Si do Aposela ki kera ilidaki 17 - Ṉa Alaofua Falu 1923 1949

¹ Sui buriana na kera tatha i Amafipolisi ma i Apolonia, keka fula i Thesalonika, si kula na tee bin ni ofu la Ju ki e ni iei:

² Ma tha Polo, si ade la nia na kai ililia ṉado neri, ka kotho isada, ma ulu fa boṉi mamaloa ki ka kwaifamanatai ana kekeda la abu ba ki isada,

³ Ka fatai nia maalutana ma ka sorea, na ṉa Christ e to’oa boo fasi kai to ana taa la, ma kai tatae lau faisia toa mae ki. Ma tha Jesus, Wane eri na nau ku faaroṉo kamulua ania (ṉata lana neri) na ṉa Christ.

⁴ Ma tei toa iada kera ala fafia ṉata lana, keka abetai nia tha Polo ma tha Saelasi; ma malului wane ana toa i Girisi na kera faabaita tha God ki, ma toa oro ana kini inoto ki.

⁵ Ma sui Ju na kesi fitoo ki, uria na uga la e fa’ara kera, keka ofua tei wane taa ana maalutana wane ki isada, keka ailia mai ofu la baita, keka faaseesula i la toaa susu eri; keka alasia biu tha Jasono, manatada sa keki abadaroa mai isana toa eki.

⁶ Ma si maṉa na kesi fulatoodaroa, keka aba tha Jasono ma tei toa ana baree wai doorana, keka aluda inaofana wane gwauwai ki ana toaa susu eri, keka ’ai, keka una eri, Toa ba na kera kefusia fanua nei iano kera fula lau boo i kunei;

⁷ Wane na tha Jasono e thathagonidaki mai: ma toa eki sui bana kera ade faisia si ṉata fifi tha Sisa ki, keka sorea tee kiṉa eeta lau ka to bana, thatana tha Jesus.

⁸ Ma kera adea malului wane eki bia wane gwauwai ki ana toaa susu eri kera isi fufuli, si maṉa na kera roṉoa si do eki.

⁹ Ma buriana na kera ṉalia tai malefo atha Jasono ma toa eki fasi keki ilitooda ania, kera alamatanida keka lae.

¹⁰ Ma si maṉa eri u boo baree wai doorana keka arasia tha Polo ma tha Saelasi afa rodo uria Berea: ma lalae kero fula i kula eri, keko kotho i biu ni ofu la Ju ki.

¹¹ Liona toa eki e lea ka tatha ana Ju nai Thesalonika ki, uria na kera ṉalia si baea eri ana manatada ne thathai maakwalia, keka rofe sulia boṉi i la kekeda la abu eki, sa mado e ai do eki e mamana.

¹² Mania toa oro iada keka fitoo; ma toa oro ana kini inoto i Girisi ki, ma wane ki lau boo.

¹³ Ma si maṉa Ju nai Thesalonika ki kilu thaitoomana na tha Polo ka ṉata sulia bae lana tha God i Berea, kiku lae lau boo uria si kula eri, kiku faasurake ana malului wane eki.

¹⁴ Ma sui si maṉa eri u boo baree wai doorana keka arasia tha Polo kai lae uri amali: ma tha Saelasi bia tha Timothiasi kero to u ana toaa susu eri.

¹⁵ Ma toa eki na kera talaia tha Polo keka lae bi nia uri Athenisi: ma buriana ne faaroṉoda keka soree isatha Saelasi ma tha Timothiasi keko lae fofoa isana, keka lae nada.

¹⁶ Ma si maṉa na tha Polo e maakwalidaroa i Athenisi, spirit nia ka fi nia, uria ne rikia toaa susu eri ne fuṉu ana god eeta ki.

¹⁷ Mania e kwaifamanatai la biu ni ofu la isana Ju ki ma toa na kera faabaita tha God ki, ma asi kula ni usi la iei sulia boṉi isana toa na kera toda ania.

¹⁸ Ma tei wane ana Epikureana ki ma Sitoika ki, toa na kera thathamia manata lea la, keka fulatoona. Ma tei toa keka sorea, Si ta na wane na kai tona ṉataṉata nania ka thathamii sorea? ma tei toa lau, E ’uria sa nia fatai nia god eeta ki: sulaania e ṉata sulia tha Jesus ma tatae la faisia toa mae ki.

¹⁹ Ma kera rau ani nia, keka talaia uria Areopagasi, keka una eri, Oki alamatai kamilia miki thaitoomana maalutana kwaifamanatai la falu eri no ṉata sulia na ba?

²⁰ Uria no faaroṉo kamilia ana tei si do ne ai misi roroṉoa u ana aliṉamilia: mania mili thathamii thaitoomana toolaṉai lana si do eki.

²¹ (Uria toa i Athenisi sui boo ma toa kwaita na kera makafa to iei kesi ilia ta si do eeta lau si maṉa na kera tonee to, talitoona boo ṉata la sulia ta si do ne falu, mado roṉo lana.)

²² Ma tha Polo e takwe initoona gwauna gwa tolo tha Masa, ka sorea, Kamulua wane i Athenesi ki, nau ku riki kamulua asi do ki sui bana na mulu thathamia ṉado foa la.

²³ Sulaania si maṉa nau ku liliu, ma ku lio sulia si do eki na mulu foa ana thatada, ku fulatoona lau boo tee fulii era ni foa la kekeda la nai ni fafia, ANA ṈA GOD NA KESI THAITOOMANA. Mania nia na mulu faabaita si maṉa na mulu dora ani nia, nia boo neri na nau kwai fatai nia isamulua.

²⁴ Ṉa God ne thauwai nia fanua nei iano bia si do ne ni iei ki sui bana, uria ne Lord ana thalo lo ma fanua nei iano, e ai si to ana biu na kera thauwanidaki ana abee imole;

²⁵ Ma kesi ra ani nia ana abee imole, ’uria sa nia rofea ta si do, uria ni nia ka falea marukia, ma si maṉo, ma si do ki sui bana, ani kia sui;

²⁶ Ma ita mai ana tee nonii wane, nia thauwai nia kulee toa eki sui boo fasi keki to ana fanua nei iano ni sui bana, buriana ne gwalua totonao si maṉa kera ki, ma sui lana fanua kera ki;

²⁷ Fasi keki rofe uria tha Lord, sa mado e ai keki thamo fufuli uri nia, ma keki fulatoona, boro sa ni nia e ai si ni da mena faisia atona bana ta imole iaka:

²⁸ Sulaania ani nia na kiki maruki, ma kiki isu, ma kiki to; ’uria lau boo tei toa ana wane kamulua ba ki na kera keda fa ṉu ki kera sorea na ba, Uria ni kia ki lau boo na kwalafana.

²⁹ Mania uria ni kia kwalafana tha God, e ai si kokoto manataka sa kai sorea riki lana tha God e ’uria goloda, mado silifa, mado fau, nunui do na imole e thauwai nia me manata sulia.

³⁰ Mania si maṉa ba asi lio ni dora la ani nia ki tha God e doanita ania; ma sui si maṉa eri nia soree isana imole ki sui, ta si kula si ei, keka akeletania manatada:

³¹ Uria ne gwalua tee fa boṉi, na nia na Wane ni Kotu kai ṉata kokoto sulia toa na fanua nei iano ana Wane ne alu nia ania; me fatai nia mamana lana si do eri isana toa na fanua asi kula eri, ne tataea Wane eri faisia toa mae ki.

³² Sui si maṉa kera roṉoa ṉa tatae la faisia toa mae ki, tei wane kera aefara; mat ei wane ki lau keka sorea, Miki roṉo oe si lau sulia si do eri.

³³ Mania tha Polo e lae faisida.

³⁴ Ma tei wane keka aabe ania, keka fitoo: ma tee nonii wane iada tha Dionisiasi, wane ana Areopagasi, ma tee kini, thatana ni Damarisi, ma tei toa lau bi keroa.