Si do Aposela ki kera ilidaki 15 - Ṉa Alaofua Falu 1923 1949

¹ Ma tei wane na kera sifo i Judia keka kwaifamanatai isana baree wai doorana, keka una eri, Mada sa kesi kwai kali kamulua sulia biraṉana tha Mosesi, e afetai sa keki faamaruki kamulua.

² Ma si maṉa na tha Polo ma tha Banabasi kero ṉata ni firua faamau ma keko oli susuu bia toa eki, manatana baree wai doorana na tha Polo ma tha Banabasi, bia tei wane iada lau boo, keki tae uri Jerusalema isana aposela ki ma ulunao ki uria si do eri na kera oli susuu fafia.

³ Mania figua eri e adomida ana lae lada kau, sui keka tatha i Fenisi ma i Sameria, keka faaroṉo ana akele la na Jenetaele ki kera akele buri ania: ma kera adea na baree wai doorana eki sui boo keka seethathala faamau.

⁴ Ma lalae kera fula i Jerusalema, figua eri ma aposela ki ma ulunao ki kera thathagonida mai, ma keko uunu sulia si do eki sui boo na tha God e ilia ani keroa.

⁵ Ma sui tei toa ana toa na kera faamamanea kwaifamanatai lana Farisi ki na kera fitoo, kera tae ia, keka una eri, Keki kwai kali kera e ai si ei boo, ma keki faaroṉoda keki ade sulia ṉa lo tha Mosesi.

⁶ Ma aposela ki bia ulunao ki kera figu mai fasi keki manatatoona maalutana si do eri.

⁷ Ma buriana na kera oli susuu faamau, tha Pita e tae ia, ka soree isada, Doora kera, mulu thaitoomana dini na ba tha God e filia wane nia i maalutakulua, fasi ana fokoku Jenetaele ki keka roṉoa si baea asi faaroṉoa lea, keki fitoo.

⁸ Ma tha God, ne thaitoomana rurui imole, e faamamanea si do ne thaitoomana suli kera, uria ne falea tha Spirit Abu ifada, ’uria lau boo fani kulu na ba;

⁹ Ma nia e ai si adea ’uria sa kera eeta faisi kulu, ka faafalua ruruuda ana fitooa.

¹⁰ Mania uria ta na muki ilitoona tha God, muki alua fafia luana toa na tha Jesus e toleda ioke, na maka kulu ba ki ma ni kulu lau boo kusi talaana ṉali lana?

¹¹ Ma kulu fitoo na keki faamaruki kulu ana lea la tha Lord Jesus Christ, alafana lau boo ni kera.

¹² Ma malului wane eri sui boo keka bona bada; keka roṉoa tha Banabasi ma tha Polo si maṉa na kekoi uunu sulia bala si do ba ki ma do ni kwele la ania na tha God e ilidaki i maalu tana Jenetaele ki ani keroa.

¹³ Ma buriana na kero bona, tha Jemesi e luua, ka una eri, Doora kera, muki roṉo nau:

¹⁴ Tha Simiona e uunu sulia si maṉa totonao ba na tha God lae e makelea Jenetaele ki, fasi kai talaia ta toa faisida uria thatana.

¹⁵ Ma bia si do eri bae lana porofeta ba ki ka totoo; ’uria si do na kera keda na ba,

¹⁶ Buriana si do eki nau kwai oli lau mai, Ma nau kwai kasia lau biui maku tha Defeta, ne asia; Ma nau kwai kasia lau do eri na kera ogea, Ma kwai tolea kai takwe:

¹⁷ Fasi toa na fanua nei iano keki rofe uria tha Lord, Ma Jenetaele eki sui bana, na kera alaṉida ana thataku,

¹⁸ Tha Lord e soroa, nia na ka fafatai nia si do eki ka toto bana ita mai ana thafali lana fanua nei iano ka fula asi maṉa eri.

¹⁹ Mania manataku, ne ai kusi alua taa la kai to fafia toa eki na keki akele uria tha God faisia i maalutana Jenetaele ki;

²⁰ Kuki keda si kula eri isada, keki to faisia si do eki ana god eeta ki na ka faasua kera, ma faisia oe la, ma fai sia seena do na kera lioa ki, ma faisia abuna do ki.

²¹ Sulaania ita ana unii wane u mai inao ki ka fula asi maṉa eri, tha Mosesi ana toa na keka ṉata suli nia ana toaa susu ki sui boo, uria na kera teemai nia ṉata lana i la biu ni ofu la ki ta fa boṉi si ei ana boṉi mamaloa ki.

²² Sui manatana aposela ki ma ulunao ki, ma figua eri sui boo, ne lea keki talisia tai wane iada, keki arasida uri Adioko bia tha Polo ma tha Banabasi; tha Judasi neri na kera alaṉia atha Basabasi, ma tha Saelasi, ro wane ana toa na kera tatha inaona baree wai doorana eki:

²³ Ma kera kekeda kau ana ro wane eki, keka una eri, Aposela ki ma ulunao ki ma baree wai doorana isana dooramilia ana Jenetaele ki nai Adioko ma i Siria ma i Silisia, miki aratai lea la ani kamulua:

²⁴ Uria na mili roṉoa na tai toa kera lae faisi kamilia, kera alua taa la kai to fafi kamulua ana bae lada, kera bulasi garo ana maṉomulua, keka una eri, Keki kwai kali kamulua e ai si ei boo, ma muki ade sulia ṉa lo; toa ne ai misi faaroṉoda keki ṉata una eri;

²⁵ Mili to ana tee si manata, manatamilia ne lea mika talisia ro wane ki, miki arasidaroa isamulua bia wane liliothaua kamilia ki tha Banabasi ma tha Polo,

²⁶ Na kero toto karaṉia maea uria thatana Lord kulu tha Jesus Christ.

²⁷ Mania mili arasia tha Judasi ma tha Saelasi, na keko faaroṉo kamulua lau boo asi do eki ana bae ladaroa i talaadaroa.

²⁸ Sulaania manatana tha Spirit Abu, ma manatamilia, ne lea misi alua ta si do fafi kamulua ne kulua ka tatha asi do nai na muki ilidaki e ai si ei boo;

²⁹ Muki to faisia do ni foa la na kera faledaki ana god eeta ki, ma faisia abuna do ki, ma faisia seena do kera lioa ki, ma faisia oe la; mada sa muki beta suli kamulua faisia si do eki, kai lea iamulua. Muka toto kau.

³⁰ Mania si maṉa kera alamatanida keka lae, keka sifo i Adioko; ma buriana na kera figua mai malului wane eri, keka falea leta eri.

³¹ Ma buriana na kilu teemai nia e sui, kiku bii seethathala uria si do eri ne faalea manatada.

³² Ma tha Judasi ma tha Saelasi, uria ni keroa lau boo ro porofeta ki, keko kwaifamanatai isana baree wai doorana asi baea oro ki, ma keko faaṉado kera.

³³ Ma buriana na kero makafa to i kula eri, baree wai doorana kera alamatanidaroa keko oli lau ana enenoa isana aposela ki.

³⁴ Ma sui manatana tha Saelasi ne lea kai to i fanua eri.

³⁵ Ma tha Polo lau boo ma tha Banabasi kero makafa to fasi i Adioko, keko kwaifamanatai ma keko ṉata sulia bae lana ṉa Lord, bia toa oro ki lau boo.

³⁶ Ma buriana tei fa boṉi tha Polo ka soree isatha Banabasi, Koki oli lau bakaroa, lae koki makelea baree wai doorana ana toaa susu eki ifei na koro faaroṉoda sui naa ana bae lana ṉa Lord, koki rikia tolada.

³⁷ Ma manatana tha Banabasi sa keko talaia lau boo tha Jone, na kera alaṉia atha Mako, bi keroa.

³⁸ Ma manatana tha Polo ne ai si lea sa kekoi talaia wane eri bi keroa ne oli faisidaroa faisia Pamafilia na ba, me ai si lae bidaroa ana ra eri.

³⁹ Ma oli susuu la baita ka tae mai, adedea keko lae eeta kwailiu, ma tha Banabasi ka talaia tha Mako bi nia, ka lae i la faka uri Saeporasi;

⁴⁰ Sui tha Polo ka filia tha Saelasi, ka lae nana, ma baree wai doorana kera takofale nia ana lea la tha God.

⁴¹ Ma nia tathafia Siria ma Silisia, ka faaṉadoa figua eki.