Si do Aposela ki kera ilidaki 10 - Ṉa Alaofua Falu 1923 1949

¹ Sui tee nonii wane ni Sesaria, thatana tha Koneliasi, senitiurione ana omea eri na kera alaṉia ana omea i Itali,

² Wane eri e faabaita tha God, ma ka mau ani nia bia toa eki sui boo ana maafera nia, wane ne tona fale baita ana toa na kesi rikii do, ma ka foa ṉado ana thatana tha God.

³ Ma fuliṉana sikwana si kadee thato, nia rikia ana si na kera fatai lalaa ania, angel tha God ka kotho isana, ma ka una eri isana, Koneliasi ae.

⁴ Ma nia lio tete uri nia, ka aanu, ma ka sorea, Ta neri, Lord? Ma nia soree isana, Foa la oe ba ki ma si do ba no tona faledaki e tae naa inaofatha God fasi keki manatai oe ania.

⁵ Mania oki arasia tei wane uri Jopa, keki talaia mai tee nonii wane, thatana tha Saimona, na ruana thata nia tha Pita:

⁶ Nia to ni laea isana tee nonii wane, thatana tha Saimona, wane ni ra la ana uṉana do ki, na biu nia ni fafo amali: nia kai faaroṉo oe asi do noki ilia e ai si ei boo.

⁷ Ma buriana na angel eri ne ṉata isatha Koneliasi e lae naa, nia ailia mai ro wane ana toa na kera ra i maafera nia, ma tee wane ana firua ne faabaita tha God, wane ana toa na kera ra ṉado ifana;

⁸ Me uunu sulia si do eki sui bana isada e sui, ka arasida uri Jopa.

⁹ Sui afa boṉi iburiana, si maṉa na kera lae na mai, ma keka fula karaṉia toaa susu eri, tha Pita e raa fafona biu fuliṉana ona si kadee thato, fasi kai foa:

¹⁰ Ma nia toto ka thaofa, ma ka thathamii faṉa: sui si maṉa na keki naare bada, bubunota la ka fulatoona:

¹¹ Ma nia rikia ṉa thalo ka ifi, ma tee butee do ka sifo mai, ’uria ta maku ne baita, na kera sifolaṉai nia ana fai susui do ki fafia fanua nei iano:

¹² Ma do maruki oro ana fai ae nai fanua nei iano ki ni iei ma do maruki na kera kwasi ki ma do na kai aṉo ki ma thaaro i mamatalea ki.

¹³ Ma liṉana si ṉata la e lae mai isana, Tatae, Pita; oki thauṉia ma oki ania.

¹⁴ Ma tha Pita ka sorea, E ai, Lord; uria nau kwasi aania u si do ne ai si lea ma si do ne sua.

¹⁵ Ma liṉana si ṉata la ruana lau ka fula isana, Si do na tha God e faafalua naa, osi alaṉia asi do ne ai si lea.

¹⁶ Kera ulu fa ade la una eri: sui kera oli fafia butee do eri uri thalo.

¹⁷ Ma si maṉa na tha Pita e kwaikonai sulia si ta na si do eri na kera fatai lalaa ania isana kai toolaṉania, rikia fasi, wane ba ki na tha Koneliasi e arasia mai kera soetoona biu tha Saimona, keka takwe bada i maa,

¹⁸ Keka ’ai mai, keka soetoona mada sa tha Saimona, wane na ruana thata nia tha Pita, ka to ni laea i biu eri.

¹⁹ Si maṉa na tha Pita kai onotoona si eri na kera fatai lalaa ania, tha Spirit ka soree isana, Rikia fasi, ulu nonii wane kera rofe uri oe.

²⁰ Mania oki tatae, oki sifo, ma oki lae bida, manatamu si rurua sulia: uria ni nau ku arasida mai.

²¹ Ma tha Pita ka sifo isana wane eki na tha Koneliasi e arasia mai, ma ka sorea, Rikia fasi, nau nai nia na mulu rofe uri nau: ta na mulu lae mai uria?

²² Ma keka sorea, Tha Koneliasi ṉa senitiurione, wane kokoto ma wane ne mau atha God, na Ju ki sui bana kera ala fafi nia, tha God e faaroṉo nia ana angel abu sorea kai kwaiarasi iburiamu, oki lae uri biu nia, oki faaroṉo asi baea.

²³ Mania e ailida mai kiku to ni laea isana. Ma fa boṉi eri dani, tha Pita ka lae kau bida, ma tei toa ana baree wai doorana nai Jopa kera lae bi nia.

²⁴ Ma afa boṉi iburiana kera fula i Sesaria. Ma tha Koneliasi ka maakwalida bana, e ailia na mai ina lana kera ma toa na kilu ado ki.

²⁵ Ma si maṉa na tha Pita ka maṉo mai, tha Koneliasi e toda ani nia, ka asi nia isana aaena, ma ka faabaita nia.

²⁶ Sui tha Pita ka tataea, ka una eri, Oki takwe ia; nau imole ni lau bana.

²⁷ Ma si maṉa na nia kai ṉata bia, nia ka kotho i biu, ka fulatoona toa oro na kera ofu mai:

²⁸ Ma nia ka soree isada, Kamulua mulu tala thaitoomana na kera lufia wane ne Ju e ai si to isata wane ata toa eeta ma ka ai si lae isana; ma sui tha God e fatai nia isaku ne ai si lea kwai alaṉia atona bana ta wane ana do ne ai si lea mado ne sua:

²⁹ Uria si kula eri ku lae lau bomai si maṉa na kera kwaiarasi uri nau, nau kwasi tofe faisida. Mania ku soetoomulua uria si do na mulu kwaiarasi iburiaku uria.

³⁰ Ma tha Koneliasi ka sorea, Fai fa boṉi e sui, ita asi maṉa na nau ku abu ana faṉa la ka fula asi kadee thato ne ’uria si maṉa eri; ma ana sikwana si kadee thato nau ku foa i maafera nau; ma rikia fasi, tee nonii wane e takwe inaofaku fafia tooni ne iriroa,

³¹ Ma ka sorea, Koneliasi ae, kera roṉoa foa la oe, ma si do ba no tona faledaki tha God e rikia ka manataia.

³² Mania oki kwaiarasi uri Jopa, oki ailia mai tha Saimona isamu, wane na ruana thata nia tha Pita; nia to ni laea i biu tha Saimona, wane ni ra la ana uṉana do ki, na biu nia ni fafo asi: ma lalae e fula naa, nia kai ṉata isamu.

³³ Nia na ba kwa kwaiarasi kau uri oe si maṉa eri u boo na ba; mo abula lea no fula naa. Mania si maṉa eri kamilia sui boo mili ni kunei inaofatha God, fasi miki roṉoa si do eki sui boo na tha God e soree isamu.

³⁴ Ma tha Pita e ifinia fokona, ka sorea, Ku rikia mamana na tha God e rikia imole e totoo boo:

³⁵ Ma ana kulee toa ni sui bana wane ne mau ani nia, ma kai ilia si do kokoto, nia kai ala fafia.

³⁶ Si baea eri ne falea mai isana kwalafa tha Isirela, si maṉa ne ṉata sulia enenoa atha Jesus Christ (nia Lord ana toa na fanua ni sui bana)

³⁷ Si baea eri mulu tala thaitoomana, si do na kera faaroṉo faladoa ania i fanua i Judia ni sui bana, ita mai ana i Galili, buriana babataesi la eri na tha Jone e ṉata sulia;

³⁸ Sulia tha Jesus, Wane i Nasaretha, na tha God e kiki nia ana gwai, ma gwai eri tha Spirit Abu ma sukwaia: ne liu fafia ili lana si do lea ki, ma ka faamarukia toa eki sui boo na tha devil e malataa anida; uria na tha God e to bi nia.

³⁹ Ma ni kamilia toa ana faamamane lana si do na mili thaitoomana sulia si do eki sui bana ne ilia ana fanua Ju ki, ma i Jerusalema; Wane eri lau boo na kera thauṉia, kera tarufai nia sulia rebee ’ai.

⁴⁰ Wane eri tha God e tataea ana ula fa boṉi, ma ka fatai lalaa ani nia,

⁴¹ Isana toa eri sui bana e ai, isana toa na tha God e filida totonao ana faamamane lana si do na kera thaitoomana, ni kamilia neri, na mili faṉa ma mili kuu ofu bi nia buriana ne tatae faisia toa mae ki.

⁴² Ma nia faaroṉo kamilia miki ṉata isana toa eki, ma miki faamamanea si do mili thaitoomana na nia ṉa Wane na tha God e alu nia Wane ni Kotu ifana toa maruki ma toa mae ki.

⁴³ Porofeta eki sui boo keka faamamanea si do na kera thaitoomana suli nia, na ni tei bana na kai fitoona keki doanita ana abula taa la nia ki ana thatana.

⁴⁴ Si maṉa na tha Pita kai ṉata u bana asi baea eri, tha Spirit Abu e sifo fafia toa eki sui boo na kera ronoa si baea eri.

⁴⁵ Ma toa ba ana kwai kakali la na kera fitoo keka tona, toa eki sui boo na kera lae mai bia tha Pita, uria na tha Spirit Abu na kera tona falea keka kikia fafia Jenetaele ki lau boo.

⁴⁶ Sulaania kera roṉoda keka ṉata ana ṉata la eeta ki, keka faabaita tha God. Sui tha Pita e luua,

⁴⁷ Ta wane e sukwai fasi kai lufia kafo eri, fasi e ai kesi babataesia toa nai ki, na kera ṉalia tha Spirit Abu ’uri kulu lau boo?

⁴⁸ Ma nia sorea keki ba bataesida ana thatana ṉa Lord. Mania kera ṉata kwaitakoi isana sa kai to isada sulia fa boṉi eki.