Si do Aposela ki kera ilidaki 21 - Ṉa Alaofua Falu 1923 1949

¹ Ma lalae mai buriana na mili akwasia toa eki, ma mili lae i la faka, mili lae kokoto uri Kosi, ma afa boṉi iburiana mili fula i Rodesi, ma mili akwasia kula eri, lae mili fula i Patara:

² Ma si maṉa na mili fulatoona tee faka na karaṉia kai faifolo uria Fenisia, mili tae i la faka eri, mili lae.

³ Ma lalae mili rikia i Saeporasi e maṉo, mika akwasia fanua eri ana aba mauli, mika lae uri Siria, ma mika sifo i Taera: uria na keki sifolaṉai nia do nai la faka eki i fanua eri.

⁴ Ma mili fulatoona toa eki na tha Jesus e toleda, mili makafa to iei sulia fiu fa boṉi: ma toa eki kera lufia tha Polo atha Spirit, e ai si uri si theegano i Jerusalema.

⁵ Ma toto fa boṉi eki e sui, mili lae faisida, mika lae lau bamilia; ma kera sui, bia kwaida ma wela kera ki, keka adomi kamilia ana lae lamilia kau, ka fula asi kula na mili kotho faisia toaa susu eri: ma mili boururu sula one, mika foa.

⁶ Ma buriana na mili alulu kwailiu ani kamilia, ni kamilia mika tae i la faka, ma toa eki keka oli nada.

⁷ Ma mika akwasia i Taera, mika lae i la amali, mika fula i Tolemaisi; ma mika aratai lea la ana baree wai doorana, mika to bida sulia tee fa boṉi.

⁸ Ma afa boṉi iburiana kamilia tha Polo mika lae, mika fula i Sesaria: ma mika kotho i maafera tha Filifi, wane ni ṉata la sulia si faaroṉoa lea, ne wane ana fiu nonii wane ba ki, mika to bi nia.

⁹ Ma wane eri ana fai thari, na kera ṉata mala porofeta.

¹⁰ Ma si maṉa na mili to sulia fa boṉi oro ki i kula eri, tee porofeta, thatana tha Agabasi, ka sifo mai i Judia.

¹¹ Ma nia ka fula isamilia, ka ṉalia si do na tha Polo e ali nia ania, ka kani fafia ro ae nia ki ma ro aba nia ki i talaana, ma ka sorea, Tha Spirit Abu ka sorea, Ju nai Jerusalema ki keki kani una eri ana wane ne ana ana do ni ali lana ana imole nania, ma keki fale nia i abana Jenetaele ki.

¹² Ma si maṉa na mili roṉoa si do eki, ni kamilia ma toa ana fanua eri lau boo mika ṉata kwaitakoi isana sa kai to faisia tae la uri Jerusalema.

¹³ Sui tha Polo e luu kamilia, Ta na muki ilia, na muki aṉi ma muki adea lioku kai dila faamau? sulaania nau ku fifarao talitoona fasi keki kani fafi nau e ai, fasi kwai mae lau boo i Jerusalema uria thatana tha Lord Jesus.

¹⁴ Ma si maṉa ne ai si alamatai kamilia mika bulasia ruruuna, mili to faisia, mili una eri, Keki ilia si do na ṉa Lord e thathamia.

¹⁵ Ma buriana fa boṉi eki mili ṉalia do kamilia ki, mika tae uri Jerusalema.

¹⁶ Ma tei toa ana toa nai Sesaria na tha Jesus e toleda kera lae lau boo bi kamilia, keka talaia tee nonii wane, thatana tha Masono, wane i Saeporasi na tha Jesus e tole nia u mai inao, wane na miki to i biu nia.

¹⁷ Ma lalae mili fula i Jerusalema, baree wai doorana keka thathagoni kamilia mai ana seethathala la.

¹⁸ Ma afa boṉi iburiana tha Polo e kotho bi kamilia isatha Jemesi: ma ulunao eki sui boo kera to lau boo isana.

¹⁹ Ma buriana ne aratai lea la ani kera, nia uunu sulia si do eki na tha God e ilia i maalutana Jenetaele ki asi ra nia, ta do sui ta do asi do eki sui boo.

²⁰ Ma ni kera, si maṉa na kilu roṉoa, kiku faainotoa ṉa Lord; ma kiku soree isana, O rikia, doora, fita tooni nonii wane ana Ju ki kera fitoo naa; ma kera sui kera seemabe uria ṉa lo:

²¹ Ma kera faaroṉoda ani oe, no to’oa isana Ju eki sui boo nai maalutana Jenetaele ki keki akele faisia tha Mosesi, o lufida kesi kwai kakali ana wela kera ki, ma kesi abula sulia biraṉakulua u boo.

²² Mania oki ade ufita? e ai si ei malului wane keki ofu bomai, uria na keki roṉoa no fula mai.

²³ Mania oki ilia si do na miki soree isamu: Amilia fai nonii wane na kera othia ta si do;

²⁴ Oki talaia wane eki, oki faafalu oe bi kera, ma oki usia do ni foa la kera ki ifada, fasi keki sufia gwauda: sui toa na fanua keki thaitoomana e ai ta do si mamana asi do eki na kera faaroṉo kera ania suli oe; keki thaitoomana ni oe o abula kokoto lau boo, o roo sulia ṉa lo.

²⁵ Ma sulia Jenetaele ki na kera fitoo, mili kekeda kau na ba, mili sorea si do na mili manatatoona, na kesi roo sulia si do una eki, talitoona boo keki beta suli kera faisia do ni foa la na kera faledaki ana god eeta ki, ma faisia abuna do ki, ma faisia seena do kera lioa ki, ma faisia oe la.

²⁶ Sui tha Polo e talaia wane eki, ma afa boṉi iburiana nia kai faafalu nia ofu bi kera, ka kotho i la biu baita tha God, fasi kai fatai nia na fa boṉi eki ana faafalu lada e sui, maakwalia si maṉa na keki falea do ni foa la eri fani kera sui boo, ta wane iada si ei.

²⁷ Ma si maṉa na fiu fa boṉi eki karaṉia ka sui, Ju na kera toto i Asia na kera lae mai, keka riki nia i la biu baita tha God, keka faasu rake ana malului wane eri sui boo, keka aba nia,

²⁸ Keka ’ai faamau, keka una eri, Wane Isirela ki, muki kwaiadomi: Wane eri nania, ne to’oa isana toa na fanua, ta si kula si ei, keki fare faekwa ana toa nai, ma ṉa lo, ma si kula eri: ma sui lau boo nia talaia toa i Girisi ki uri la biu baita tha God, me faasua kula ne abu nania.

²⁹ Uria na kera rikia u i dini tha Tofimasi, wane ba i Efesasi, bi nia i la toaa susu, ma kera soso na tha Polo e talai nia uri la biu baita eri.

³⁰ Ma kera faaseesula ana toaa susu eri sui bana, ma toa eki keki fita mai, keki ofu: ma kera rau atha Polo, keka aba i maa faisia biu baita tha God: ma si maṉa eri u boo keka fonoa maana olofolo ki.

³¹ Ma si maṉa na toa eki keka rofe uria si ade la na keki ilia fasi keki thauṉi nia, kera tae, keka faaroṉoa wane inoto ne tatha inaona omea eri, na toa nai Jerusalema sui bana keka ṉaluṉalu.

³² Ma si maṉa eri u boo nia talaia wane ana firua ki ma senitiurione ki, ka fita, ka sifo mai isada: ma ni kera, si maṉa na kera rikia wane inoto eri ma wane ana firua eki, keka to faisia kwae la na kera kwakwae atha Polo.

³³ Sui wane inoto eri ka idu karaṉia, ka rau ani nia, ka sorea keki kania ana ro nailii thalo ki; ma ka soetoona, Tei nena, ma si ta ne ilia?

³⁴ Ma tai toa ana malului wane eri keka ’ai, keka sorea tai si do, ma tai toa lau keka ’ai, keka sorea tai si do eeta lau: ma si maṉa ne afetai sa nia kai thaitoomana filoa maalutana sulia ṉalu la eri, nia sorea keki tole nia uri biu toa ana firua ki.

³⁵ Ma si maṉa ne fula ana lalaefa eri, kera adea na wane ana firua ki keki ṉali nia, uria toa oro na kera bebesi nia faamau;

³⁶ Sulaania baita lana malului wane eri keka lae iburiana, keka ’ai faamau, keka una eri, Muka thauṉia.

³⁷ Ma si maṉa karaṉia sa keki tolea tha Polo uri la biu eri ana wane ana firua ki, nia soree isana wane inoto eri, Oki alamatai nau kwai sorea ta si do isamu? Ma nia sorea, O thaitoomana ṉata lana toa i Girisi?

³⁸ Sui o wane ba i Ijifita e ai nania, wane ne faasurake ana fai tooni wane ni thauwane ba ki dini mai inao keki firu bia toa i Roma na ba, me talaida uri la fanua kwasi?

³⁹ Ma tha Polo ka sorea, Nau ṉa Ju, wane i Tasasi i Silisia, ana toaa susu ne inoto: ma nau ku ṉata kwaitakoi, ku soree isamu, oki alamatai nau kwai ṉata isana toa eki.

⁴⁰ Ma si maṉa ne alamatania, tha Polo ka takwe ana lalaefa, ka faabona toa eki ana abana; ma si maṉa kera to aroro, nia ṉata isada ana ṉata lana Hibaru ki, ka una eri,