Luke 1 - To'abaita Scripture NT

¹ Thiofilas 'ae, wane 'oro ki kera keekeda sulia doo ki na 'e fuli 'i ma'alutamali'a.

² Kera keekeda sulia doo ki na mili rongoa fasia to'a na kera rikia mai thafalilana doo 'eki sui, ma keka ngata mai sulia si fa'arongoa le'a 'eri 'i famili'a.

³ Nia bo'o neri, wane 'inoto Thiofilas 'ae, sulia 'ita mai 'ana thafalilana, ku rofe ma kwa soe la'u bo mai sulia doo 'eki na 'e fuli neri, nau ku manata mai sulia, 'e le'a ka tatha uria na kwai keekeda la'u bo'o sulia fulilana doo 'eki sui ka lae mai ka fula 'i tara'ena 'i femu.

⁴ Nau ku keekeda sulia doo 'eki fasi 'oko thaito'omana mamanalana to'odooa na kera to'oa 'i samu.

Ensolo 'e fa'arongo 'ana futalana tha Jon Thababtis

⁵ 'Ana si manga tha Herod 'e gwaunga'i 'i fana fanua 'i Jiudia, te'e wanenifo'a thatana tha Sakaraea fasia kule'e wanenifo'a ki fulingana tha Abaeja 'e too la'u bo'o. Ma kwaina, ni Elisabet, 'e futa la'u bo'o fasia kwalafana wanenifo'a ki, 'ana kwalafaa tha 'Eron.

⁶ Abulaladaro'a 'e le'a ma ka kokota 'i na'ofana tha God, sulia kero thai le'a sulia birangaa tha God, bia si ba'ea fiifii nia ki.

⁷ Sui taa, 'e a'i 'adaro'a ta wela, sulia ni Elisabet 'e 'aba'ato, ma keero'a sui keko ara'i ma keko kuke'e na'a.

⁸ Te'e fa thato, tha Sakaraea kai raa 'ana 'i laa na Bi'u Abu tha God, sulia 'e fula na'a 'ana si manga bare'e wanenifo'a ki na tha Sakaraea 'e nii biida, keki ilia na'a raa 'i laa na Bi'u Abu 'eri.

⁹ 'Ana birangana wanenifo'a ki, keka filia tha Sakaraea 'ana birangaa mala muuthangoa, uria na kai kotho 'i laa Bi'u Abu tha God, fasia kai na'area doo thasuna 'e makwa le'a.

¹⁰ 'Ana si manga 'eri la'u bo'o imole 'oro ki na kera nii 'i maa, keka fo'a manga na 'e na'area doo thasuna makwa le'a 'eri.

¹¹ Ma te'e 'ensolo tha Lord ka faata'i sana, maka takwe bali a'ola 'ana fuli era abu 'eri.

¹² Si manga tha Sakaraea 'e rikia ensolo 'eri, nia ka tona maka ma'u 'asia na'a.

¹³ Sui, na ensolo 'eri ka ba'e 'una 'eri 'i fana, “Sakaraea, a'i 'osi ma'u la'u! Tha God 'e rongoa fo'alaa 'oe. Ma kwaimu ni Elisabet kai tharea te'e wela wane 'i femu. Ma 'oe 'oki 'alangia 'ana tha Jon.

¹⁴ Se'ethaathalalaa ba'ita 'asia na'a kai fulato'omu, ma imole 'oro ki la'u bo'o keki se'ethaathalaa 'ana si manga na 'e futa!

¹⁵ Ma nia tootoo kai ba'ita 'i na'ofana tha God. Nia tootoo si ku'ufia waen mada tei ku'u ki na 'e suukwa'i. Ma 'ita mai 'ana si manga 'e ni 'uu mai 'i ruuru'una thainana, Ano'edoo Abu ka funguli nia 'uu bo mai.

¹⁶ Nia kai olifania mai imole 'oro ki 'i Israel 'i sana God kera.

¹⁷ Nia kai lae 'i na'o 'ana tha Lord, 'ana ano'edoo ma suukwa'ia 'uria tha 'Ilaeja. Nia kai olitania la'u liothaua maka ki, ura wela kera ki. Ma nia kai bulasia to'a aburongo ki, ura toolaa sulia biranga kokota mala to'a birangada 'e kokota. Ma nia kai kwaithathai 'ana te'e kule'e imole ki 'i fana tha Lord.”

¹⁸ Sui, tha Sakaraea ka sore'a 'i sana 'ensolo 'eri, “Nau kwai thaito'omana 'ufita, 'ana mamanalana si doo 'eri? Sulia nau ku ara'i na'a ma kwaiku ka kuke'e na'a la'u bo'o.”

¹⁹ Ma 'ensolo 'eri 'e lu'ua ka ba'e 'una 'eri, “Nau tha Gebriel ne'e, nau ku too bia tha God 'ana si manga ki sui bana. Ma nia 'e arasi nau mai fasi kwa ba'e bii 'oe, ma kwai fa'arongo 'oe 'ana si fa'arongoa le'a ne'e.

²⁰ Sui 'oe 'osi fa'amamanea bo'o si ba'ea nau 'eki, doo kai mamana 'ana si manga na tha God 'e alua mai fasi si doo 'eki kai fuli 'ania. Ma sulia 'osi fa'amamanea ba'elaku, 'osi ba'e, ma ka a'i 'osi ba'e tafa laalae ka fula 'ana si manga na doo na ku faarongo 'oe 'ania kai mamana 'i femu.”

²¹ 'Ana si manga 'eri na imole ki na kera ma'asia tha Sakaraea, manatada ka rofe, sulia 'e too mai 'i laa na Bi'u Abu tha God ka tau 'asia na'a.

²² Manga tha Sakaraea 'e kotho mai maa, fokona ka 'ato nana ma ka a'i si tala'ana kai sore'a ta si ba'ea 'i sana to'a 'eki. Si manga 'eri bo'o kera sui keka thaito'omana bona'a nia 'e rikia mai ta faatai'a 'i laa Biu Abu 'eri. Sulia fokona 'e 'ato nana, nia ka 'aruto'ona bana 'abana ura to'olanga'ilaa 'i sana to'a 'eki.

²³ Ma si manga 'ana raalaa nia 'i laa na Bi'u Abu tha God 'e sui, tha Sakaraea ka oli na'a ura toaa nia.

²⁴ Ma 'e a'i si tau bo'o buira si doo 'eki, kuke'e nia ni Elisabet ka too na'a 'ana wela, ma sulia lima fa madami, nia si 'akwasia bo'o luma kera.

²⁵ Ma nia ka ba'e 'una 'eri, “tha God 'e 'adomi nau na'a, ma ka lafu nau na'a fasia na se'enonia na ku too mai 'ania ma'alutana figua 'oro.”

Ensolo 'e fa'ataloa futalana tha Jisas

²⁶ Sui 'e fula 'ana ono fa madami na ni Elisabet 'e toofa 'oo'oga mai sulia, tha God ka arasia mai ensolo Gebrel ura te'e ma'e toaa 'i laa na balifanua 'i Galili, na kera 'alangia 'ana Nasaret.

²⁷ Nia 'e ngalia mai te'e si fa'arongoa fana te'e thaari na kera alufaafia fana te'e wane na kera 'alangia 'ana tha Josef. Tha Josef 'e futa 'ana kwalafaa tha Deved na king. Thatana thaari 'eri, ni Mere.

²⁸ Ma 'ensolo 'eri lae mai ka ba'e 'una 'eri 'i sana, “Laa thato le'a kau! Tha God 'e ni bii 'oe, ma le'alaa nia femu 'e ba'ita ka tatha!”

²⁹ Si manga ni Mere 'e rongoa ba'elana 'ensolo 'eri, manatana ka isifuufuli, ma ka kwaikinai sulia si fa'arongoa 'eri na 'ensolo 'eri 'e sore'a 'i sana.

³⁰ Sui na 'ensolo 'eri ka ba'e 'una 'eri la'u fana, “Mere 'ae, a'i 'osi ma'u la'u, sulia tha God 'e ade le'a 'i femu.

³¹ Sulia 'e fili 'oe, 'oki too ana wela, ma 'oki tharea te'e wela wane, ma 'oki 'alangia 'ana tha Jisas.

³² Ma nia kai 'inoto ka tatha, ma keka 'alangia 'ana Wela tha God 'i thalo. Tha God 'e alu nia fasi kai gwaunga'i, mala koko'o abu nia tha Deved.

³³ Ma nia kai gwaunga'i fana Jiu ki na kwalafaa tha Jakob ka tootoo si sui, ma 'inotoa nia 'e tootoo si sui!”

³⁴ Ma ni Mere ka ba'e 'una 'eri fana ensolo 'eri, “Nau kwasi too 'uu bia ta wane, sui masi fa'arongoa na 'o sore'a faku kai mamana 'ufita?”

³⁵ Ma ensolo 'eri 'e lu'ua ka 'una 'eri, “Ano'edoo Abu kai sifo mai faafi 'oe, ma suukwa'ia tha God kai too faafi 'oe. Sulia na Wela Abu 'eri, keki 'alangia 'ana Wela tha God 'i thalo.

³⁶ 'O thaito'omana inalamu ni 'Elisabet. Imole ki sui kera sore'a 'e 'afeta'i na'a ura na kai too 'ana ta wela. Sui ka kuke'e mena ana, ono fa madami nia na'a ne'e.

³⁷ Sulia 'e a'i ta si doo si 'afeta'i bo'o 'ana tha God.”

³⁸ Ni Mere ka ba'e 'una 'eri, “Nau kini ni raa tha Lord, kai mamana 'ana faku mala 'o sore'a neri.” Sui 'ensolo 'eri ka lae bona'a.

Ni Mere 'e maakelea ni Elisabet

³⁹ Si tau bo'o buira, ni Mere ka kwaithathai, ka laefoofo'a bona'a ura te'e ma'e toaa 'i laa tolo 'ana balifanua 'i Jiudia.

⁴⁰ Si manga 'e fula, nia ka kotho na'a kau laa toaa tha Sakaraea, ma ka 'arata'i le'a kau 'ana ni 'Elisabet.

⁴¹ Ma si manga ni Elisabet 'e rongoa 'arata'i le'alaa 'eri fasia ni Mere, na wela 'eri 'i rakena ka thaka 'ala'a. Ma Ano'edoo Abu ka fungulia na'a ni 'Elisabet,

⁴² ma nia 'e ba'e ba'ita ka 'una 'eri, “Le'alaa ba'ita 'e ni bii 'oe ka talua kini ki sui, ma 'e le'a ka tatha fana wela na 'oki fa'afutaa.

⁴³ 'Ufita fata'i na si doo ba'ita le'a 'una 'eri kai fuli 'ieku, na thainana Lord nau ka fulato'oku?

⁴⁴ Sulia si manga ku rongoa ngatalamu, wela ne'e 'i rakeku ka thaka 'ala'a 'ana se'ethathalalaa.

⁴⁵ Ma 'e le'a 'asia na'a femu sulia 'o fa'amamanea ba'elana tha God kai mamana 'i femu.”

Ni Mere 'e fa'aba'itaa tha God

⁴⁶ Ma ni Mere ka ba'e 'una 'eri, “Mangoku 'e fa'aba'itaa tha God,

⁴⁷ ma manataku 'e se'ethaathala sulia tha God na thuufaa nau,

⁴⁸ uri nia 'e manatato'oku, nau kela'afe kini ni raa nia. 'E 'ita 'i tara'ena, imole ki sui keki sore'a le'alaa 'i faku,

⁴⁹ sulia si doo ba'ita ki na God na 'e sukwa'i 'e ilia 'i faku. Ma thatana tha God 'e abu.

⁵⁰ Fasi te'e uni'i wane ka fula 'ana ruana uni'i wane, nia 'e faatania tatakomia nia fana imole ki sui na kera faare'inoto 'ani nia.

⁵¹ Nia 'e ilifania suukwa'ia ba'ita 'ana 'abana, ma ka tagalongania wane ki na kera fafaka'o kera 'i tala 'ada.

⁵² Nia 'e sifolongania wane 'inoto ki fasia 'inotoa kera, ma ka fa'a'inotoa wane ki na kera kelowane'a.

⁵³ Ma wane ki na kera thaofa, nia 'e thareda 'ana doo le'a ki, ma ka arasia wane riki'i doo ki bia 'abe'e doo gwa'u.

^54-55 Nia 'e betaa alanga'ia na 'e ilia fana koko'o abu kulu ki, maka 'adomia na wanenira nia tha Israel. Nia 'e manatato'ona faata'ilana tatakomia nia 'i fana tha Abraham, ma 'i fana kwalafaa nia ka fula 'ana susuilaa!”

⁵⁶ Ni Mere 'e too bia ni 'Elisabet sulia ulu fa madami, sui nia ka bi'i oli ura ma'e toaa nia.

Futalana tha Jon Thababtis

⁵⁷ 'E fula na'a 'ana si manga fasi ni 'Elisabet kai fa'afuta, ma nia ka tharea te'e wela wane.

⁵⁸ Ma imole kaakali ki bia inalana ki keka rongoa si doo le'a na tha God 'e ilia fana, ma keka se'ethaathala 'asia na'a sulia.

⁵⁹ Kwaula fa thato buira wela 'eri 'e futa, keka lae ura kwa'ikaakali 'ana se'ena sulia biibirangaa kera. Ma keka thathamia fasi keka 'alangia 'ana maka nia tha Sakaraea.

⁶⁰ Sui ma thainana 'e lu'uda ka 'una 'eri, “'e a'i musi 'alangia 'ana thata 'eri! Thatana tha Jon.”

⁶¹ Ma imole ki sui kera lu'ua keka 'una 'eri, “'e a'i ta wane 'ana kwalafaa kamaro'a si too bo'o mai 'ana thate'e doo 'eri.”

⁶² Sui keka to'olanga'i 'ana 'abada, ma keka soeto'ona maka nia uria thate'e doo taa na 'e thathamia keki 'alangia 'ana wela 'eri.

⁶³ Ma tha Sakaraea ka to'olanga'i la'u bo'o, maka gani ura ta si rebe'e doo ura keekedalaa, ma ka kedaa, “Thatana tha Jon.” Ma imole 'eki sui keka kwele 'asia na'a.

⁶⁴ Ma 'ana si manga 'eri la'u bo'o, tha Sakaraea ka ba'e la'u bana, ma nia ka tangoa tha God.

⁶⁵ Ma imole 'eki sui bo'o na kera ofu mai 'i kula 'eri, keka kwele 'asia na'a, ma si fa'arongoa sulia doo 'eki sui ka talofia laa tolo 'ana balifanua 'eri 'i Jiudia.

⁶⁶ Ma imole ki sui na kera rongoa doo 'eki, keka manata sulia ma keka soe 'una 'eri, “Ma kwa'i wane 'ufita na wela ne'e kai ba'ita mai kai 'uria?” Sulia kera thaito'omana na suukwa'ia tha God 'e ni biia wela 'eri.

Tha Sakaraea 'e fa'aba'itaa tha God

⁶⁷ Ma maka tha Jon, tha Sakaraea, 'e fungu 'ana An'oedoo Abu tha God ka fa'ataloa ba'elana tha God, ka sore'a,

⁶⁸ “Kulu fa'aba'itaa Lord, na God ne'e 'i 'Israel. Nia 'e lae mai ura 'adomilana imole nia ki, ma ura tafalanga'iladalaa.

⁶⁹ Nia kai falea mai te'e thuufaa na 'e suukwa'i ka tatha, fasia kwalafaa wanenira nia tha Deved,

⁷⁰ 'uria nia 'e alangania mai doo ne'e ki 'i na'o, 'ana profet abu nia ki,

⁷¹ nia kai fa'amaruki kulu fasia ma'alimae kulu ki ma fasia suukwa'ilana wane ki na kera riki kulu ka ta'aa.

⁷² Nia 'e sore'a kai faatania kwaiofea nia fana koko'o kulu ki, ma nia kai manatato'ona alaofua abu nia bii kera.

⁷³ Nga alaofua abu na 'e ilia bia koko'o kulu tha Abraham:

⁷⁴ 'e alangania kai tafalanga'i kulu fasia ma'alimae kulu ki fasi kuka raa 'i fana ma kusi ma'u la'u,

⁷⁵ ma fasi kuka too 'ana abulaa ma kokotolaa 'i na'ofana 'ana fa thato kulu ki na kuki maruki sulia,

⁷⁶ Ma 'oe wela nau, keki 'alangi 'oe 'ana profet tha God na 'e 'inoto faafia doo ki sui. Ma 'oki tatha 'i na'o 'ana Lord, fasi 'oko kwaithathai 'ana tala nia 'i fana,

⁷⁷ ma 'oko fa'arongoa imole nia ki, na keki too 'ana marukia si manga tha God kai manatalubea ta'aalaa kera ki.

⁷⁸ Sulia nia na God 'ana tatakomia, na laala'aa loo 'i thalo kai afurangga mai faafi kulu mala ta'elana thato 'i 'u'usungedi,

⁷⁹ kai la'a mai fasia 'i thalo loo faafia imole ki na kera too 'i laa ma'erodo ma nununa maea, uria kai talai kulu 'i laa na tala 'ana enenoa.”

⁸⁰ Ma wela 'eri ka ba'ita 'ala'a mai 'ana se'edoo, ma manatalana ka rafo la'u bo'o. Ma si manga 'e ba'ita mai, nia 'e lae ka too 'i laa na fanu kwasi laalae ka fula 'ana si manga na 'e thafalia raa nia 'i fana imole ki 'i Israel.