Si do Aposela ki kera ilidaki 16 - Ṉa Alaofua Falu 1923 1949

¹ Ma nia fula i Debe ma Lisitara: ma rikia fasi, tee nonii wane na tha Jesus e tole nia ni kula eri, thatana tha Timothiasi, kaluwane tee kini Ju ne fitoo; ma maka nia ṉa wane i Girisi.

² Ma wane eri baree wai doorana nai Lisitara ma i Ikoniama kera ṉata lea sulia.

³ Tha Polo e thathamia nia kai lae bi nia; ma nia tolea, ka kwai kakali ania uria Ju nai fanua eri ki: sulaania kera sui kera thaitoomana na maka nia ṉa wane i Girisi.

⁴ Ma si maṉa na kera tatha ana toaa susu eki, keka falea si ṉata fifi ba ki isada keka ade sulia, si do ba na aposela ma ulunao nai Jerusalema ki kera aludaki.

⁵ Mania kera faasukwaia figua eki asi do eki na kulu fitoona, ma kera oro ka oli alaa sulia boṉi.

⁶ Ma kera tatha ana fanua i Firitia ma Galesia, ma tha Spirit Abu e lufida kesi ṉata sulia si ṉata i Asia;

⁷ Ma lalae kera fula i Maesia, keka ilitoona lae la uri Bithinia; ma tha Spirit ka lufida faisia;

⁸ Sui keka tatha ana Maesia, keka sifo uri Toroasi.

⁹ Ma si na kera fatai lalaa ania ka fula mai isatha Polo i la rodo; Tee nonii wane i Masedonia ka takwe, ma ka ṉata kwaitakoi isana, ka una eri, Oki tatha mai uri Masedonia, oki adomi kamilia.

¹⁰ Ma buriana ne rikia si do eri na kera fatai lalaa ania, si maṉa eri u boo mili rofe uria si ade la na miki ilia fasi mika lae uri Masedonia, manatamilia na tha God e aili kamilia miki ṉata sulia si faaroṉoa lea isada.

¹¹ Mania mili lae i la faka faisia Toroasi, mili lae kokoto uri Samotheresia, ma afa boṉi iburiana mili fula i Neapolisi;

¹² Ma mili lae faisia si kula eri, mili fula i Filifae, tee toaa susu ana Masedonia ne inoto ka tatha i fanua eri, na toa i Roma kera faainotoa: ma mili to i la toaa susu eri sulia tai fa boṉi.

¹³ Ma afa boṉi mamaloa mili kotho i maana sulufau, mili fula i ninimana tee kafo, asi kula na keki fofoa ṉado iei; ma mili ono, mika ṉata isana kini na kera ofu ki mai.

¹⁴ Ma tee kini, thatana ni Lidia, na ra nia usi la asi maku momothelaa ki, kini ana toaa susu i Thaeatira, ne faabaita tha God, e roṉo kamilia: ma tha Lord e ifinia ruruuna, adedea nia fale nia ana manatatoona lana si do na tha Polo e soredaki.

¹⁵ Ma buriana na kera babataesi nia, bia toa na ana maafera nia, nia ṉata kwaitakoi isamilia, ka una eri, Mada sa manatamulua na nau ku fitoona mamana ṉa Lord, muki kotho mai i maafera nau, ma muki to iei. Ma nia suuwai kamilia uria.

¹⁶ Ma lalae mai, si maṉa na mika lae uria si kula ana foa la, tee thari na spirit ana faaroṉo la asi do thaufuni ki ni ani nia ka toda ani kamilia, na wane inoto nia ki kera toda malefo oro sulia si ṉata ne sorea ana sukwaia spirit taa eri.

¹⁷ Thari eri ka lae iburiatha Polo fai kamilia, ka’ai faamau, ka una eri, Wane nai ki na toa ni ra la ifana ṉa God ne Inoto ka tatha, na kera faaroṉo kulu ana tala ana marukia.

¹⁸ Ma nia ade una eri sulia fa boṉi oro ki. Ma tha Polo, ne taa faamau iana, ka akele ma ka soree isana spirit eri, Nau ku soree isamu ana thatana tha Jesus Christ, oki lae faisi nia. Me lae faisia asi kadee maṉa eri boo.

¹⁹ Sui si maṉa na wane inoto nia ki kera rikia do eri na kera manatatoo ṉado uria fasi keka todamalefo ania e lae nana, keka aba tha Polo ma tha Saelasi, keka aba keroa uria si kula ni usi la iei inaofana wane gwauwai ki,

²⁰ Ma lalae fula isana ro wane inoto eki, keka sorea, Ro wane nai ki, na keroa Ju, kero ṉalia mai taa la faamau uria toaa susu kulu,

²¹ Ma kero faaroṉo ana biraṉada na ṉa lo e ai si alamatai kulu kuki ṉalia, mado kuki bira fafia, kulu na toa i Roma.

²² Ma malului wane eri ka tae ana tee si lio fasi keka firu bidaroa: ma ro wane inoto eki keko abamusia tooni ro wane eki ka ai faisidaroa, keko sorea keka kwaedaroa.

²³ Ma buriana na kera kwakwaedaroa ka aliliboa teefau, keka sui keroa uri la lokafu, keka faaroṉoa wane ni suusi lana lokafu eri kai suusi lea ani keroa:

²⁴ Ma wane eri ne roṉoa ṉata fifi la eri, ka sui keroa uri la kadee biu lalo rorodoa, ma ka faaṉadoa aaedaroa ana kokomee do ne bira.

²⁵ Ma sui fuliṉana initoona rodo tha Polo ma tha Saelasi keko foa ma keko ṉulia fa ṉu ki isatha God, ma wane na kera suusidaki bi keroa keki roṉoa;

²⁶ Ma tee anunu baita ka fula fatonada, adedea gwa fau totonao ana lokafu eri ki ka igiigi: ma si maṉa eri u boo maana olofolo ki sui bana ka ifi; ma nailii thalo ana toa eki sui boo ka luke.

²⁷ Ma wane eri ni suusi lada ka tharai faisia biṉa la, ka rikia maana olofolo eki ana lokafu e ifi, sui ka lafua nini ni firu nia, sa kai tala thauṉi nia i talaana, uria na manatana sa wane eki na kera fono faisida kera thaka teefau.

²⁸ Ma tha Polo ka ’ai faamau, ka una eri, Osi fare taa ani oe i talaamu: sulaania kamilia sui mika to bamilia.

²⁹ Ma nia ’ai, ka sorea keki ṉalia mai laafa, ka lakwasia mai, ka leleba, ka asi nia inaofatha Polo ma tha Saelasi,

³⁰ Ka tole keroa kau, ma ka sorea, Ro wane ae, si ta na kwai ilia e ai si ei boo fasi keka faamaruki nau?

³¹ Ma keko sorea, Oki fitoona tha Lord Jesus Christ, ma keki faamaruki oe, oe bia toa i maafera oe.

³² Ma kero ṉata sulia bae lana ṉa Lord isana, bia toa eki sui bana ana maafera nia.

³³ Ma nia talaidaroa asi kadee rodo eri boo, ka taua aliliboa la keroa ba ki; ma keko babataesi nia, bia toa nia ki sui bana, si maṉa eri u boo.

³⁴ Ma buriana ne talaidaroa uri maafera nia, nia ka tharaṉania tatafe ni faṉa la ifadaroa, ka seethathala faamau uria ne fitoona tha God, bia toa eki sui boo ana maafera nia.

³⁵ Ma si maṉa na fanua e dani, ro wane inoto eki keko arasia mai wane ana firua ki, keka una eri, Oko alamatania ro wane ba ki keko lae.

³⁶ Ma wane eri ni suusi lana lokafu ka faaroṉoa tha Polo ana ṉata ladaroa, ka una eri, Ro wane inoto ki kero kwaiarasi fasi keki alamatai kamaroa moki lae: mania moki lae mai, moki lae namaroa ana enenoa.

³⁷ Ma tha Polo ka soree isada, Kero kwae lalaa ani kamarea, si maṉa na wane ni kotu e ai si sorea kwae lamarea totonao, kamarea ro wane i Roma ki, ma kero sui kamarea uri la lokafu; ma kekoi sui thaufuni ani kamarea i maa si maṉa eri? e ai dodoloa; ni keroa keko tala lae mai, keko talai kamarea i maa.

³⁸ Ma wane ana firua eki keka faaroṉoa ro wane inoto eki asi baea eri: ma keko mau, si maṉa na kero roṉoa na keroa ro wane i Roma ki:

³⁹ Ma kero lae mai, keko ṉata kwaitakoi isada; ma kero talaida kau, keko soree isada sa kekoi lae faisia toaa susu eri.

⁴⁰ Ma kero kotho i maana lokafu eri, keko kotho i maafera ni Lidia: ma si maṉa na kero rikia baree wai doorana, keko faainamarukida, sui keko bii lae.