Si do Aposela ki kera ilidaki 13 - Ṉa Alaofua Falu 1923 1949

¹ Ma tei porofeta ma tei wane ni kwaifamanatai ki ni Adioko, i la figua nai kula eri, tha Banabasi, ma tha Simiona na kera alaṉi nia ana Wanebulu, ma tha Lusiasi wane i Saerini, ma tha Manena na kera thare ni safu atha Heroda na kiṉa eri bi nia, ma tha Solo.

² Ma si maṉa na kera ra ifana ṉa Lord, ma kera abu ana faṉa la, tha Spirit Abu e sorea, Muki filia tha Banabasi ma tha Solo ifaku asi ra na nau ku ailida mai uria.

³ Sui buriana na kera to faisia faṉa la ma kera foa, keka alua abada fafi keroa, sui keka alamatanidaroa keko lae.

⁴ Mania, uria na tha Spirit Abu e arasidaroa, keko sifo uri Seleusia; ma too i kula eri keko lae i la faka uri Saeporasi.

⁵ Ma lalae keka ni Salamisi, kera faaroṉo ania bae lana tha God i la biu ni ofu la ki ana Ju ki: ma adaroa tha Jone lau boo wane ni ra keroa.

⁶ Ma kilu tathafia sui bana i la auua eri ka fula i Pafosi, kiku fulatoona tee nonii wane ne ra ana sukwaia spirit taa ki, porofeta ni lole la, tee Ju, na thatana tha Ba‐Jesus;

⁷ Ne to isatha Sajasi Polasi, wane na toa i Roma kera alua ka inoto ana fanua eri, wane na manatane kali. Wane inoto eri e ailia mai tha Banabasi ma tha Solo, ka thathamii roṉoa bae lana tha God.

⁸ Ma tha Elimasi, wane eri ne ra ana sukwaia spirit taa ki (toolaṉai lana thatana neri) ka suusidaroa, ka thathamii bulasia wane inoto eri faisia si do eki na kulu fitoona.

⁹ Sui tha Solo, na kera alaṉi nia lau boo atha Polo, na kera faafuṉu nia atha Spirit Abu, ka lio tete uri nia,

¹⁰ Ma ka sorea, Wane no fuṉu ana lole la ni sui bana ma abula dodora la ni sui bana, kaluwane tha devil, wane no maalimae asi do ki sui ne kokoto, osi to faisia bulasi garo la ana tala kokoto ṉa Lord ki?

¹¹ Ma rikia fasi, si maṉa eri abana ṉa Lord ka to fafi oe, ma maamu kai rodo, osi rikia ṉa thato sulia tei si maṉa. Ma si maṉa eri u boo ṉa datha ma maerodo ka sifo fafi nia; ma nia galo fufuli, ka rofe uria tei toa na keki rau ana abana, keki talai nia.

¹² Sui wane eri na toa i Roma kera alua ka inoto, si maṉa ne rikia si do na kera ilia, ka fitoo, urea ne kwele ana kwaifamanatai la ṉa Lord.

¹³ Sui tha Polo ma toa na kera lae bi nia keka lae i la faka faisia Pafosi, keka fula i Paga i Pamafilia: ma tha Jone e lae faisidaroa, ka oli uri Jerusalema.

¹⁴ Ma ni keroa, kero lae sula tale faisia Paga, keko fula i Adioko i Pisidia; ma kero kotho ana biu ni ofu la afa boṉi mamaloa, keko ono.

¹⁵ Ma iburiana na kera teemai nia ṉa lo ma porofeta ba ki, toa gwauwai ana biu ni ofu la eri kera kwaiarasi isadaroa, keka una eri, Doora kera, mada sa amaroa ta si baea ni kwaifamanatai la ifana toa nai, moki ṉata mai.

¹⁶ Ma tha Polo ka takwe ia, ka faabona kera ana abana, ka sorea, Wane Isirela ki, ma toa na mulu mau atha God, muki fafuroṉo fasi.

¹⁷ Ṉa God toa nai na toa Isirela e filia maka kulu ba inao ki, me faainotoa toa eri si maṉa na kera to ni laea ana fanua i Ijifita na ba, me tafoa abana, ka talaida faisia fanua eri.

¹⁸ Ma sulia fuliṉana fai tafulu fa ṉali e nanai kera i la fanua kwasi.

¹⁹ Ma buriana ne labatania fiu kulee toa ana fanua i Kenana, nia falea fanua kera ifada ana do kera i talaada:

²⁰ Ma buriana si do eki nia falea wane ni kotu ki ifada sulia fai taleṉee fa ṉali ma lima tafulu fa ṉali, ka fula atha Samiuela ṉa porofeta.

²¹ Ma sui iburiana keka gania ta kiṉa: ma tha God e falea tha Solo kaluwane tha Kisi, wane ana kwalafana tha Benijamini, ifada sulia fai tafulu fa ṉali.

²² Ma buriana ne idua wane eri, nia falea mai tha Defeta ka kiṉa ani kera; me faamamanea lau boo si do ne thaitoomana sulia wane eri, ka sorea, Nau ku fulatoona tha Defeta, kaluwane tha Jesi, wane na ruruuku e ala fafia, na kai ilia si do nau ku thathamidaki ka sui bana.

²³ Ana kwalafana wane eri tha God, sulia alaṉaia ba, e talaia mai Wane ni Kwaifaamaruki isana Isirela, tha Jesus neri;

²⁴ Buriana na tha Jone e ṉata totonao, si maṉa ne ai si fula u, sulia babataesi la ana manata akele la isana toa Isirela sui bana.

²⁵ Ma si maṉa na tha Jone kai ilia si ra na kera alu nia ania, nia ka sorea, Manatamulua sa nau ni tei? Nau Wane ba e ai. Ma rikia fasi, tee nonii wane kai lae mai iburiaku, wane na butu ana aaena e ai kwasi farana luke lana.

²⁶ Doora kera, wela ana kwalafa tha Aberahamo ki, ma toa iamulua na kera mau atha God, ni kamulua toa na kera falea mai si baea ana marukia nai ifamulua.

²⁷ Sulaania toa na keki to i Jerusalema, ma wane gwauwai kera ki, uria ne ai kesi thaitoomana, ma kesi thaitoomana ṉata lana porofeta ba ki na keki teemai nia ta fa boṉi mamaloa si ei, kera faamamanea si ṉata eki ana sore lana mae lana.

²⁸ Ma kesi fulatoona mena ta si do fasi keki thauṉi nia fafia, keka gania bada tha Paelate fasi keka thauṉi nia.

²⁹ Ma buriana na kera faamamanea si do eki sui boo na kera keda suli nia, kera sifolaṉai nia faisia ’ai ba, keka alu nia i la kwaiṉeia.

³⁰ Ma sui tha God e tataea faisia toa mae ki:

³¹ Ma toa eki na kera toto i Galili kera tae bi nia uri Jerusalema, keka riki nia sulia fa boṉi oro ki, toa eri na i maṉa eri keki faamamanea si do na kera thaitoomana suli nia isana toa eki sui boo.

³² Ma mere ṉalia mai si faaroṉoa lea ifamulua sulia alaṉaia ba na kera alaṉai nia isana maka ba inao ki,

³³ Na tha God e faamamanea alaṉaia eri ifana wela kera ki, ni kulu neri, ana tatae la eri ne tataea atha Jesus; ’uria lau boo na kera keda ana ruana fa ṉu na ba, Kaluwane nau ni oe, itaraena boo ku thare oe.

³⁴ Mu sulia tatae la eri ne tataea ania faisia toa mae ki, fasi ita asi maṉa eri ka oli alaa nia si oli lau uria fufuraa la, nia e ṉata mai una eri, Nau kwai falea lea la mamana ba tha Defeta ki ifamulua.

³⁵ Mania e sorea lau boo ana fa ṉu eeta lau, Oe soko alamatania Wane Abu oe kai to kai fufuraa e ai.

³⁶ Sulaania tha Defeta, buriana ne ra asi do na tha God e gwalua i maalutana unii wane nia, ka biṉa, ma kera kwaiṉei nia isana maka nia ki, ma ka fufuraa boo:

³⁷ Ma Wane eri na tha God e tataea e ai dodoloa si fufuraa.

³⁸ Mania muki thaitoomana, doora kera, na sulia Wane eri keki faaroṉo kamulua ana manata lube la ana abula taa la ki:

³⁹ Ma ani nia ni tei na kai fitoo kera ala fafia kokoto lana asi do ki sui bana, na ṉa lo tha Mosesi e ai si sukwai fasi kai ala fafia kokoto lamulua ania.

⁴⁰ Mania muki fia, ada si do ba na kera ṉata sulia ana porofeta ba ki ka fulatoomulua;

⁴¹ Rikia fasi, toa na mulu fare faekwa, muki kwele, ma muki aana; Uria nau kwai ilia tee ra si maṉa na muki to u bamulua, Si ra na toto e ai dodoloa muki faamamanea, mada sa ta wane kai faaroṉo kamulua ania.

⁴² Ma si maṉa na Ju ki kera kotho i maa faisia biu ni ofu la eri, Jenetaele ki keka ṉata kwaitakoi keka sorea sa si baea eri keko ṉata sulia isada afa boṉi mamaloa iburi.

⁴³ Sui si maṉa na ofu la eri e sui, toa oro ana Ju ki ma Jenetaele na kera ade mala Ju ki ma kera faabaita tha God, keka lae iburiatha Polo ma tha Banabasi: na keko ṉata isada, keko faaroṉo fifi ani kera keka to ṉado ana lea la tha God.

⁴⁴ Ma afa boṉi mamaloa iburiana karaṉia toa ana toaa susu eri sui bana keka ofu mai uria roṉo lana bae lana tha God.

⁴⁵ Ma si maṉa na Ju ki kera rikia malului wane eki, keka fuṉu ana uga la, keka aea si do na tha Polo kai soredaki, keka bae asi baea ni faretoliṉi lana tha God.

⁴⁶ Ma tha Polo bia tha Banabasi kero ṉata seeraa, keko sorea, Do kera ilia e ai si ei boo, keka faaroṉo kamulua totonao ana bae lana tha God. Ma sui uria na mulu usutania faisi kamulua, manatamulua na musi farana marukia tatha, lio fasi, meki akele uria Jenetaele ki.

⁴⁷ Uria na si do na tha God e soree isamarea neri, Nau ku alu oe na laafa Jenetaele ki, Fasi oki to uria faamaruki la ka fula asi kula ne to da mena i fanua nei iano.

⁴⁸ Ma si maṉa na Jenetaele ki kera roṉoa si do eri, kera seethathala, keka faainotoa bae lana ṉa Lord: ma toa eki sui bana na kera filida ana marukia tatha keka fitoo.

⁴⁹ Ma bae lana ṉa Lord e talofia fanua eri sui bana.

⁵⁰ Ma sui Ju ki kera faasurake ana kini inoto na kera faabaita tha God ki, ma wane inoto ki ana toaa susu eri, keka areda uria tona ilamatai lana tha Polo ma tha Banabasi, keka taridaroa i thara faisia oli lana fanua kera.

⁵¹ Sui ni keroa keko tagaraṉai nia gegeona theegano faisia aaedaroa uri kera, lae keko fula i Ikoniama.

⁵² Ma kera faafuṉua wane eki na tha Jesus e toleda ana seethathala la ma atha Spirit Abu.