alaofua Falu 1923 1949

¹ Ma tha Polo ka lio tete uria ofu la eri, ka sorea, Doora kera, nau ku abula ṉado inaofatha God asi lio ne lea ka fula ana itaraena.

² Ma aofia ni foa na tha Ananiasi ka soree isana toa na kera takwe isana keka kwae faisia fokona.

³ Sui tha Polo ka soree isana, Tha God kai kwae oe, wane no ’uria ugu na kera rabua ka kwakwaoa: o ono uria ṉata la mala wane ni kotu suli nau sulia ṉa lo, mo sorea keki ade faisia ṉa lo ana kwae laku la?

⁴ Ma toa na kera takwe isana keka sorea, O ṉata taa uria aofia ni foa tha God?

⁵ Ma tha Polo ka sorea, Nau kwasi thaitoomana, doora kera, ne aofia ni foa: uria kera keda, Osi sorea si do ne taa sulia wane ne gwauwai ana toa oe ki.

⁶ Ma sui si maṉa na tha Polo e rikia na ta bali wane iada kera Sadiusi ki, ma ta bali wane kera Farisi ki, nia ’ai faamau ana ofu la eri, Doora kera, nau ku Farisi, kaluwane Farisi: sulia si do kulu manatatoo ṉado uria ma tatae lana toa mae ki kera alaṉi nau.

⁷ Ma buriana ne ṉata una eri, oli susuu la e tae mai i maalutana Farisi ki ma Sadiusi ki: ma ofu la eri ka to ana ro si lio.

⁸ Sulaania Sadiusi ki kera sorea ne ai ta tatae la faisia maea si to, me ai ta angel, me ai ta spirit: Farisi ki molo kera faamamanea ro si do eki.

⁹ Ma kera ṉaluṉalu faamau: ma tai wane ni kekeda ana Farisi ki keka takwe ia, keka ṉata ni firua, keka una eri, Kamilia e ai misi fulatoona ta si do ne taa ana wane nai: ma mada sa tee spirit e ṉata isana mado tee angel, e ai si lea sa kuki firu bia tha God.

¹⁰ Ma si maṉa na oli susuu la baita e tae mai, wane inoto ana omea e mau ada mado e ai keki laumusia tha Polo, ka soree isana wane ana firua ki keki sifo, keki firu, keki aba nia faisia i maalutada, keki talaia uri biu wane ana firua ki.

¹¹ Ma afa rodo iburiana ṉa Lord e takwe isana, ka sorea, Kai lea bana iamu, Polo: uria talafana no faamamanea si do no thaitoomana suli nau i Jerusalema, alafana lau boo e ai si ei oki faamamanea boo si do eri i Roma.

¹² Ma lalae dani naa, Ju ki kera ṉata ofu, keka sorea taa la baita kai to fafi kera i talaada, mada sa keka faṉa mado keka kuu si maṉa na kesi thauṉia u tha Polo.

¹³ Ma fai akwalee wane ma ka ta na kera oloa omea eri.

¹⁴ Ma kera lae isana wane inoto ni foa ki ma ulunao ki, keka sorea, Kamilia mili sorea taa la baita kai to fafi kamilia i talaamilia, mada sa miki anitoona ta si do si maṉa na misi thauṉia u tha Polo.

¹⁵ Mania ni kamulua bia ofu la eri muki faaroṉoa wane ne inoto ana omea kai talaia kai sifo mai isamulua usuwadi, ’uria sa muki thathamii thaitoomana filoa maalutana abula lana: ma ni kamilia, si maṉa ne ai si fula u karaṉi kamulua, miki kwaimaakwali uria thauṉi lana la.

¹⁶ Ma kaluwane waiwaena tha Polo e roṉoa teoa na kera uia, ka lae mai, ka kotho i biu wane ana firua ki, ka faaroṉoa tha Polo.

¹⁷ Ma tha Polo e ailia mai tee nonii wane ana senitiurione ki, ka sorea, Oki talaia wane bii baita nai isana wane ne inoto ana omea: uria ne thaitoomana ta si do ana faaroṉo lana la ania.

¹⁸ Mania e talai nia, ka tolea isana wane inoto eri, ma ka sorea, Tha Polo, wane ba na kera suusia i la lokafu, e aili nau mai isana, ma ka sorea sa kwa tolea wane bii baita nai isamu, uria ne thaitoomana ta si do ana faaroṉo lamu la ania.

¹⁹ Ma wane inoto eri ka rau i abana, ka talaia faisida, ka soetoo thaufuni ania, Si ta no thaitoomana ana faaroṉo laku la ania?

²⁰ Ma nia sorea, Ju ki kera ṉata ofu, keka to ana tee si lio, keki sorea soki talaia tha Polo usuwadi isana ofu la eri, ’uria sa keki soetoona, keki thaitoomana filoa ta si do lau suli nia.

²¹ Mania osi ade sulida: uria fai akwalee wane ma ka ta kera u teoa maakwali nia, toa na kera sorea taa la kai to fafi kera i talaada, mada sa keki faṉa mado keki kuu si maṉa na kesi thauṉi nia u: ma si maṉa eri kera kwaimaakwali, keka maakwalia alaṉaia eri noki alaṉai nia.

²² Mania wane ne inoto ana omea ka alamatania wane bii baita eri ka lae, ka soree isana, Osi soree isata wane so faaroṉo nau mai asi do eki.

²³ Ma nia ailia mai ro senitiurione ki isana, ma ka sorea, Moki thathaia ro taleṉee wane ana firua ki fasi keki lae uri Sesaria, ma fiu akwalee wane na kera ono i suila hosi ki, ma ro taleṉee wane ana firu la ana sua ki, maakwalia ula si kadee rodo:

²⁴ Ma moki thathaia do ana fai ae ki, fasi keki finua tha Polo kai ono i suila do maruki eki, keki tole lea ani nia uria tha Felikasi, wane ne inoto ana fanua eri.

²⁵ Ma nia keda tee leta, ka una eri:

²⁶ Tha Kilodiasi Lisiasi kai aratai lea la atha Felikasi, wane no inoto ka tatha.

²⁷ Wane nai Ju ki kera rau ania, karaṉia sa keki thauṉia, sui nau ku lae isada bia omea ba, ku faamarukia, uria nau ku roṉoa nia wane i Roma.

²⁸ Ma uria nau ku thathamii thaitoomana maalutana si do na kera alaṉi nia ania, ku tole nia kai sifo isana ofu la kera:

²⁹ Ma nau ku fulatoona na kera alaṉi nia ana ta si do sulia si do kera oli susuu fafia ana lo kera i talaada, kesi alaṉi nia ana ta si do ne farana sa kai maelia mado kwa kania.

³⁰ Ma si maṉa na kera fatai nia isaku na Ju ki kera oloa omea maakwalia wane eri, si maṉa eri u boo ku arasi nia isamu, ku soree isana toa na kera alaṉi nia asi do ki keki ṉata lau boo, keki alaṉi nia inaofamu. Oko toto kau.

³¹ Mania wane ana firua eki keka talaia tha Polo, alafana si do na kera soree isada, keka talai nia afa rodo uri Adipatarisi.

³² Ma afa boṉi iburiana keka akwasia wane eki na kera ono i suila hosi ki keki lae bi nia, ma keka oli lau uri biu wane ana firua ki:

³³ Ma wane eki si maṉa na kera fula i Sesaria, keka falea leta eri isana wane inoto, ma keka falea tha Polo lau boo inaofana.

³⁴ Ma buriana na wane inoto eri e teemai nia e sui, nia ka soetoona ṉa fanua nia; ma si maṉa ne thaitoomana nia wane i Silisia.

³⁵ Nau kwai roṉoa si do oe ki (ṉata lana neri) si maṉa na toa eki na kera alaṉi oe asi do ki keki fula lau bo mai: ma nia sorea keki suusi nia i biu baita tha Heroda.