Luke 23 - To'abaita Scripture NT

Tha Jisas 'e takwe 'i na'ofana tha Paelat

¹ Sui na figua 'ana to'a naana'o 'eki sui keka ngalia tha Jisas sana tha Paelat.

² Ma keka thafali fa'arongoa tha Paelat na garolaa na kera feengi nia 'ania, “Wane ne'e 'e talai garo 'ana kule'e to'a kamali'a. Nia 'e lufia imole ki kesi falea takisi fana Sisa, ma ka 'alangi nia 'ana Kraest, na king.”

³ Paelat ka soeto'ona Jisas, “'Oe na king 'ana Jiu ki nena?” Jisas ka lu'ua 'una 'eri, “'O tala fa'arongo 'ania neri.”

⁴ Sui Paelat ka fa'arongo 'ana to'a naana'o 'ana wanenifo'a 'eki ma figua 'eri, “Nau kwasi fulato'ona bo'o ta si doo ne garo bia wane ne'e.”

⁵ Sui ma keka suusu'u bona'a 'una 'eri, “Nia 'e boora'ea imole ki sui 'i Jiudia 'ana to'odoo nia ki, 'ita mai 'i Galili ka fula 'i Jerusalem.”

⁶ Si manga 'e rongoa si doo 'eri, Paelat ka soeto'ona mada sa nia wane fasi Galili.

⁷ Si manga na nia 'e thaito'omana Jisas 'e nii faara na suukwa'ia tha Herod, nia ka falea keki ngalia tha Jisas sana tha Herod, sulia nia 'e nii la'u bo'o 'i Jerusalem 'ana si manga 'eri.

⁸ Ma si manga tha Herod 'e rikia tha Jisas, nia ka se'ethaathala 'asia na'a, sulia si manga 'e tau 'asia na'a, nia 'e thathami rikia tha Jisas. Fasia taa na 'e rongoa ki suli nia, nia ka thathamia sa Jisas kai ilia ta si doo ni kwelelaa 'ania.

⁹ Nia ka soeto'ona 'ana soeto'onalaa 'oro ki, sui taa Jisas si lu'ua bo'o 'ana ta si doo.

¹⁰ 'Aina to'a naana'o 'ana wanenifo'a ki ma wane to'odoo 'ana biibirangaa kera takwe la'u bo'o kula 'eri, kera suusu'u bona'a ura feengilana ta'alaa faafi nia.

¹¹ Sui tha Herod bia wane ni omea nia ki keka fa'awaela, ma keka 'onionga 'ani nia. Keka fa'a'afisi nia 'ana maku tekwa na rikilana 'e le'a sui keka falea ka oli sana tha Paelat.

¹² Fa thato 'eri Herod bia Paelat keka kwaimaani sulia na'o mai keero'a na ma'alimae ki.

¹³ Paelat ka 'ailia na to'a naana'o 'ana wanenifo'a ki, wane kwaitalai ki ma figua 'eri te'e si kula,

¹⁴ ma ka sore'a 'i sada, “Kamalu'a mulu ngalia mai wane ne'e saku na mulu alua garolaa faafi nia, na nia ne thafalia se'esulalaa ma'alutana imole kamalu'a ki. Nau ku kelesia ma'alutamalu'a, ma a'i kwasi rikia bo'o ta si garolaa 'ana taa ki na mulu feengia faafi nia.

¹⁵ Herod mena ka a'i la'u bo'o, sulia nia 'e olita'i nia bana mai sakalu'a. 'Uria na mulu rikia, nia 'e a'i si ilia bo'o ta si doo fasia na kai maelia.

^16-17 Adelana bo'o, nau kwai falea bakua si kwaakwa'ea fana sui kwa luka 'ani nia ka lae.”

¹⁸ Sui taa na figua laula'u 'eri keka 'ai, “Thaungi nia, sui 'oko lukea mai tha Barabas famali'a!”

¹⁹ (Tha Barabas kera alua 'i laa dele uria na 'e thafalia firua ba'ita 'i laa na toaa susu 'eri, bia ka thauwane.)

²⁰ Paelat 'e thathamia fasi kai lukea tha Jisas, nia ka gani kera la'u.

²¹ Sui taa, keka 'ai bada 'una 'eri, “Thaumaelia 'ana 'airarafolo, thaumaelia 'ana 'airarafolo!”

²² Ma ulu na si manga ka sore'a, “Ura taa? Nga ta'aalaa taa na wane ne'e 'e ilia? Nau kwasi fulato'ona bo'o ta si doo na tala'ana kai maelia. Adelana bo'o nau kwai falea kwaakwa'ea fana sui kwa luka 'ani nia ka lae.”

²³ Ma figua 'eri keka bi'i 'ai ka talo fata'i, keka suusu'u bona'a uria na nia kai mae 'ana 'airarafolo, ma 'ailaa kera ka siitatha bona'a.

²⁴ Ma tha Paelat ka thaunga'i manataa uria na kai falea si ganilaa kera.

²⁵ Nia ka luka 'ana wane na kera 'uu 'ania laa dele ura thafalilana firua ba'ita ma ka thauwane, ka lae maa, wane na kera gani uria, ma ka falea tha Jisas fada uria na keki ilia taa na kera thathamia 'ani nia.

Maelana Jisas 'ana 'airarafolo

²⁶ Si manga wane 'ana omea ki kera tolea tha Jisas ka lae na'a, keka ra'ua tha Saemon fasi Saerin, wane 'e fula la'u bana mai fasia ma'etoaa 'i thara, ma keka alua nga 'airarafolo 'eri gwauna 'abana keka su'unga'i nia kai ngalia buira tha Jisas.

²⁷ Ma te'e figua ba'ita na kera lae kau 'i buira. Tei kini ki kera ni la'u bo'o laa figua 'eri, na kera isigwau ma keka angisia.

²⁸ Nia ka abula uri kera ma ka sore'a, “Kini ki 'i Jerusalem 'ae, a'i musi angi la'u uri nau, angi uri kamalu'a tala'amalu'a ma wela kamalu'a ki.

²⁹ Sulia si manga kai fula mai, na muki sore'a, ‘Le'a 'asia na'a fana kini na kesi too 'ana wela, na kini ki na kera 'aba'ato ma a'i kesi fa'asusu!’

³⁰ Sui “ ‘keki sore'a sana fa tolo loo ki, “Thada mai faafi kamali'a!” “Ma sana fa ua ki, “Thuu faafi kamali'a! ” ’

³¹ Sulia mada sa imole ki keka ilia si doo 'una 'eki si manga na 'ai 'e katha, taa na kai fuli si manga 'e laalanga?”

³² Roo wane la'u bo'o, wane ni bili ki, kera tolea la'u bo'o bii nia uria na keki thaungida.

³³ Si manga na kera fula 'ana kula na kera 'alangia 'ana Gwa Leelete, keka tarufania sulia 'airarafolo si kula 'eri, bia roo wane 'eri, te'e wane 'ana bali 'aba a'ola, ta wane 'ana bali 'aba mauli.

³⁴ Jisas ka sore'a, “Maka, manatalube kera, sulia kera dora 'ania taa na kera ilia.” Ma keka thatho 'ana daisi uria maku nia ki.

³⁵ Ma figua 'eri keka bubu, ma to'a ni kwaitalailaa keka ilamata'i nia. Keka sore'a, “Nia 'e fa'amarukia to'a 'ee'eta ki, alamatania kai fa'amaruki nia tala'ana mada sa nia na Kraest, wane God 'e filia.”

³⁶ Nga to'a ni omea keka lae mai ma keka fa'awaela 'ani nia. Keka falea na waen 'afae fana,

³⁷ ma keka sore'a, “Mada sa 'oe king 'ana Jiu ki bo'o, fa'amaruki 'oe tala'amu!”

³⁸ Keka fa'angadoa te'e si keekedalaa 'i aa karangia gwauna, na 'e sore'a, “KING 'ANA JIU KI NE'E.”

³⁹ Te'e wane 'ana roo wane na kera taru bi nia ka ngata labata'i nia ka 'una 'eri, “'Oe a'i la'u nga Kraest ba? Fa'amaruki 'oe bi kamare'a!”

⁴⁰ Sui ta ruana wane ka ngatafia, ka sore'a, “'Osi ma'u bo'o 'ana tha God, si manga 'oko todaa mena kwaakwa'ea fana maea?

⁴¹ Kwaakwa'ea na koro todaa 'e kokota, sulia koro todaa uria doo ta'aa ki na koro ilia ki. Sui wane ne'e 'e a'i si ilia bo'o ta si doo ne garo.”

⁴² Sui nia ka sore'a, “Jisas manatato'oku si manga na 'o lae mai 'i laa 'inotoa 'oe.”

⁴³ Jisas ka sore'a sana, “Mamana ku fa'arongo 'iemu, tara'ena 'oki too bi nau 'i laa fanua le'a 'i thalo.”

Maelana tha Jisas

⁴⁴ Nia 'e fula na'a 'inito'ona fa thato, ma ma'e rodo ba'ita ka thuufia fanu laula'u 'eri laalae ka fula 'ana uula kade'e manga 'i tha'ulefi,

⁴⁵ sulia na laala'a fasia na thato 'e a'i. Ma maku ba'ita na 'e taru 'i laa Bi'u Abu tha God ka sera 'ana roo 'abe doo.

⁴⁶ Ma tha Jisas ka 'ai 'ana te'e linge'e doo ba'ita, “Maka, 'i laa 'abamu nau ku falea kau mangoku.” Si manga na 'e sore'a si doo 'eri, nia ka 'asimango 'ana mango'e doo 'ii'isi nia.

⁴⁷ Ma wane naana'o 'ana omea, 'e rikia taa na 'e fuli neri ka tangoa tha God ka sore'a, “'E mamana, wane ne'e wane 'e kokota.”

⁴⁸ Si manga na figua na kera ofu mai ura rikilana thauwanea 'ana 'airarafolo, keka rikia si doo na 'e fuli neri, keka oli luma kera 'ana liodilalaa ne ba'ita.

⁴⁹ Sui taa, nga wane kwaimaani tha Jisas ki ma tei kini ki la'u bo'o na kera lae bii nia fasi Galili, keka takwe daa ba mada, keka rikia bada si doo 'eki sui.

Betalana se'edoo tha Jisas

⁵⁰ Ma te'e wane thatana tha Josef, nia te'e wane 'ana wane naana'o 'ana Jiu ki, wane 'e le'a ma ka kokota,

⁵¹ nia 'e a'i si ala faafia na manataa ma birangaa to'a 'eri. Nia wane fasi Jiudia, 'ana te'e ma'etoaa na kera 'alangia 'ana 'Arimathia, ma nia ka ma'asia la'u bo'o na 'inotoa tha God.

⁵² Nia ka lae sana tha Paelat, ka soeto'ona uria na se'edoo tha Jisas.

⁵³ Sui ka sifolongania 'i ano, ka 'afua 'ana na maku kwaakwao'a, ma ka alua laa na kwainga'ia na 'e 'ilia laa na fau, na 'e a'i kesi aluwane 'uu laana.

⁵⁴ Nia na bongi 'ana kwaithathailaa, ma karangia na Sabat kai thafali.

⁵⁵ Nga kini ki na kera lae mai bia tha Jisas fasia 'i Galili, keka lae la'u bo'o bia tha Josef, ma keka rikia kwainga'ia 'eri, ma keka rikia alulaa na kera ilia 'ana se'edoo 'eri.

⁵⁶ Sui keka oli luma ma keka kwaithathai 'ana gwai na makwa le'a ki. Sui uria na 'e Sabat na'a, keka adesulia biibiranga, keka mamalo nada.