Luke 20 - To'abaita Scripture NT

Soeto'onalaa sulia suukwa'ia tha Jisas

¹ 'Ana te'e fa thato, si manga tha Jisas 'e to'odoo sana imole ki laa bi'u abu tha God ma ka ngata sulia na fa'arongoa le'a, na wane naana'o 'ana fo'aa ki ma to'a ni to'odoo 'ana biibirangaa ki, bia tei wane naana'o ki la'u ki keka lae mai sana.

² Keka soeto'ona, “Fa'arongo kamali'a si mai, 'ana suukwa'ia ta na 'oki ilia si doo ne'e ki? Tei na falea suukwa'ia 'eri 'i femu?”

³ Jisas ka lu'uda, “Nau kwai soeto'omulu'a 'ana te'e soeto'onalaa. Fa'arongo nau,

⁴ si manga tha Jon kai babtaesi, suukwa'ia 'eri 'e lae mai fasia God mada fasi wane ni bana?”

⁵ Ma keka u'unutania ma'alutadalu'a ma keka sore'a, “Mada sa kuki sore'a, ‘Fasi hefen,’ nia kai soeto'ona, ‘Uria taa na musi fa'amamanea?’

⁶ Sui taa mada sa kuki sore'a, ‘Fasi wane ni bana,’ figua ne'e keki 'uu fau kulu'a, sulia kera fa'amamanea tha Jon na profet baa.”

⁷ Ma keka lu'ua, “Mili dora 'ania fei na suukwa'ia 'eri 'e lae mai fasia.”

⁸ Ma Jisas ka sore'a, “Nau sa kwa fa'arongo kamalu'a la'u bo'o 'ana na suukwa'ia taa na ku ilia 'ana si doo ne'e ki.”

Tarifula sulia na to'a raalada ta'aa ki

⁹ Nia ka fa'arongoa la'u na tarifula ne'e sana figua 'eri, “Te'e wane 'e fasia te'e o'ole'e faene, ka alua tei wane ki keka lio sulia sui nia ka lae ura te'e fanua daa sulia si manga 'e tau.

¹⁰ Si manga na foana 'ai ba ki 'e rafo na'a, wane 'eri ka falea te'e wanenira nia sana wane baa ki fasi keka falea tei fo'e doo ki fana fasia o'ole'e 'ai ba. Sui taa wane baa ki keka kwa'ea wanenira ba sui keka arasia ka tona oli bana.

¹¹ Nia ka falea la'u ta wanenira nia sui keka kwa'ea la'u bo'o, ma keka fa'ase'enoni 'ani nia sui keka tona olifania bada.

¹² Nia ka falea la'u uula wanenira ma keka kwa'e maala 'ania sui keka tari nia fasi kula 'eri.

¹³ Sui wane 'eri ka manata 'una 'eri, ‘Taa na kwai ilia? Nau kwai falea kaluwane liiliothau nau, mada keki faare'inoto 'ani nia.’

¹⁴ Si manga na kera rikia, keka ngata ma'alutada kwailiu. Keka sore'a, ‘Wane na kai ta'e fulingana maka nia ne'e, kulu thaungia fasi kuka ngalia na doo ki na maka nia ki 'i fakulu'a.’

¹⁵ Ma keka 'abaa kau 'i thara 'ana o'ola 'eri sui keka thaumaelia. “Ma taa na wane na o'ola nia kai ilia?

¹⁶ Nia kai lae mai ma ka thaumaelia to'a 'eki sui bo'o, sui ka falea na o'ola ba fana tei wane ki la'u.” Si manga figua 'eri kera rongoa na tarifula 'eri, keka sore'a, “God si alamatania si doo 'una 'eri si fuli!”

¹⁷ Jisas ka lio fiifii uri kera ka soeto'oda, “Taa na to'olonga'ilana si keekeda abu ne'e, “ ‘Gwa fau na wane ni kasibi'ulaa ki kera lalakwatania, nia na gwa fau to'ongado 'ana bi'u 'eri.’

¹⁸ Imole ki na kera taofa'i kera 'ana fau 'eri keki maga tatari'a, mani tei bana na gwa fau 'eri 'e 'asia faafia kai maga furifuri.”

¹⁹ Ma si manga 'eri 'uu bo'o na to'a ni to'odoo 'ana biibirangaa bia na to'a gwaunga'i 'ana fo'alaa ki keka thathamia keki kani nia bona'a sulia kera thaito'omana na nia 'e ngata suli kera. Sui taa keka ma'u 'ana figua 'eri.

Falelana takisi fana tha Sisa

²⁰ Ma keka lio laalae suli nia, keka falea to'a na kera abula mala to'a na kera kokota, ura keki ura'i nia. Kera thathamia keki fulato'ona ta si doo na tha Jisas kai sore'a na kai garo fasi keka ra'u nia faafia, fasia keki fale nia fana wane gwaunga'i 'i Rom.

²¹ Ma to'a baa ki na keki ura'i nia keka soeto'ona, “Wane ni to'odoo, mili thaito'omana 'o sore'a ma 'oko to'oa taa na 'e mamana, ma 'oe 'o rikia to'a ki sui bana ka boobola ma 'oko to'oa na birangaa tha God 'ana kokotolaa.

²² Nia 'e kokota ura na mika falea na takisi fana tha Sisa mada 'e a'i?”

²³ Nia ka riki thaito'omana bana na manatale'edoo ta'aa kera maka fa'arongo kera,

²⁴ “Faatania si mai ta fa seleni. Tei na nununa, ma thatana na 'e ni 'ania?” Keka sore'a, “Nga Sisa.”

²⁵ Nia ka sore'a 'i sada, “'Una 'eri moko falea si doo nga Sisa fana nga Sisa, ma doo tha God fana tha God.”

²⁶ Ma 'e 'afeta'i uria na keki fulato'ona ta si doo na kai sore'a na keki kani nia faafia 'i maana figua ba'ita. Ma keka kwele 'asia na'a 'ana lu'ulaa nia ki ma keka too eno bona'a.

Na soeto'onalaa sulia na tata'elaa fasia maea

²⁷ Ma tei Sadusii ki na kera sore'a na 'e a'i ta tata'elaa fasia maea, keka lae mai sana tha Jisas bia te'e soeto'onalaa.

²⁸ Keka sore'a, “Wane ni to'odoo, Mosis 'e kedaa 'i fakulu'a mada sa ta wane ka mae, ma nia ka a'i 'ana ta wela, na do'orana kai folia kuka'e na 'e 'akwasia neri, fasi keka too 'ana ta wela ura kai ngalia thatana wane mae 'eri.

²⁹ Aia, fiu do'ora ki keka too te'e si kula. Wane na'o 'e folia te'e kini, sui ka mae la'u bana si manga keero'a a'i 'uu 'adaro'a ta wela.

³⁰ Ruana wane ka folia sui ka mae,

³¹ sui uula wane ka folia, ma ka lae bana 'una 'eri laalae fiu waido'ora 'eki keka mae te'e fau ma ka a'i bana ta wela.

³² Sui kini baa ka mae la'u bo'o.

³³ Aia si manga na God kai tata'ea to'a ni sui fasi maea, tei 'i ada bo'o na kuka'e nia neri sulia fiu waido'ora 'eki kera folia te'efau kini 'eri?”

³⁴ Jisas ka lu'uda ka sore'a, “Imole ki 'ana uni'i wane ne'e na keki folikini ma keki to'owane.

³⁵ 'Ana si manga 'e ni 'uu mai, imole ki na God 'e rikifaarada ura keki tata'e fasi maea, 'e a'i kesi folikini mada kesi to'owane,

³⁶ kera sa keka mae la'u a'i, sulia keki 'uria na'a na ensolo ki. Kera na wela tha God ki, wela na kera tata'e fasi maea.

³⁷ Ma 'ana manataa na to'a mae ki keki tata'e fasi maea mada 'e a'i, tha Mosis 'e fa'amamanea si manga 'e keekeda sulia 'ai baa na era 'akofia. Sulia tau na'a buira tha 'Abraham, 'Aesak ma tha Jakob kera mae sui na'a, nia ka 'alangia Lord 'ana, ‘God tha 'Abraham, God tha 'Aesak ma God tha Jakob.’

³⁸ Nia na God to'a kera mae 'e a'i, nia God to'a na kera maruki, ma 'ana tha God kera maruki te'efau.”

³⁹ Tei wane to'odoo ki 'ana biibirangaa keka sore'a, “Wane ni to'odoo, lu'ulaa 'oe 'e kokota!”

⁴⁰ Ma ta wane si manata bona'a ura soelaa uria soeto'onalaa ki.

Tha Jisas wela 'ana kwalafaa tha Defeta

⁴¹ Tha Jisas ka sore'a 'i sada, “Uria taa na keka sore'a na Kraest na kaluwane tha Defeta?

⁴² Defeta talani nia 'e kedaa laa buka ba 'ana Saams ki, “Tha God 'e sore'a sana Lord nau, 'ono 'ana kula ni gwaunga'i 'ana bali 'aba a'ola nau,

⁴³ uria na kwai alua na ma'alimae 'oe faara 'aemu.”

⁴⁴ “Defeta ka 'alangi nia 'ana ‘Lord’. Ade 'ufita na nia kai 'uria kaluwane nia?”

⁴⁵ Si manga na figua 'eri keki fafurongo bada, Jisas ka sore'a sana disaepol nia ki,

⁴⁶ “Muki fiia na to'a ni to'odoo 'ana biibirangaa ki. Kera thathamia lae kwailiu faafia na to'oni tekwa ki, ma keka thathamia imole ki keka 'arata'i le'a 'ani kera maana usia ki, ma keka thathami'i 'onolaa 'i laa si kula 'inoto ki fana 'onolaa laa bi'u ni fo'alaa, ma kula ni faafangaa ki.

⁴⁷ Keka bilia aludooa kini 'oru ki, ma ura rikilana bana, keka fo'a 'ana fo'aa ki na 'e tekwa. To'a 'eki keki todaa kwaakwa'ea na kai ta'a 'asia na'a.”