Si do Aposela ki kera ilidaki 18 - Ṉa Alaofua Falu 1923 1949

¹ Buriana si do eki tha Polo e akwasia i Athenesi, ka fula i Korinitha.

² Ma nia fulatoona tee Ju, thatana tha Akwila, wane i Podasi, ne toto i Itali ma ka bii fula, bia kwaina ni Pirisila, uria na tha Kilodiasi e soree isana Ju ki sui boo keki lae faisia Roma: ma nia e lae isadaroa;

³ Ma sulaania ra nia e ’uria lau boo ra keroa, nia to bidaroa, ma kera ra ofu; sulaania kera ra ana thauwai lana maku ana ooba ki.

⁴ Ma nia kwaifamanatai la biu ni ofu la afa boṉi mamaloa ki, ta fa boṉi si ei, ka thathamii bulasia ruruuna Ju ki ma toa i Girisi ki.

⁵ Ma sui buriana na tha Saelasi ma tha Timothiasi kero sifo mai i Masedonia, si baea eri ka suuwai nia tha Polo, ka faamamanea isana Ju ki si do ne thaitoomana sulia tha Jesus, na nia ṉa Christ.

⁶ Ma si maṉa na kilu ṉata ni firua bi nia, ma kiku faretoliṉia si baea eri, nia tagaraṉai nia tooni nia, ma ka soree isada, Abumulua ki kai tala to u boo ani kamulua; nau ku falu faisia: ita asi maṉa eri kai oli alaa nau kwai lae isana Jenetaele ki.

⁷ Ma nia lae faisida, ka kotho i biu tee nonii wane thatana tha Jasitasi, wane ne faabaita tha God, na biu nia ni karaṉia biu ni ofu la eri.

⁸ Ma tha Kirisipasi, wane gwauwai ana biu ni ofu la eri, ka fitoona ṉa Lord bia toa eki sui boo nai maafera nia; ma toa oro ana toa i Korinitha kera roṉoa, keka fitoo, ma kera babataesida.

⁹ Ma ṉa Lord ka soree isatha Polo afa rodo ana si na kera fatai lalaa ania, Osi mamau, oki ṉata, me ai osi bona:

¹⁰ Uria ni nau kwai to bi oe, me ai ta wane si alasi oe uria thauṉi lamu la: sulaania toa oro ni isaku ana toaa susu nai.

¹¹ Ma nia to iei sulia tee fa ṉali ma ono madami, ka to’oa bae lana tha God i maalutada.

¹² Ma si maṉa na toa i Roma kera alua tha Galio kai inoto ana Akaia, Ju ki kera tae ana tee si lio, keka firu bia tha Polo, keka talaia inaona do ni ono la wane ni kotu eri,

¹³ Keka una eri, Wane nai ka bulasia ruruuna wane ki keki faabaita tha God ana foa la ne ai si totoo bia ṉa lo.

¹⁴ Ma sui si maṉa na tha Polo sa ka ifinia fokona, tha Galio ka soree isana Ju ki, Kamulua Ju ki, mada sa si do sulia abula taa la neri mado abula dodora la ne taa, manataku ne kokoto nau kwa doanita iamulua:

¹⁵ Ma mada sa oli susuu la sulia si baea ki ma thata ki ma lo kamulua i talaamulua, mamana lana ni kamulua; nau ku lalakwee kotu sulia si do eki.

¹⁶ Ma nia tarida faisia do ni ono la eri.

¹⁷ Ma wane i Girisi ki sui boo keka aba tha Sothenisi, wane gwauwai ana biu ni ofu la, keka kwae nia inaona do ni ono la eri. Ma tha Galio e ai si oga nia boo uria ta si do asi do eki.

¹⁸ Ma tha Polo ka to u sulia fa boṉi oro ki buriana si maṉa eri, sui ka alulu ania baree wai doorana, ka lae i la faka faisia si kula eri uri Siria, ma ni Pirisila ma tha Akwila kero lae bi nia; buriana ne sufia gwauna i Keṉakiria: uria ne othia ta si do.

¹⁹ Ma nia fula i Efesasi, me akwasidaroa keko to iei: ma ni nia ka kotho i la biu ni ofu la, ka kwaifamanatai isana Ju ki.

²⁰ Ma si maṉa na kera thathamia sa nia kai to ka suka tau bida, nia e ai si ala fafia;

²¹ Ka alulu anida, ka una eri, Nau kwai faaabua, e ai si ei boo, fafaṉa eri ne kwaikaraṉi naa i Jerusalema: ma sui kwai oli lau mai isamulua, mada sa tha God e thathamia. Sui ka lae i la faka faisia Efesasi.

²² Ma lalae sifo i Sesaria, nia tae ka aratai lea la ana figua eri, sui ka sifo uri Adioko.

²³ Ma buriana ne makafa to i kula eri, nia lae, ka tatha ana fanua i Galesia ma Firitia alafana tatha la ne tatatha ania na ba, ka faaṉadoa toa eki sui boo na tha Jesus e toleda.

²⁴ Ma tee Ju, thatana tha Apolosi, wane i Alikisadaria, ne thaitoomana lea ana ṉata la, me sukwai ana kekeda la abu eki, ka fula i Efesasi.

²⁵ Wane eri kera toto’oa si do sulia tala ṉa Lord ki isana; ma uria na spirit nia e ’uria kafo ne lugaluga, nia aṉasi ana ṉata la ma kwaifamanatai la asi do sulia ṉa Lord ki, si maṉa ne thaitoomana talitoona bana babataesi la tha Jone:

²⁶ Ma nia bii ṉata seeraa i la biu ni ofu la. Sui si maṉa ni Pirisila ma tha Akwila kero roṉo nia, keko talaia isadaroa, ma keko fatai nia tala tha God isana kai thaitoomana filoa.

²⁷ Ma si maṉa manatana na nia kai lae tatha uri Akaia, ṉa baree wai doorana kera keda kau isana toa na tha Jesus e toleda keki thathagoni nia isada: ma lalae e fula naa, nia adomia faamau toa eki na kera fitoo sui naa sulia lea la.

²⁸ Sulaania nia e olitei nia ṉata lana Ju ki ana sukwaia, me ili lalaa ania, ka fatai nia ana kekeda la abu eki na tha Jesus na ṉa Christ.