Si do Aposela ki kera ilidaki 20 - Ṉa Alaofua Falu 1923 1949

¹ Ma buriana na ṉataṉata eri e sui, tha Polo e kwaiarasi uria toa na tha Jesus e toledaki, ma ka alulu iada, sui ka lae faisida fasi kai lae uri Masedonia.

² Ma buriana ne liufia fanua eki, me kwaifamanatai faamau isada, nia bii fula i Girisi.

³ Ma nia to i fanua eri sulia ulu madami. Ma uria na Ju ki kera oloa omea uri nia, si maṉa karaṉia sa kai lae i la faka uri Siria, manatana na nia kai tatha i Masedonia fasi kai oli kau.

⁴ Ma tei wane kera lae bi nia uri Asia, tha Sopata, wane i Berea; ma ana toa nai Thesalonika, tha Arisitakasi ma tha Sikadasi; ma tha Gaiasi, wane i Debe, ma tha Timothiasi; ma ro wane i Asia, tha Tikikasi ma tha Tofimasi.

⁵ Toa eki kera lae totonao, keka maakwali kamilia i Toroasi.

⁶ Ma mili lae i la faka faisia Filifae buriana fa boṉi eki ana berede e ai ta lefena iei, mili lae sulia lima fa boṉi, mika fula isada i Toroasi; ma mili to iei sulia fiu fa boṉi.

⁷ Ma afa boṉi totonao ana uiki, si maṉa na toa na tha Jesus e toleda kera figu mai fasi keki nia berede, tha Polo e kwaifamanatai isada, manatana na nia kai lae afa boṉi iburiana; ma nia ṉa ṉata ka initoona rodo naa.

⁸ Ma laeta oro ki ni ana kadee biu laṉi eri, na kera figu mai iei.

⁹ Ma tee wane bii baita, thatana tha Iutikasi, ka ono i maana olofolo, maane fafokulu asia boo, ka biṉa liu; ma si maṉa na tha Polo e kwaifamanatai ka tau u, si biṉa eri e faasifo nia iano faisia biu ne to susui mai ia ana ulu biu eki, ma kera tafoa e mae naa.

¹⁰ Ma tha Polo e sifo, ka asi nia i fafona, ma ka ofia, sui ka sorea, Musi aṉisia; uria na maṉona ni ani nia.

¹¹ Me tae lau, ma ka nia berede eri, ka ania, ma ka ṉaṉata bida fanua ka dani, sui ka lae.

¹² Ma kera talaia mai wela wane eri ne maruki, ma si do eri ka faainamaruki kera faamau.

¹³ Ma ni kamilia mili lae inao uri la faka, mika lae uri Asoso, manatamilia na miki ṉalia tha Polo iei: uria si do ne sorea neri, manatana na nia kai lae tala i tolo.

¹⁴ Ma si maṉa ne toda iamilia i Asoso, mili ṉalia, lae mika fula i Mitilene.

¹⁵ Ma mili lae i la faka faisia si kula eri, ma afa boṉi iburiana mili fula otofana Kiosi; ma afa boṉi iburiana mili olo i Samosi, ma mili to i Togiliama; ma afa boṉi iburiana mili fula i Miletasi.

¹⁶ Sulaania manatana tha Polo na nia kai tatha ana faka faisia i Efesasi, fasi e ai kesi suuwai nia kai to suka tau i Asia; uria ne lae lakwalakwa, sa mado e ai nia kai fula i Jerusalema ana Taṉafula‐limana‐tafulu fa boṉi eri.

¹⁷ Ma nia to i Miletasi ka kwaiarasi uri Efesasi, ka ailia mai ulunao ki ana figua eri isana.

¹⁸ Ma lalae kera fula isana, nia soree isada, Ni kamulua mulu tala thaitoomana, ita mai afa boṉi totonao na nau ku uri si theegano i Asia na ba, to la na nau ku toto ofu ania bi kamulua ta fa boṉi si ei,

¹⁹ Na nau ku ra ifana ṉa Lord asi lio ana abula seseka la, ma ana kafona maaku ne oro, ma ana ilitooa ba ki na kera ilitooku ania ana omea ba Ju ki kera oloa uri nau:

²⁰ Ma nau e ai kwasi mau ana faaroṉo lamulua la asi do ki sui boo ne kwaiadomi, ma ana kwaifamanatai la isamulua ana ofu la ki, ma i maafera kamulua ki ta maafera si ei,

²¹ Ku faamamanea isana Ju ki ma toa i Girisi lau boo si do nau ku thaitoomana sulia manata akele la uria tha God, ma fitooa uria Lord kulu tha Jesus Christ.

²² Ma rikia fasi, si maṉa eri kera suuwai nia spirit nau kwai lae, e ai si ei boo, uri Jerusalema, ma kwasi thaitoomana si do na kai fulatooku iei:

²³ Talitoona si do eri, tha Spirit Abu ka faamamanea si do ne thaitoomana isaku i la toaa susu ki sui bana, ka ṉata sulia nailii thalo ki ma to la ana taa la ki na kai maakwali nau.

²⁴ Ma nau ku doanita asi do eki sui boo, ma kwasi ogoni ana maṉoku, ’uria si do nau ku liothau ania, fasi kwai fita lea ana fita la nau, ma kwai ilia si ra eri na nau ku ṉalia atha Lord Jesus, faamamane lana si do nau ku thaitoomana sulia si faaroṉoa lea ana lea la tha God.

²⁵ Ma rikia fasi, si maṉa eri ku thaitoomana ni kamulua sui boo, toa na nau ku liliu i maalutamulua, ku ṉata sulia tooa tha God, e ai musi rikia lau maaku.

²⁶ Mania itaraena nau ku faamamanea si do nau ku thaitoomana neri, na nau ku ai ania abuna wane ki sui boo.

²⁷ Sulaania e ai kwasi mau ana faaroṉo lamulua la sulia si do eki sui bana na tha God e manataia.

²⁸ Mania muki beta suli kamulua, ma sulia aini sifi eki sui boo, na tha Spirit Abu e alu kamulua muka nanao ania, muki tharea figua tha God, ne usia ana abuna i talaana.

²⁹ Uria nau ku thaitoomana si kula eri, buriana na nau ku lae naa koito kwasi ki ne aala keki kotho i maalutamulua, ma kesi suusia taa la faisia aini sifi ki;

³⁰ Ma faisia i maalutamulua tei wane keki tae mai, keki ṉata garo, sa keki bulasi garo ana toa na tha Jesus e toleda keki lae iburiada.

³¹ Mania muki tharai, muki onotoona na sulia ulu fa ṉali nau ku fafaamanatai kamulua sui, ta si maṉa si ei, afa rodo mafa thato ana kafona maaku.

³² Ma sui si maṉa eri, doora kera, ku takofale kamulua atha God, ma asi baea ana lea la nia, ne sukwai fasi kai faasukwai kamulua, ma kai falea si do eri na muki fulatoona i maalutana toa eki sui boo na kera faaabuda.

³³ Nau e ai kwasi thathamia silifa ta wane, mado goloda nia, mado si maku nia.

³⁴ Iu, ni kamulua muki thaitoomana ni nau ku ra ana ro aba nau ki nania ana fale lana si do mili rofedaki, nau bia toa na kera lae bi nau.

³⁵ Asi do ki sui bana abula laku e dodoloa, fasi muki lio sulia, muki thaitoomana e kokoto na muki ulafu una eri, muki rausualia toa na kera feda ki, ma muki onotoona bae lana tha Lord Jesus, na talani nia e sorea, Imole na kai faledo, kai lea iana ka tatha ana imole na kai ṉalia.

³⁶ Ma buriana ne ṉata una eri e sui, nia boururu, ka foa bia toa eki sui boo.

³⁷ Ma kera sui kera aṉi faamau, keka kalilua atha Polo, keka nonoia,

³⁸ Kera liodila ka tatha uria si baea eri ne sorea, ne ai kesi rikia lau maana. Ma keka adomi nia ana lae lana kau uria faka eri.