Luka 7 - Vame

Yesu mbər ɗu sləra məlmal sluji hay dərmak

¹ A aŋəde Yesu kəɗkəlede ruvəɗitən me ene ba cecena a ɗaha hay ga, huwaka ala a Kafarnahum.

² A Kafarnahum sahan ga, məlmal sluji hay dərmak s'iŋgeɗe niya, ɗu sləra ene gə wuran mica awiba saŋa, al aray bə ba zlazlaɗa, shifa ba ka ǎ lede.

³ Məlmal sluji hay dərmak sahan sənay a labara Yesu ga, slənika ɗa s'iŋgeɗe a məlmal hay Zhuwif hay de ala a ma ene de a ləɗay a gəɗin kəmkam a nəɗay a mbərɗika ɗu sləra ene sahan.

⁴ Wutan ane ɗa laka a ma Yesu de, ɗa gəkən kəmkam awiba, wa: «Dagwa sahan ga, zlaya kə humanande,

⁵ aɗaba wuran mica i jiba man, ba wuran aŋa hanəkmənka adaw guɓaɗay man.»

⁶ Mezlene Yesu ane ba ləɗay ene atə ayitəna. Sləŋa ɗa hərzhika adaw ga, ɗa zlaŋidəŋa atə yaga hay məlmal sluji hay dərmak sahan, wuran slənitan a dzaɗina, wa: «Ɗuduwuna hwa, ndəɓa bə cine ŋa aka, aɗaba əŋ slaka bə gəni ike kə nike ala adiyawa.

⁷ Aɗaba sahan tsaw, əŋ tsatsəka əŋ slaka ba a ləɗay ala a ma aka de i ŋasaray hwa saŋa. Amá dzawede ɗaya me aka ɓile ga, sləŋa ɗu sləra hwa ǎ mbəra apəna.

⁸ Ənne kini ɗa gə wutə i hakuma aŋade ayuwa ɗa niya, sluji hay gə ənne əŋ gurɨtan kini ɗa niya. Abə əŋ dzakəna a ɗu ɓile, ənna: Le, ba like. Gha əŋ hak ɗu ɓile, ənna: Nay, ba nike. Abə əŋ dzakəna a ɗu sləra hwa, ənna: Giya aŋa kini, ba giya.»

⁹ Yesu lək sənay a me hay sahan ga, gəka ajipu s'i dagwa sahan. Mezlene mbəɗkakude aray ala a ma s'abaga ɗaha hay de gə ɗa kutiya saŋa, dzəktəna, wa: «Na əŋ dzakuna: Aba Israyila de kini, əŋ nzəka ba ajiba ɗəfɗipənŋa saŋa aride.»

¹⁰ Ɗa slənɗay məlmal sluji hay dərmak ane ɗa mbəɗəkŋa ala adaw ga, ɗa laka a nzə ɗu sləra ene sahan mbəraka ba laŋŋa.

Yesu slabəl kine wudəge hərmana mətsaka

¹¹ Adede a ahan ga, Yesu huwak ala a hu s'iŋgeɗe de ɗa hawa i Nayin. Ɗa kutə wuran atə abaga ɗaha hay duna ɗa kutika.

¹² Ba wutan kini ɗa laka ande a mavendew hu sahan ga, ɗa zlaŋidəŋa atə ɗaha hay ɗa peke mətska kine dagwa a ləɗay a ɗəfɗide a mika de. Kine sahan ba ɓile‑ɓilehan a məman, məman wudəge hərmana. Ɗa hu zləkte tan niba ɗa kutək hər sahan.

¹³ Ɗuduwuna ba nəŋkəlhənande aray a hər sahan ga, gəkən aray. Dzakəna, wa: «Yəm bə cine.»

¹⁴ Ləɗay ene, laka ɗəfɗipan alay a ləɓa ga, ɗa gə ɗa pa mətska ane ɗa tavaka. Mezlene, wa: «Kine dagwa, na əŋ dzaaka, slabakude!»

¹⁵ Mətska ane slabakakude, zakakade, takənmandar‑a a dzaɗay. Mezlene Yesu ɗəfkənde a alay de a məman.

¹⁶ Ɗaha hay ba cecena zləŋwaɗ vəɗəktəna, ghaya ɗa zəmbəla Askwaf, wa: «Ɗu mbəɗɗitənande me s'Askwaf a ɗaha hay duwuna dzəkŋa ayimənde. Askwaf naya a humaɗitənande a ɗagadiyana.»

¹⁷ Igə Yesu gəka sahan slide a higay Zhude de ba cecena atə a higay hay de gə ɗa zləŋkənariya saŋa ba cecena.

Zhaŋ ɗu bunə ɗaha mbucike ala apə Yesu‑a

¹⁸ Ɗa kutə Zhaŋ ɗa laka a papərɗinede ihay sahan ba cecena a Zhaŋ. Mezlene wuran ane hakede ɗaha caw a ɗa kutəɗiya de sahan,

¹⁹ slənəktan ala a ma Ɗuduwuna de a ləɗay a mbutsəɗinamiya, wa: «Ike Kristu gə wa ǎ nay saŋa təku, ma ba ɗu s'iŋgeɗe adəɓa he?»

²⁰ A aŋəde ɗa laka a ma Yesu de, ɗa dzakəna, wa: «Zhaŋ ɗu bunə ɗaha slinimene ala a ma aka de, wa: Ike Kristu gə wa ǎ nay saŋa təku, ma ba ɗu s'iŋgeɗe adəɓa he?»

²¹ Aba a ma tan de sahan ga, Yesu mburəktənede ɗaha hay duna a kuza hay tan‑a gərgərgəra aba atə ɗa gə ɗa zak i jini hay ayitənde. Papəkənpətəna aray a ŋgulaf hay‑a ba tə duna.

²² Mezlene zləmkənhətənaŋa a ɗa kutə Zhaŋ ane, wa: «Len, jɨnna ihay gə na kwa tsaka al aray kwan, kwa sənay i sləmay kwan saŋa a Zhaŋ: Ŋgulaf hay ɗa njiya aray hay tan, lipe hay ɗa like i səlay hay tan, ɗa dərve ɗa mburaka ba laŋ‑laŋŋa, makwaya hay ɗa shinkay a sləmay, mətska hay ɗa sleslibkakude, talage hay ɗa tsukw Labara Sələmna.

²³ Gədəɗɗay a ɗu gə abə əŋ gaka bə kuwan ta səlay a ma ene de.»

²⁴ A aŋəde ɗa slənɗay Zhaŋ ɗa huwaka ga, wuran ane takənmandar‑a a dzaɗitən me Zhaŋ a abaga ɗaha hay saŋa, wa: «Zak mà, kwa zaya tsatsə s'ama kwene akiɓde? Kwa zaya tsatsə s'afəka hay gə humaɗe gigictan saŋa təku?

²⁵ I mà, kwa zaya a tsatsə s'ama? Kwa zaya tsatsə ɗu gə fafatide a ifafətɗay sələmna sələmna de təku? À‑á, ɗa gə ɗa fata isələmna sələmna, ɗa pe məɗay tsəre tan kini, wutan wutə aba adə bay hay.

²⁶ I mà, kwa zaya tsatsə s'ama kwene? Ɗu mbəɗɗitənande me s'Askwaf a ɗaha hay təku? Aŋa gə ba kugwan, na əŋ dzakunede zla: Wuran saŋa ndəmide aba atə ɗu mbəɗɗitənande me s'Askwaf a ɗaha hay.

²⁷ Aɗaba ba wuran ɗu gə me ene niya i hətsɗay a wakita s'Askwaf de, wa: “Na əŋ slinka ɗu slənɗay hwa apə miya ayika, a ləɗay a sluməɗiyakana ciba” waka saŋa.

²⁸ Na əŋ dzakuna: A ɗa gə de ɗa wuhtan ba wuhɗay saŋa, niba ɗu gə ndimka Zhaŋ i məlmal tsəre. Amá ɗu gə abə kutew ba wuran a gurɗay s'Askwaf de ga, ndəm wuran i məlmal tsəre.»

²⁹ Ɗaha hay ane ba cecena aba atə ɗa maməsl hadama saŋa ɗa tsukwika me ene, ɗa sənkede a jire tsəre s'Askwaf, ɗa bunaka a ma Zhaŋ de.

³⁰ Amá Farisa hay atə malum hay me gurɗay ga, ɗa təfka bə igə Askwaf mickinhətan ayitəna saŋa, ɗa kəraka a bunɗay a ma Zhaŋ de.

³¹ Yesu ɗəfkənhətənaŋade adəɓa, wa: «Ɗa zamane bəkwa saŋa mà, əŋ gurɨltan atə ɗa gəna? Ɗa gizhek atə ɗa gəna?

³² Wutan saŋa ga, ɗa gizhek atə waghay gə wutə i zaɗay a tənday hu de, ɗa hehe zhek a duvak tan de, wa: “Ma fəkkunka sagəlak səsəmɗay kini, kwa həslkənarde ba awar, ma ɗugəkkunka degwava kini, kwa yəmak ba,” waka saŋa.

³³ Əŋ dzawa kugwan saŋa, aɗaba Zhaŋ ɗu bunə ɗaha naya, məkəna bə ŋa a pə s'away, saka bə məhay ga, kwene ika: “Wuran ɗəma gə i jini a ŋa de.”

³⁴ Kine ɗu səlammərzheŋ naya, piya, sawa kini, kwene, ika: “Cɨnka dagwa saŋa, sləra ene ba tənday atə vərɗinka ŋa ene a məhay‑a, wuran ɗəma gə ba yaga ɗa maməsl hadama atə ɗa hipe.”

³⁵ Amá həŋkale s'Askwaf ga, jire tsəre ene niya mbislke a ɗa gə de ɗa təfkaŋade saŋa ba cecena.»

Yesu adə Simuŋ humas Farisa

³⁶ Humas Farisa s'iŋgeɗe hak Yesu ala a pə s'away adiyana. Yesu laka ala a adə humas Farisa sahan, zakakade a pə s'away.

³⁷ Mbatse, hər hipe s'iŋgeɗe kini niya a hu sahan de, ba sənay wa Yesu niya piya away adə humas Farisa saŋa ga, ba ləɗay ene al ihəts s'atirsheŋ gə həslka ene awiba saŋa, ruhkede al atirsheŋ gə gane ene zlazlaɗa saŋa.

³⁸ Tavaka i dəɓa Yesu‑a i ma səlay hay ene ka, ghaya yimke, bunkənka səlay hay a Yesu‑a njiriɓɓa al arishahwam ene, məməskənpəna i humbats ŋa ene, təkulkənka səlay hay, ta gəkənpan atirsheŋ.

³⁹ Humas Farisa gə haka ala adiyana ane tsaka ahan ga, dzəmka a ŋa ene de, wa: «Dagwa saŋa abə a nəkay ɗu mbəɗɗitənande me s'Askwaf a ɗaha hay ga, a sənkiyede gəni hər gə na ɗufɨpan alay saŋa ɗu hipe.»

⁴⁰ Yesu takənmandar‑a a dzaɗina, wa: «Simuŋ, me hwa niya əŋ dzaaka.» Simuŋ, wa: «Dzawa malum.»

⁴¹ Yesu wa: «Ɗu s'iŋgeɗe niya kuləktən gwedere a ɗaha caw. A ɗu ɓile kəlkən gursa dərmak ɗara, a ɗu saŋa kini kəlkən gursa kurkur ɗara.

⁴² Ba cawuna tan ɗa dzəgwika bə mbulɗinede gwedere hay sahan. Aɗaba sahan, wuran ane hərkənhətənde ba cawuna tan. A ŋa aka de mà, wiya mica al ayina duna a ɗaha caw de saŋa?»

⁴³ Simuŋ zləmkənhənaŋa, wa: «Əŋ tamaha ba ɗu gə ɗa hərkənhənde a gwedere duna saŋa.» Yesu, wa: «Aŋa ga, kə dzika jire.»

⁴⁴ Mezlene Yesu mbəɗkakude aray ala a ma hər saŋa de ane, dzana a Simuŋ, wa: «Kə tsaka təku hər saŋa? Kwa əŋ naya adiyaka, kə gəkuwa ba ahwam a bunɗilpəna səlay hay hwa, amá wuran ga, bunkənpuwa al arishahwam ene, məməskənpuwa i humbats ŋa ene.

⁴⁵ Kə təfkənaw bə i təkulɗinaw ala a tənday s'adaw aka de, amá hər saŋa ga, kwa əŋ naya ba kugwan, hərkənde ba a təkulɗiw səlay hay.

⁴⁶ Ike ba s'ambár kini kə gəkude ba a ŋa de, amá hər saŋa ga, gəkənpaw atirsheŋ a səlay hay.

⁴⁷ Aɗaba sahan, na əŋ dzaaka: Micɗiya i ɗaha ene gə duna saŋa, mbəslkəla gəni hipe hay ene gə ɗa zak duna saŋa ɓusaka. Amá ɗu gə abə hipe hay gə ɗa ɓusəkəna kutew ga, micɗiya i ɗaha ene kini ba kutew.»

⁴⁸ Mezlene dzana a hər saŋa ane, wa: «Hipe hay aka ɗa ɓusaka.»

⁴⁹ Ɗa gə ɗa piya away caca ane, ɗa takənmandar‑a a dzaɗiya a duvak tan de, wa: «Dagwa saŋa mà, wiya ta wuran ni, ha dzawa wa əŋ ɓusiyakana hipe hay aka saŋa?»

⁵⁰ Amá Yesu dzana a hər saŋa, wa: «Ɗəfɗipənŋa aka zluwikina. Hú iyaka a lapiya tsəre de.»