Si do Aposela ki kera ilidaki 2 - Ṉa Alaofua Falu 1923 1949

¹ Ma Taṉafula‐limana‐tafulu fa boṉi eri lalae e fula naa, kera sui kera ofu mai ana tee si kula.

² Ma alifeo la ita mai i thalo, ’uria kuru lana thauthau sukwai na kai tatha fofoa, ka fula fatonada, ka fuṉu ana biu eri sui bana na kera ono iei.

³ Ma mee do ki ’uria mee kwethu ka fula fatai isada, ka toli fafida, ma ka to fafida, ta imole si ei boo.

⁴ Ma kera faafuṉua toa eki sui boo atha Spirit Abu, keka bii ṉata asi ṉata la eeta ki, sulia si ṉata na tha Spirit e faaṉata kera ania.

⁵ Ma Ju ki na kera faa baita tha God, na kera ofu mai faisia i maalutana kulee toa ni sui bana, kera ni Jerusalema.

⁶ Ma si maṉa na kera roṉoa si do eri, malului wane eri kera ofu mai, keka kwaikonai ania, uria ni kera sui kera roṉoda keka ṉata ana ṉata lada i talaada, ta ṉata la si si boo.

⁷ Ma kera sui kera tona, keka kwele, keka una eri kwailiu isada, Rikia fasi, toa nai na kera ṉata, ta na sa ni kera toa i Galili sui boo, mado?

⁸ Sui nifana ade lana kulu sui kuka roṉoa ṉata lakulua i talaakulua, ṉata la ana fanua na kera thare kulu ki mai iei?

⁹ Toa ana Pathia ma Mede ki ma Elamite ki, ma toa na kera to i Mesopotemia, i Judia ma i Kapadosia, i Podasi ma i Asia,

¹⁰ I Firitia ma i Pamofilia, i Ijifita ma asi kula ana Libia na ni kakalia i Saerini, ma wane kwaita ki ita mai i Roma, Ju ki bia Jenetaele ki na kera ade mala Ju,

¹¹ Toa i Kirita ma toa i Arebia, kulu roṉoda kera ṉata ana ṉata lakulua ki su lia si ra sukwai tha God ki.

¹² Ma kera sui kera tona ada, manatade nai rua, keka una eri kwailiu isada, Si ade la ufita neri?

¹³ Ma tei toa lau kera aefara, keka una eri, Wane nei ki kera fuṉu ana waene falu.

¹⁴ Ma tha Pita ka takwe ia bia akwala ma tee nonii wane ba ki, ka bae baita, ka ṉata urida, ka una eri, Kamulua wane i Judia ki, ma kamulua toa nai Jerusalema ki sui boo, muki thaitoomana si do eri, ma muki fafuroṉo fasi uria ṉata laku.

¹⁵ Sulaania toa nai ki e ai kesi kuu fasi ka bula kera, ’uria si do na manatamulua e sorea; uria na ula kadee thato u bana nania;

¹⁶ Si do na kera ṉata sulia na ba atha Joele ṉa porofeta;

¹⁷ Ma si do na kai fula mai afa boṉi iisi ki, tha God e sorea, Nau kwai kikia ta si ana Spirit nau fafia imole ki sui bana: Ma kaluwane kamulua ki ma thari kamulua ki keki ṉata mala porofeta, Ma wane bii baita kamulua ki keki rikia si na kera fatai lalaa ania, Ma arai kamulua ki keki moosubolea si moosubolea ki:

¹⁸ Ma fafia wane ni ra nau ki ma thari ni ra nau ki afa boṉi eki Kwai kikia ta si ana Spirit nau; ma keki ṉata mala porofeta.

¹⁹ Ma nau kwai fatai nia do ni kwele la ania ki i thalo lo, Ma bala si do ki ana fanua nei iano; Si abu, bia si era, bia si datha:

²⁰ Ṉa thato kai lioe maerodo, Ma ṉa madami kai lioe abu, Sui fa boṉi tha Lord kai bii fula iburiana, Fa boṉi baita inoto eri:

²¹ Ma toto ni tei bana na kai ’ai ana thatana tha Lord, keki faamaruki nia.

²² Kamulua wane Isirela ki, muki roṉoa si baea eri: Tha Jesus, Wane i Nasaretha, Wane na tha God e ala fafia inaofamulua asi ra baita ki ma do ni kwele la ania ki ma bala si do ki, na tha God e ilia ana abana i maalutamulua, ’uria si do na mulu tala thaitoomana;

²³ Wane eri na kera alamatania sulia si do manatana tha God e thathamii ilia ma si do ne thaitoomana totonao, ni kamulua mulu raua, ma ana abana wane na kera ilia si do kera lufia mulu fota fafia ana ’ai rarafolo ma mulu thauṉia:

²⁴ Wane na tha God e tataea, buriana ne luke nia faisia fiwela la ana maea: uria ne afetai ka tatha sa do eri kai rau ṉado ani nia.

²⁵ Sulaania tha Defeta e sorea suli nia, Ku rikia ṉado tha Lord inaofana maaku; Uria nia to ana aba aola nau, fasi e ai kesi idu nau:

²⁶ Mania ruruuku e thalume, ma meaku e ṉata sulia seethathala la; Ma sui lau boo seeku kai to maakwalia si do nau ku manatatoo ṉado uria:

²⁷ Sulaania soki akwasia anoku i fanua toa mae ki e ai, Ma soki alamatania Wane Abu oe kai to fasi kai fufuraa ka ai lau boo.

²⁸ O faaroṉo nau ana tala ana marukia ki; Toto oki faafuṉu nau ana seethathala la ana maamu.

²⁹ Doora kera, kera alamatai nau kwai seeraa ana sore lana si do eri sulia maka kulu ba inao na tha Defeta, ne mae naa ma kera alua, ma kwaiṉeia eri ni isakulua ka fula afa boṉi eri.

³⁰ Mania uria ne porofeta, me thaitoomana na tha God e othi isana, ka sorea na nia toto kai alua Christ ba, Wane ana kwalafana, kai ono ana do ni ono la nia ana inotoa;

³¹ E rikia si do eri si maṉa ne ai si fula u, ma ka ṉata sulia tatae lana Christ, na kesi akwasia anona i fanua toa mae ki, ma seena si to fasi kai fufuraa.

³² Jesus eri boo tha God e tataea, si do ni kamilia sui mika faamamanea si do mili thaitoomana sulia.

³³ Mania uria na kera faainoto nia ana aba aola tha God, ma uria ne ṉalia ana ṉa Maka alaṉaia eri na tha Spirit Abu, nia e kikia si do eri, na mulu rikia ma muka roṉoa.

³⁴ Sulaania tha Defeta e ai si tae uri thalo lo ki: ma ni nia e sorea, Tha Lord e soree isana Lord nau, Oki ono ibali aba aola nau,

³⁵ Maasia si maṉa na nau kwai alua maalimae oe ki do ana alu lana aaemu fafoda.

³⁶ Mania kwalafa tha Isirela ni sui bana keki thaitoomana mamana si kula eri neri, tha God e alua Jesus eri boo na mulu fota fafi nia ana ’ai rarafolo, kai Lord ma Christ.

³⁷ Sui si maṉa na kera roṉoa, e fi ’uria sa kera thaukwadaṉia ruruuda, ma keka soree isatha Pita ma toa na kera aposela bi nia, Doora kera, si ta na miki ilia?

³⁸ Ma tha Pita e soree isada, Muki akeletania manatamulua, ma keki babataesi kamulua, ta wane iamulua si ei, ana thatana tha Jesus Christ uria doanita la ana abula taa la kamulua ki; ma muki bii ṉalia si do na kera tona falea na tha Spirit Abu.

³⁹ Sulaania alaṉaia eri na do ifamulua, ma ifana wela kamulua ki, ma ifana toa ni sui bana na kera ni da, toa eri sui boo na tha Lord na God kulu kai ailia mai.

⁴⁰ Ma asi baea oro e faamamanea lau boo si do ne thaitoomana, ma ka faamanatai kera, ka una eri, Muki faamaruki kamulua faisia unii wane nai ne abula kekeo.

⁴¹ Sui toa na kera faamamanea bae lana ana seethathala la, kera babataesida: ma afa boṉi eri kera safua figua eri ana fuliṉana ulu tooni imole ki.

⁴² Ma kera seemabe ṉado uria roṉo lana kwaifamanatai lana aposela ki ma ana kwaimani lea la bida, ana ni lana berede eri ma ana foa la eki.

⁴³ Ma mau la e to fafia imole ki sui bana: ma aposela ki keka ilia do oro ni kwele la ania ma bala si do ki.

⁴⁴ Ma toa eki sui boo na kera fitoo kera to ofu, ma si do kera ki si do i ofuane ki bana;

⁴⁵ Ma kera usi asi do na kera rikidaki ma si do kera ki, keka toliṉia faisia toa eki sui boo, sulaania rofe la na atona bana ta wane ka rofe ania.

⁴⁶ Ma sulia boṉi kera seemabe ana figu la ana tee si lio i la biu baita tha God, keka nia berede i maafera kera ki, keka ania faṉa kera ana seethathala la ma ana tee si lio i ruruuda,

⁴⁷ Keka taṉoa tha God, ma toa eki sui bana kera ala fafida. Ma tha Lord e safua figua eri sulia boṉi ana toa na kera faamarukida mai.