Luke 19 - To'abaita Scripture NT

Tha Sakeas

¹ Jisas 'e fula 'i Jeriko ma ka tatha kau 'i ei.

² Te'e wane thatana tha Sakeas 'e too 'i kula 'eri, nia na wane 'inoto 'ana to'a ni konilana takisi, ma te'e wane riki'i doo.

³ Nia ka thathamia kai rikia tha Jisas, sui ka 'afeta'i 'i fana sulia 'e nguunguru, ma konia 'eri ka su'usi nia.

⁴ Ma nia ka fita kau na'o ma ka ra'afia te'e sikamo, sulia Jisas 'e lae mai sula tala 'eri.

⁵ Si manga Jisas 'e fula si kula 'eri, nia ka lio 'ala'a ma ka ba'e uri nia, “Sakeas, 'o sifo 'eli'eli mai sulia ni nau kwai lae kau 'i luma 'oe tara'ena.”

⁶ Nia ka sifo 'eli'eli mai ma 'ana se'ethaathalalaa ka tolea tha Jisas luma nia.

⁷ Imole ki sui kera rikia si doo 'eri ma keka thafali 'uu'ubulu ta'aa 'una 'eri, “Nia 'e lae 'i luma wane abula ta'aa.”

⁸ Sui ma tha Sakeas ka tata'e ma ka ba'e 'una 'eri ura tha Lord, “Lord, nau kwai falea te'e bali 'ana aludooa nau ki fana imole siofa'a ki, ma mada sa ta imole na kwa kaubarea 'ana takisi, kwai du'ua fai si manga la'u 'i fada.”

⁹ Jisas ka sore'a 'i sana, “Tara'ena nga marukia 'e fula 'i laa luma ne'e, sulia wane ne'e na kaluwane tha Abraham la'u bo'o.

¹⁰ Sulia na Kaluwane imole 'e lae mai uria na kai rofe uria ma ka fa'amarukia to'a na kera dola.”

Na tarifula sulia olilana mai na wane ba'ita

¹¹ Si manga na kera rongoa si doo 'eki, nia ka fa'arongo kera 'ana te'e tarifula, ura kokotoladalaa uria na kera karangia na'a Jerusalem, ma imole ki sui keka sosa 'ada na 'inotoa tha God kai fuli bona'a si manga 'eri.

¹² Nia ka sore'a, “Te'e wane 'ana futaa wane'inoto ki 'e lae ura te'e fanua daa fasia na keki fa'a'inoto nia uria na kai king, sui ka oli mai.

¹³ Ma nia ka 'ailia te'e taafulu wanenira nia ki ma ka falea te'e taafulu fa mina ki 'i fada. Sui ka sore'a 'i sada, ‘Mulu raa 'ana malefo ne'e ki ka fula 'ana si manga kwai oli mai.’

¹⁴ “Sui wanenira nia keka lalakwata'i nia ma keka falea tei wane ni ngalingataa ki 'i buriana ma keka sore'a, ‘Kamali'a misi thathamia wane ne'e uria na kai king famali'a.’

¹⁵ Ka 'una 'eri mena keka fa'a'inoto nia bona'a ka king. Nia 'e oli mai ka 'ai uria wanenira nia ki, na 'e falea malefo baa ki fada, uria na kai soeto'oda ura fita malefo la'u na kera todaa si manga na kera raa 'ana malefo baa ki.

¹⁶ Etana wane 'e lae mai ka sore'a, ‘Nau ku todaa te'e taafulu fa malefo la'u.’

¹⁷ Ma wane'inoto 'eri ka sore'a, ‘'O raa le'a, wanenira le'a nau! Sulia na 'o mamana faafia si doo ki na 'e fa'ekwa, lio sulia te'e taafulu fa ma'e toaa ba'ita ki.’

¹⁸ Ruana wane 'e lae mai ka ba'e, ‘Wane'inoto, nau ku todaa lima fa malefo la'u bia malefo 'oe baa ki.’

¹⁹ Wane'inoto 'eri ka sore'a, ‘Lio sulia na lima fa ma'e toaa ba'ita.’

²⁰ Sui uula wanenira ka lae mai ka sore'a, ‘Wane'inoto na malefo 'oe baa ne'e. Nau ku betaa bakua laa te'e si maku.

²¹ Nau ku ma'u 'ani 'oe sulia 'oe wane suusuala. 'O ngalia na foana raa ki na 'osi ilia ki bamu'a.’

²² Ma wane'inoto nia ka sore'a, ‘Nau kwai falea kwaakwa'ea 'oe sulia ngatalamu, 'oe wane abulalamu ta'aa! 'O thaito'omana bamu'a nau wane suusuala, ku ngalia foana raa na kwasi ilia ki.

²³ Uria taa na a'i 'osi raa 'ana malefo nau, fasia si manga ku oli mai, nau kwai todaa la'u tei malefo, maana si malefo 'eki?’

²⁴ “Sui nia ka sore'a sana imole ki na keki takwe karangia, ‘Ngalia malefo 'ena fasi nia, sui moko falea fana wane na alua na te'e taafulu fa malefo.’

²⁵ Keka lu'ua, ‘wane'inoto, nia 'e too sui na'a 'ana taafulu fa malefo!’

²⁶ Nia ka sore'a, ‘Nau ku fa'arongo kamulu'a, to'a na kera too 'ana doo 'oro keki fale ka 'oro la'u fada, sui taa to'a na kesi too 'ana ta si doo, si doo fa'ekwa kera too mena 'ania keki ngalia fasi kera.

²⁷ Sui ma to'a na lalakwa 'ani nau kwai king fada, ngalia mai ma muka thaungida 'i na'o faku.’ ”

Jisas 'e lae mai ura Jerusalem mala na King

²⁸ 'I buira na tha Jisas 'e ba'e 'una 'eri, nia ka lae kau 'i na'o 'ani kera ura 'i Jerusalem.

²⁹ Ma si manga 'e fula karangia ma'etoaa 'i Bethfeis ma 'i Bethani, sana gwa ua na kera 'alangia 'ana 'Olif, nia ka arasia roo disaepol nia ki 'i na'o, ka sore'a 'i sadaro'a,

³⁰ “Moro lae laa ma'etoaa lakoo, si manga na moro fula 'i laa toaa 'eri, moki rikia te'e fa dongki bi'i ba'ita na kera kania kula 'eri, na ta imole si ta'elia 'uu. Moro lukea sui moko tolea mai.

³¹ Mada sa ta imole ka soe 'una 'eri, ‘Ura taa na moko lukea kali dongki 'ena?’ Moko sore'a, ‘Tha Lord 'e 'ato'ia.’”

³² To'a na kero lae kau na'o, keko rikia bona'a mala Jisas 'e sore'a.

³³ Si manga na keero'a lukea 'oko 'eri, na to'a dongki kera neri, keka soe, “Ura taa na moko lukea 'oko 'ana kali dongki 'ena?”

³⁴ Keero'a Keka sore'a, “Tha Lord 'e 'ato'ia.”

³⁵ Keka tolea mai sana tha Jisas, keka alua tei maku kera ki fafona dongki fa'ekwa 'eri, fasi tha Jisas kai ta'e fafona.

³⁶ Si manga na nia 'e lae kau, imole ki keka alua maku kera ki sula tala 'eri.

³⁷ Si manga na 'e fula sana tala na 'e lae na kau uria na fa ua na 'i 'Olifs, na konia laula'u 'eri 'ana disaepol nia ki keka thafali'i tangolana tha God 'ana linge'e doo ba'ita 'asia na'a, uria na si doo ba'ita ni kwelelaa 'ania ki na kera rikia.

³⁸ “Le'alaa fana na king na 'e lae mai 'ana thatana tha Lord!” “Enenoa 'i laa hefen lo, ma tangolaa fana tha God!”

³⁹ Tei Farasi ki la figua 'eri keka sore'a sana tha Jisas, “Wane ni to'odoo, 'o ngatafia disaepol 'oe ki fasi keka eno!”

⁴⁰ Nia ka lu'uda, “Ku fa'arongo kamalu'a, mada sa keka eno, na fau ne'e ki keki 'ai 'ana tangolaa!”

Jisas 'e angi uria Jerusalem

⁴¹ Si manga na 'e lae na mai uria 'i Jerusalem ma ka rikia toaa susu 'eri, ma nia ka angi uria.

⁴² Ma ka sore'a, “Mada sa 'o thaito'omana, fa thato ne'e tara'ena nga taa na kai falea enenoa femu, sui nia 'e 'afeta'i ura na 'oki rikia.

⁴³ Fa thato ki kai fula faafi 'oe, si manga na ma'alimae 'oe ki keki lae mai, keki laakali fasi 'oe, keka kali 'oe ma keka su'usi 'oe 'ana kula ki sui.

⁴⁴ Keki nanga 'ani 'oe 'i tha'egano, ma wela 'oe ki bii 'oe. Kesi alua ta gwa fau si teo la'u 'i fafona ta gwa fau, uria na 'osi thaito'omana bo'o laelana mai tha God 'i samu.”

Tha Jisas 'e kotho laa bi'u abu tha God

⁴⁵ Si manga tha Jisas 'e kotho na kau laa Bi'u Abu tha God, nia ka thafali taria na to'a na kera usi 'ana doo maruki ki fana afufua.

⁴⁶ Nia ka fa'arongo kera, “Keekedaa Abu 'e sore'a, ‘na bi'u nau, na bi'u ura fo'alaa,’ sui kamalu'a muka bulasia na'a 'ana na kula ni bililaa.”

⁴⁷ Fa thato ki sui bana nia kai to'odoo laa bi'u ni fo'alaa. Sui na wane naana'o ki 'ana to'a ni fo'a ki, wane ni to'odoo 'ana biibiranga ki ma tei wane kwaitalai ki la'u keka ili uria thaungilanalaa.

⁴⁸ Sui kesi fulato'ona ta tathalaa ura ililanalaa, sulia figua 'eri kera ra'u bona'a 'ana ba'elana.