Luke 2 - To'abaita Scripture NT

Futalana Jisas

¹ 'Ana fa thato 'eki, na wane'inoto faafia fanua ki na Rom 'e lio sulia, thatana na tha 'Ogastas. Nia 'e alua te'e si bae'a fiifii fana na imole ki sui 'ana fanua ki 'i laa 'inotoa nia, fasi keka lae 'ana fanua koko'o abu kera ki ura kedathatalaa.

² Nia etana bo'o kedathatalaa na kera ilia si manga tha Kirinias 'e wane'inoto faafia profens 'i Siria.

³ Ma imole ki sui, keka lae ura kedalana thatada, teete'e imole ka oli uria ma'etoaa nia.

⁴ Tha Josef 'e lae la'u bo'o mai fasia ma'etoaa nia 'i Nasaret, 'i laa balifanua 'i Galili, maka lae ura balifanua 'i Jiudia, ura ma'etoaa tha King Deved na kera 'alangia 'ana Betlehem, sulia tha Josef na wane fasia kwalafaa tha Deved.

⁵ Tha Josef 'e lae ura kedalana thatana bia ni Mere, na kini ba kera fa'a'adoa 'i fana. Ma 'ana si manga 'eri, ni Mere 'e toofa 'oo'oga na'a.

⁶ Ma si manga kero too 'i Betlehem, ni Mere ka se'efii na'a ura fa'afutalaa.

⁷ Ma nia ka fa'afutaa wela tootona'o nia, maka kookofia 'ana si maku, maka alua ka teo 'i laa na si taatafe ni fangalaa buluka ki, sulia 'e a'i na'a ta kula 'i laa na ta bi'u ni toolaa.

'Ensolo ki kera fa'arongo 'ana futalana tha Jisas

⁸ Nga to'a ni fonoto'i kalia sifisifi ki, kera too karangia la'u bo'o si kula 'eri, keki lio 'ada sulia sifisifi kera ki 'i laa rodo 'eri.

⁹ Ma 'ensolo tha God ka faata'i 'i sada, ma laala'aa tha God ka rara faafida, ma keka ma'u 'asia na'a.

¹⁰ Ma 'ensolo 'eri ka ba'e 'una 'eri fada, “'e a'i musi ma'u la'u, sulia nau ku ngalia mai si fa'arongoa le'a na kai falea se'ethathalalaa fana imole ki sui.

¹¹ 'Itara'ena te'e wane na kai fa'amaruki kamalu'a 'e futa na'a 'i Betlehem, laa fanua tha Deved, ma nia na Kraest na Lord.

¹² Ma si maamalafoa famalu'a 'e 'una 'eri: Muki rikia te'e kali wela na kera 'afua 'ana si maku, ma keka teofania 'i laa na si taatafe ni fangalaa buluka ki.”

¹³ Tona mena, mole'e 'ensolo ki fasia 'i thalo keka faata'i na mai bia 'ensolo ba, ma keka fa'aba'itaa tha God keka 'una 'eri,

¹⁴ “Le'alaa fana tha God 'i thalo. Ma enenoa fana imole ki sui 'i fanua na iano na tha God 'e ele sulida.”

¹⁵ 'I buira 'ensolo 'eki kera oli na'a 'i thalo, wane 'eki na kera lio sulia sifisifi ki keka ba'e 'una 'eri fada kwailiu, “Kulu lae fasi 'i Betlehem, fasi kuka rikia na doo na tha God 'e fa'arongo kulu 'ania neri.”

¹⁶ Keka lae 'eli'eli, ma keka fulato'ona ni Mere bia tha Josef, ma keka rikia kali wela 'eri 'e teo 'ana laa na si taatafe ni fangalaa buluka ki.

¹⁷ Ma si manga kera rikia na'a, keka ba'e sulia doo na 'ensolo 'eki kera fa'arongo kera 'ania sulia wela 'eri.

¹⁸ Ma imole ki na kera rongoa, keka kwele 'asia na'a 'ana si taa na kera fa'arongo 'ania.

¹⁹ Ma ni Mere ka manata sulia doo 'eki sui, maka taingania 'i liona.

²⁰ Ma to'a ni fonoto'i kalia sifisifi ki keka oli, ma keka tangoa tha God ura doo ki sui na kera rongoa ma keka rikia 'e mamana na'a mala ba'elana 'ensolo 'eri 'e sore'a 'i fada.

²¹ Buira kwalu fa thato 'e fula na'a, 'ana si manga wela 'eri kai kwa'ikaakali, keka 'alangia na'a 'ana tha Jisas, si thata ba na 'ensolo 'e sore'a fana ni Mere si manga ni Mere si toofa 'oo'oga 'uu.

Kera ngalia tha Jisas 'i laa na Bi'u Abu

²² 'E fula na'a 'ana si manga fasi tha Josef ma ni Mere keki lae ura fa'afalulaa, sulia biibirangaa ba tha Mosisi 'e alua keki ilia buira tharewelalaa, keka ngalia wela 'eri 'i laa na Bi'u Abu tha God 'i Jerusalem, fasi keka falea fana tha Lord,

²³ mala keekedalaa sulia biibirangaa tha Lord 'e 'una 'eri, “Wela wane uluna'o ki keki alu talimate 'i fana tha Lord.”

²⁴ Keka falea la'u bo'o afufulaa 'ana roo fa ruruu ki, mada sa 'e a'i, ta roo fa bola, sulia biibirangaa tha God 'e thathamia ura fa'afaalulaa buira tharewelalaa.

²⁵ Ma 'ana si manga 'eri, te'e wane thatana tha Simion 'e too 'i Jerusalem. Nia te'e wane 'e kokota, ma nia ka too 'ana ma'ulaa tha God, maka too ni kwaima'akwalilaa bana ma'asia si manga tha God kai fa'amarukia imole ki 'i Israel. Na Ano'edoo Abu 'e too 'ani nia,

²⁶ maka sore'a nia kai maruki laalae ka fula 'ana si manga nia kai rikia na Kraest na tha God 'e alangania kai fa'amarukia imole nia ki.

²⁷ Ano'edoo Abu ka talaia tha Simion ura laa na Bi'u Abu tha God, maka fulato'ona tha Josef bia ni Mere si manga na kero ngalia mai kaliwela 'eri na kera 'alangia 'ana tha Jisas fasi keka ilia si doo ki na biibirangaa 'e sore'a fasi keka ilia 'ana wela 'eri.

²⁸ Tha Simion ka 'olia wela 'eri, maka fa'aba'itaa tha God ka 'una 'eri,

²⁹ “God 'ae, na alanga'ia ba 'o alangania 'i saku 'e mamana na'a, alamatania wane ni raa 'oe kai lae na'a 'ana enenoa 'oe.

³⁰ Sulia ku rikia na'a 'ana maaku na wane na 'o falea mai fasi kai fa'amarukia imole ki,

³¹ nia na wane 'eri na 'o kwaima'akwali 'ani nia fasi imole ki sui keka rikia,

³² nga la'afa fana faata'ilamulaa 'i sana Gentael ki, ma fa'a'inotolana imole 'oe ki 'i Israel.”

³³ Ma maka ma thainana wela 'eri keka kwele 'asia na'a si manga keero'a kero rongoa doo 'eki tha Simion 'e sore'a sulia wela 'eri.

³⁴ Sui tha Simion ka 'arata'i le'a 'ani kera, maka ba'e 'una 'eri fana ni Mere, thainana wela 'eri, “Tha God 'e filia 'uu na mai wela ne'e, ma imole 'oro ki 'i Israel keki fulato'ona marukia suli nia, ma 'orolada la'u bo'o keki fulato'ona maea sulia kera kesi fa'amamanea. Nia nga maamalafoa fasia tha God, sui imole 'oro ki keki lalakwata'i nia,

³⁵ fasia doo agwa 'i laa manatada kai too laala'a. Mere 'ae, liodilalaa ba'ita kai fulato'omu, ma kai 'uria ta 'ila na 'e to'e 'oe, na kai fii 'i laa mangomu.”

³⁶ Ma te'e 'oru kini 'e too la'u bo'o si manga 'eri, thatana ni 'Ana, ma nia te'e profet la'u bo'o, maka kuke'e na'a. Nia thaari tha Penuel, 'ana kwalafaa tha Asa. Si manga 'e thaari'i 'uu, nia 'e to'owane maka too bia ara'i nia sulia fiu fa ngali bo'o,

³⁷ sui nia ka 'oru ka too mai ka fula 'ana kwalu taafulu ma fai fa ngali. Nia ka too ngado 'i laa Bi'u Abu tha God. Ma 'ana si manga ki sui bana nia ka abu fasi fangalaa, maka too 'ana fo'alaa, ma 'ana faarebaitalaa 'ana tha God 'ana fa thato ma farodo ki sui bana.

³⁸ 'Ana si manga 'eri la'u bo'o, nia 'e fulato'ona tha Josef ma ni Mere, maka tangoa tha God, maka ba'e sulia wela 'eri fana imole ki sui na kera ma'asia si manga tha God kai fa'amarukia imole ki 'i Israel.

³⁹ Si manga tha Josef ma ni Mere kera fa'asuia ililana doo ki sui na biibirangaa tha God 'e gani uria, keka oli na'a ura ma'etoaa kera 'i Nasaret, 'i laa na balifanua 'i Galili.

⁴⁰ Ma wela 'eri ka ba'ita mai, maka suukwa'i, maka too 'ana lioto'oa. Ma mamanaa ki tha God ka too biia.

Jisas 'e ni laa na Bi'u Abu tha God

⁴¹ 'Ana fa ngali ki sui, maka ma thainana tha Jisas kera lae 'i Jerusalem uria na Faafangaa 'ana tathafaafilaa.

⁴² Si manga tha Jisas 'e fula 'ana taafulu fa ngali ma roo fa ngali, keka lae la'u bo'o 'ana faafangaa 'eri sulia biibirangaa kera.

⁴³ 'I buira faafangaa 'eri, maka nia ma thainana keka oli nadaro'a. Sui taa, keero'a kesi thaito'omana bo'o na tha Jisas 'e too 'uu bana 'i Jerusalem.

⁴⁴ Kero fiia 'adaro'a sa 'e lae na'a bia laea ba'ita 'eri, ma keero'a keka lae nadaro'a sulia fa thato laula'u sui fata'i keka bi'i thafali rofe 'i ma'alutana inalada, ma imole kwaimani keero'a ki.

⁴⁵ Ma si manga kera rofe ma kesi riki nia, keka oli ma keka rofe la'u mai 'i Jerusalem.

⁴⁶ Buira uula fa thato, keka bi'i fulato'ona 'i laa na Bi'u Abu tha God. Nia 'e too 'ana biia wane ni to'odoo ki 'i Jiu, kai fafurongo maka soeto'oda 'ana.

⁴⁷ Ma imole ki sui na kera rongoa ngatalana, keka kwele 'asia na'a 'ana tha'ito'ome'edoolaa nia ki, ma lu'ulaa nia ki.

⁴⁸ Ma si manga maka nia ma thainana kero riki nia, keka kwele 'asia na'a. Ma thainana ka sore'a 'i sana, “Kaluwane nau 'ae, ura taa na 'oko ade 'une'e 'ani kamare'a maka 'oe? Maka 'oe ma ni nau, mere rofe mai ura 'oe, ma manatamare'a ka isifuufuli 'asia na'a.”

⁴⁹ Ma nia 'e lu'uda ka 'una 'eri, “Ura taa na moko rofe mai uri nau? Kamaro'a a'i mosi thaito'omana bo'o nau kwai too 'i laa bi'u Maka nau?”

⁵⁰ Sui taa, kesi thaito'omana bo'o ma'aluta'ilana si ba'ea na 'e sore'a 'i sadaro'a.

⁵¹ Sui, tha Jisas ka oli na'a bii keero'a uria 'i Nasaret, maka ade sulia ba'eladaro'a. Ma thainana ka taingania si doo 'eki sui laa liona.

⁵² Tha Jisas ka ba'ita mai 'ana se'edoo ma 'ana lioto'oa, ma God bia imole ki keka se'ethaathala la'u bo'o suli nia.