Si do Aposela ki kera ilidaki 22 - Ṉa Alaofua Falu 1923 1949

¹ Doora kera ma maka kera, muki roṉo nau si maṉa eri ni nau kwai ṉata isamulua, kwai talumatania si do taa eri faisi nau.

² Ma si maṉa kera roṉoa ne ṉata isada ana ṉata lana Hibaru ki, keki to aroro ka sukee tatha: ma nia sorea,

³ Nau ṉa Ju mamana boo, na ku futa mai i Tasasi i Silisia, ma sui nau ku baita na i toaa susu nai, isana aaena tha Gamaliela, kera to’oa si do ki isaku sulia kwaifamanatai la ne fare baita ana ṉa lo maka kulu ba inao ki, ma ku seemabe uria tha God, ’uria lau boo ni kamulua sui boo itaraena:

⁴ Ma nau ku tona ilamatai nia Tala eri ka fula ana thauwane la, ku kania wane ki ma kini ki lau boo, ku faleda keka aluda i la lokafu ki.

⁵ ’Uria lau boo aofia ni foa kai faaroṉo kamulua asi do nia thaitoomana suli nau, ma aini ulunao ki sui bana: toa na kera falea leta ki isaku kwa falea isana baree wai doorana, ma nau ku lae uri Damasikasi, fasi kwa tolea tai toa nai kula eri uri Jerusalema fafia nailii thalo ki, fasi keki faamanatai kera.

⁶ Ma lalae mai, si maṉa nau ku ni sula tale, ku ni karaṉia Damasikasi, fuliṉana initoona thato, lalaa la baita ita mai i thalo ka fula fatonaku, ka laa kakali nau.

⁷ Ma nau ku asi nau i theegano, ku roṉoa liṉana si ṉata la ne una eri isaku, Solo, Solo, uria ta noki tona ilamatai nau?

⁸ Ma nau ku luua, Oe ni tei, Lord? Ma nia soree isaku, Nau tha Jesus, Wane i Nasaretha, noki tona ilamatai nau.

⁹ Ma wane eki na kera lae bi nau kera rikia boo lalaa la eri, ma keka aanu, sui kesi roṉoa ṉata lana Wane eri ne ṉata mai isaku.

¹⁰ Ma nau ku sorea, Si ta na kwai ilia, Lord? Ma ṉa Lord ka soree isaku, Oki tatae, oki lae uri Damasikasi: ma kula eri naa, keki bii faaroṉo oe asi do ki sui bana na kera alua maakwali oe oki ilia.

¹¹ Ma si maṉa nau kwasi rikia fanua uria inotoa lalaa la eri, toa na kera lae bi nau keka rau i abaku, keka talai nau, ku fula i Damasikasi.

¹² Ma tee nonii wane thatana tha Ananiasi, ne faabaita tha God sulia ṉa lo, na Ju nai kula eri ki sui bana kera ṉata lea suli nia,

¹³ Ka lae mai isaku, ka takwe ma ka soree isaku, Solo, doora ae, oki lio. Ma si kadee thato eri boo nau ku lio alaa ku riki nia.

¹⁴ Ma nia sorea, Na God maka kulu ba inao ki e fili oe oki thaitoomana si do nia thathamia, ma oki riki nia ne Kokoto, oki roṉoa liṉana si ṉata la ana fokona.

¹⁵ Sulaania oe ṉa wane oki faamamanea si do no rikia mo roṉoa ifana isana toa na fanua.

¹⁶ Ma uria ta nosi lakwasia si maṉa eri? oki tatae, keki babataesi oe, oki taua ruruumu, abula taa la oe ki kai ei naa, oki ’ai ana thatana ṉa Lord.

¹⁷ Ma lalae mai, buriana na nau ku oli lau uri Jerusalema, si maṉa ku foa i la biu baita tha God, bubunota la e fulatooku,

¹⁸ Ma nau ku riki nia ne soree isaku, Oki lakwasia, oki lae fofoa faisia i Jerusalema: sulaania kesi roṉoa bae lamu si maṉa oki faamamanea si do no thaitoomana suli nau.

¹⁹ Ma nau ku sorea, Lord, kera tala thaitoomana ni nau ku fono faisia toa na kilu fitoomu ma ku kwakwaeda i la biu ni ofu la ki ta si kula si ei:

²⁰ Ma si maṉa na kera thauṉia tha Sitifini, wane ba ne faamamanea si do ne thaitoomana suli oe, abuna e igwa, nau ku takwe lau boo isada, ku ala fafia mae lana, ma ku beta sulia tooni wane eki na kera thauṉi nia.

²¹ Ma nia soree isaku, Oki lae: uria ni nau kwai arasi oe oki lae da faisia si kula eri uria Jenetaele ki.

²² Ma kera roṉo nia e fula asi baea eri; sui keka ’ai faamau, keka sorea, Muka thauṉia wane una eri ka aana faisia fanua nei iano: uria ne ai si kokoto nia kai maruki.

²³ Ma si maṉa na keka ’ai faamau, keka naṉa ana tooni kera ki, keka u ana gegeona theegano ia,

²⁴ Wane ne inoto ana omea e sorea keki tole nia uri la biu wane ana firua ki, ka sorea keki kwae tataria ana suila, fasi keki suuwai nia kai faaroṉoda, keki thaitoomana si do ne adea na toa eki keka ’ai faamau una eri, keka lalakwatania.

²⁵ Ma si maṉa na kera kani nia asi uṉee do, tha Polo ka soree isana senitiurione ne takwe isada, Si do kera alamatania muki kwae una eri ana wane i Roma, si maṉa na kesi sorea kwae lana totonao?

²⁶ Ma si maṉa na senitiurione eri e roṉoa, nia lae isana wane inoto eri, ka faaroṉo nia ania, ka una eri, Oki ade ufita neri? uria wane nai na wane i Roma.

²⁷ Ma wane inoto eri ka lae mai, ka soree isana, Oki faaroṉo nau mai, o wane i Roma? Ma nia sorea, Iu.

²⁸ Ma wane eri ka luua, Ana malefo baita ku usia ana thata eri. Ma tha Polo ka sorea, Ni nau molo, ku futa mania.

²⁹ Mania wane eki na karaṉia sa keki kwae nia fasi keka soetoona asi do ki, keka lae faisi nia si maṉa eri u boo: ma wane inoto eri ka mau lau boo, buriana ne thaitoomana nia wane i Roma, ma uria ne kani nia.

³⁰ Ma sui afa boṉi iburiana, uria ne thathamii thaitoomana filoa maalutana si do Ju ki kera alaṉi nia ania e lubea, ka soree isana wane inoto ni foa ki ma ofu la eri sui bana keki ofu mai, sui ka talaia tha Polo kai sifo, ka alua ka takwe inaofada.