Si do Aposela ki kera ilidaki 11 - Ṉa Alaofua Falu 1923 1949

¹ Ma aposela ki ma baree wai doorana nai Judia kera roṉoa na Jenetaele ki kera ṉalia lau boo bae lana tha God.

² Ma lalae tha Pita e tae uri Jerusalema, toa eki ana kwai kakali la keka ṉata ni firua bi nia,

³ Keka una eri, O kotho isana wane kesi kwai kalidaki, mo faṉa bi kera.

⁴ Ma tha Pita ka ṉata, ka faaroṉo teefau asi do eri ita u bomai ana thafali lana, ka una eri,

⁵ Nau ku toto i la toaa susu i Jopa, ku foa: ma si maṉa na bubunoto la e fulatooku, ku rikia ana si na kera fatai lalaa ania, tee butee do ne sifo mai, ’uria ta maku ne baita, na kera sifolaṉai nia faisia thalo lo ana fai susui do ki; ma lalae mai ka fula isaku:

⁶ Ma si maṉa maaku e tede ana si do eri, ku onotoona, ma ku rikia do maruki ana fai ae nai fanua nei iano ki ma do maruki na kera kwasi ki ma do na kai aṉo ki ma thaaro i mamatalea ki.

⁷ Ma nau ku roṉoa lau boo liṉana ṉata la e una eri isaku, Tatae, Pita; oki thauṉia ma oki ania.

⁸ Ma nau ku sorea, E ai, Lord: sulaania ita mai inao ka fula asi maṉa eri e ai ta do ne ai si lea ma do ne sua si tatha u i fokoku.

⁹ Ma liṉana ṉata la ruana lau ka luu nau i thalo mai, Si do na tha God e faafalua naa, osi alaṉia asi do ne ai si lea.

¹⁰ Ma kera ulu fa ade la una eri: sui kera lafua si do eki sui boo ka oli uri thalo.

¹¹ Ma rikia fasi, si maṉa eri u boo ulu nonii wane kera takwe luana biu eri na nau ku ni iei, na kera arasida too mai i Sesaria keka lae mai isaku.

¹² Ma tha Spirit e soree isaku kwa lae bida, manataku si rurua. Ma ono doorakulua nai ki kera lae lau boo bi nau; ma mili kotho i biu wane eri:

¹³ Ma nia faaroṉo kamilia na nia rikia tee angel kai takwe i biu nia, ma ka soree isana, Oki kwaiarasi uri Jopa, keki talaia mai tha Saimona, na ruana thata nia tha Pita;

¹⁴ Wane na kai faaroṉo oe asi baea, na keki faamaruki oe ania, oe bia toa eki sui boo ana maafera oe.

¹⁵ Ma si maṉa ku thafalii ṉata, tha Spirit Abu e sifo fafida, ’uria lau boo ne sifo fafi kulu inao na ba.

¹⁶ Ma nau ku onotoona bae lana ṉa Lord, ne sorea na ba, Tha Jone e babataesi boo ana kafo; ma ni kamulua keki babataesi kamulua atha Spirit Abu.

¹⁷ Mania mada sa tha God e tona falea boo si do eri ifada ’uria lau boo ne falea ifakulua, si maṉa kulu fitoona tha Lord Jesus Christ, nau ni tei, fasi kwa firu bia tha God?

¹⁸ Ma si maṉa na kera roṉoa si do eki, keka bona bada, sui kera taṉoa tha God, keka una eri, O ma Jenetaele ki lau boo tha God e falea manata akele la ifada uria marukia.

¹⁹ Mania toa na kera faaseesula iada keka lae tataka si maṉa ana unii fualaṉa ne tae mai sulia tha Sitifini na ba kera lalae keka fula ana Fenisi, ma Saeporasi, ma Adioko, kesi ṉata sulia si baea isana ta toa eeta, isana talitoona Ju ki.

²⁰ Ma sui tei toa iada wane i Saeporasi ma i Saerini ki, na si maṉa na kera fula i Adioko, keka ṉata isana toa i Girisi ki, keka ṉata sulia tha Lord Jesus.

²¹ Ma abana tha Lord e to bida: ma toa ooro ka oro kera fitoo ma keka akele uria ṉa Lord.

²² Ma si faaroṉoa sulia toa eki e talo i aliṉana figua nai Jerusalema: ma kera arasia kau tha Banabasi kai lae uri Adioko:

²³ Nia lalae mai e fula, me rikia lea la tha God, ka seethathala; ma nia soree isada sui, keki susuu ana ruruuda, keki rau ṉado ana ṉa Lord:

²⁴ Sulaania nia wane abula lane lea, ma ka fuṉu atha Spirit Abu ma ana fitooa: ma toa na kera lae mai isana ṉa Lord kera oro.

²⁵ Ma tha Banabasi e lae kau uri Tasasi fasi kai rofe uria tha Solo:

²⁶ Ma lalae rofetoona naa, ka talai nia uri Adioko. Ma sui sulia tee fa ṉali laulau, kero to ofu bia figua eri, keko kwaifamanatai isana toa oro; ma toa na tha Jesus e toleda kera alaṉida ana Christian ki totonao i Adioko.

²⁷ Ma afa boṉi eki porofeta ki kera sifo mai i Jerusalema, keka fula i Adioko.

²⁸ Ma tee wane iada, thatana tha Agabasi, ka takwe ia, ka fatai nia atha Spirit na toto unii thaofa baita kai fula ana fanua nei iano ni sui bana: na ka mamana asi maṉa na tha Kilodiasi Sisa e to u bana.

²⁹ Ma toa na tha Jesus e toleda, ta wane u boo i talaana ma ta wane u boo i talaana sulia si do ne rikidaki, kera sorea keki falea e ai si ei boo si do ana adomi lana baree wai doorana nai Judia:

³⁰ Si do na kera ilia boo, keka falea kau isana toa ulunao ki ana abana tha Banabasi ma tha Solo.