Luke 18 - To'abaita Scripture NT

Na 'Oru na 'e suusu'u

¹ Tha Jisas ka fa'arongoa disaepol nia ki 'ana te'e tarifula fasia ka faatania 'i sada na keki fo'a 'ana si manga ki sui bana, ma 'e a'i kesi feda fasia ililana.

² Nia ka sore'a, “Te'e wane ni soredoo 'ana keeketoa na 'e a'i si ma'u bo'o 'ana tha God, mada manata ba'italaa 'ana imole ki mena, 'e too 'i laa te'e ma'e toaa.

³ Ma te'e 'oru na 'e too la'u bo'o 'i la ma'e toaa 'eri 'e lae mai sana 'ana si manga ki sui bana ma ka soeto'ona, ‘Falea kokotolaa faku fasia ma'alimae nau ki.’

⁴ “Ma sulia si manga 'e tau nia 'e a'i si ilia. Sui laalae ka sore'a 'i sana tala'ana, ‘Do'anitaa ma'ulaa tha God 'e a'i si ni 'ani nau, ma a'i kwasi manata ba'ita bo'o 'ana imole ki,

⁵ sui mena 'ana, sulia 'oru ne'e 'e fula ka ngado bana, nau kwai rikia na nia 'e todaa ganilaa nia, sulia nau ku feda na'a 'ana rongolana ganilaa nia ki!’”

⁶ Ma tha Lord ka sore'a, “Rongoa taa na wane ni soredoo 'ana keeketoa 'e sore'a.

⁷ Ma God 'e a'i si tala'ana kai falea kokotolaa fana to'a filia nia ki na kera angi sana 'ana fa thato ma fa rodo ki sui? Ma nia kai takofa'ekwa nana 'ana ganilaa kera?

⁸ Ku fa'arongo kamalu'a, nia 'eli'eli kai falea na kokotolaa 'i fada. Sui taa si manga kaluwane imole kai fula, 'ufita nia kai fulato'ona tei imole na kera fa'amamane?”

Tarifula sulia na Farasi bia na wane ni konilana takisi

⁹ Jisas ka fa'arongoa la'u na tarifula ne'e sana imole ki na kera manata ngado bana 'ana kokotolaa kera 'i tala'ada, ma keka lio fa'ekwa 'ana tei imole ki la'u.

¹⁰ “Te'e roo wane kera lae ura fo'alaa 'i laa biu abu tha God, te'e Farasi bia te'e wane ni konilana takisi.

¹¹ Na Farasi 'eri 'e takwe talifili nia ka fo'a, ‘God, nau ku tango 'oe sulia nau 'e a'i kwasi 'uria tei imole ki la'u mala to'a ni bili ki, to'a ililana doo ta'aa ki, to'a olodola ki ma wane ne'e ni konilana takisi.

¹² Nau ku too fasi fangalaa roo si manga la te'e wiki ma kwa falea nga falea la'u bo'o na taafuula si doo ki 'ana aludooa nau ki 'i femu.’

¹³ “Sui ma wane ni konilana takisi ka takwe daa kau. Ma nia si kwaua mena 'ana maana uria 'i thalo, sui nia ka kwa'ea bana ruuru'una 'ana kwaimanatailaa, ka sore'a, ‘God, 'o tatakomi nau mai, wane ku abula ta'aa.’ ”

¹⁴ “Ku fa'arongo kamalu'a na wane abula ta'aa ne'e, na 'e oli luma nia, ma ka kokota maana tha God, a'i la'u na Farasi ba. Sulia na to'a na kera fafaka'o kera tala'ada keki fa'afa'ekwa kera, ma to'a na kera fa'afa'ekwa kera tala'ada na keki fa'aba'ita kera.”

Tha Jisas bia kaala wela ki

¹⁵ Imole 'oro ki keka ngalia mai kaala wela ki sana tha Jisas, uria na kai alu 'aba faafida ma ka 'arata'i le'a 'ani kera. Si manga na disaepol nia ki kera rikia keka soreda.

¹⁶ Sui tha Jisas ka 'ailia wela 'eki sana, ma ka sore'a, “Alamatania wela fa'ekwa ne'e ki kera lae mai saku, musi su'usi kera, sulia 'inotoa tha God doo fana imole ki na kera 'uria kaala wela ki.

¹⁷ Nau ku fa'arongo kamalu'a, tei bana na 'e a'i si todaa na 'inotoa tha God mala ta kali wela, nia 'e 'afeta'i ka kotho 'i ei.”

To'odoolaa sulia na wane riki'i doo.

¹⁸ Te'e wane gwaunga'i ka soeto'ona tha Jisas, “Wane ni to'odoo le'a 'ae, taa ni bo'o na kwai ilia fasi kwa todaa na marukia tooladoa?”

¹⁹ Ma tha Jisas ka sore'a 'i sana, “Uria taa na 'oko 'alangi nau 'ana wane ku le'a? Ta wane si le'a bo'o, talito'ona tha God bona'a.

²⁰ 'Oe 'o thaito'omana na ba'ea fifii tha God, ‘'Osi olodola, 'osi thauwane, 'osi bili, 'osi lole faafia ta imole, 'oki faareba'ita 'ana maka ma thainamu.’”

²¹ Wane 'eri ka olisia ka 'una 'eri, “Doo 'eki sui ku ade mai sulia si manga ku fa'ekwa 'uu.”

²² Si manga tha Jisas 'e rongoa, nia ka sore'a sana, “Te'e si doo na 'osi too 'uu 'ania. Usi 'ania 'oke doo 'oe ki te'e fau sui 'oko falea fana imole siofa'a ki, ma sui 'oki too 'ana aludooa 'i thalo. Sui 'oko lae mai, 'oko lae 'i buriaku.”

²³ Si manga nia 'e rongoa si doo 'eri, nia ka liodila 'asia na'a, sulia nia wane 'e riki'i doo 'asia na'a.

²⁴ Jisas ka lio uri nia ma ka sore'a, “Nia 'e 'afeta'i 'asia na'a ura to'a riki'i doo ura keki kotho la 'inotoa tha God!

²⁵ Nia 'e kwaiakauri uria na kamel kai kotho laa malekwadaa fa'ekwa maana ta fa 'ogila ka talua ta wane na 'e riki'i doo kai kotho laa 'inotoa tha God.”

²⁶ To'a ki na kera rongoa si ba'ea 'eri keka soe 'una 'eri, “Ma tei 'ana na kai maruki?”

²⁷ Jisas ka lu'uda, “Taa na 'e 'afeta'i fana imole ki 'e kwaiakauri bana fana tha God.”

²⁸ Pita ka sore'a 'i sana, “Kamali'a mili luka 'ana aludooa kamali'a ki sui, fasi miki lae bii 'oe!”

²⁹ Jisas ka sore'a 'i sada, “Ku fa'arongo kamalu'a, ta wane bana na 'e 'akwasia luma nia mada kuka'e nia, mada do'orana, mada waiwaena nia, mada maka ma thainana, mada wela nia ki fana 'inotoa tha God

³⁰ kai todaa la'u si doo 'oro 'i laa fanua nai iano ka talua la'u doo baa ki na 'e 'akwasia, ma kai todaa marukia tootoo si sui 'ana si manga na 'e ni 'uu mai.”

Uula si manga Jisas 'e ngata sulia maelana

³¹ Jisas ka tolea talifilia disaepol nia ki, ka fa'arongo kera, “Kuki lae uria 'i Jerusalem, ma keekedaa na 'aina profet ki kera kedaa ki sulia kaluwane imole kai fuli.

³² Keki fale nia 'i fana Jentael ki, ma keki fa'awaela 'i ana, keki ngata ta'aa iana ma keki ngisufi nia.

³³ Keki kwa'e nia, ma keki thaungi nia, 'i laa ulu fa thato sui, ka tata'e la'u bana.”

³⁴ Na disaepol 'eki kesi ma'alutania ta si doo 'ana doo 'eki. Na to'olonga'ilana si doo 'eki 'e agwa fasi kera, ma kesi thaito'omana taa na 'e ngata ki sulia.

Jisas 'e guraa wane maana 'e rodo

³⁵ Si manga tha Jisas karangia na kau 'i Jeriko, te'e wane maana 'e rodo 'e 'ono ninimana tala ura ganilaa.

³⁶ Si manga na 'e rongoa na figua 'e tatha, nia ka soe uria taa na 'e fuli neri.

³⁷ Ma keka fa'arongo nia, “Jisas fasia Nasaret na 'e tatha ne'e.”

³⁸ Nia ka 'ai kau, “Jisas, kaluwane tha Defeta, 'o tatakomi nau mai!”

³⁹ To'a na kera tatha kau 'i na'o keka sore nia, ma keka sore'a ura na kai eno, sui taa nia ka bi'i 'ai ba'ita fata'i, “Kaluwane tha Defeta, tatakomi nau mai!”

⁴⁰ Jisas rongo nia, ka takwe ma ka fa'arongoa keki tolea mai wane 'eri 'i sana. Si manga na 'e lae mai karangi nia, Jisas ka soeto'ona,

⁴¹ “Taa na 'o thathamia kwai ilia 'i femu?” Nia ka lu'ua ka sore'a, “Lord, nau ku thathamia kwai lio.”

⁴² Jisas ka sore'a 'i sana, “'Oki lio, 'i nunufana fiito'oa 'oe na 'oko 'akwaa.”

⁴³ 'Ana si manga 'eri 'uu bo'o nia ka lio bona'a, ma ka lae bona'a biia tha Jisas ma tangoa tha God. Si manga na figua ba kera rikia, kera mena keka tangoa la'u bo'o tha God.