Luka 3 - Vame

Zhaŋ ɗu bunə ɗaha nenil Labara Sələmna

¹ A ahan de sahan ga, vaɗay Tiberiyus Kaysara ala apə jaŋwa ɗara a bay tsəre de a Ruma, Puŋtiyus Pilatu gurək higay Zhude, Hirudus gurək higay Galile, dagwa məman Filip gurək higay s'Itureya atə higay Tarakunitis, Lisaniya kini gurək higay s'Abilen.

² Wutə Anas atə Kayafas ga, ɗa zak məlmal ɗa slumə ɗaha hay atə Askwaf pitta. A ahan de sahan tsaw, Askwaf dzakəlan a Zhaŋ dagwa Zakari, akiɓde.

³ Takənmandar‑a a həsɗay a hu hay de gə dikw dikkwa i huwa s'Urdun saŋa ba cecena, nenilhətan a ɗaha hay wa ɗá mbəɗakude zaɗay tan, ɗá buntəna, ta Askwaf ɓushɨtənka hipe hay tan.

⁴ Ahan sahan laka aba apə me ka gə niya i hətsɗay a wakita s'Ezayi de ɗu mbəɗɗitənande me s'Askwaf a ɗaha hay saŋa, wa: «Ɗu s'iŋgeɗe niya rawa agay akiɓde, wa: “Slumɨnnika ciba a Ɗuduwuna ka, tetevɨnhənŋa a ciba hay ene ka ba ndəɗ‑ndəɗɗa.

⁵ Ɗəmbək hay ba cecena à ɗá rəruhwede, tsəɓakw hay atə ma hay gə ɗugur‑ɗugur‑a kini ba cecena à ɗá tatəsŋa, ciba hay gə i zukəɗay saŋa kini, à ɗá giya ba ndəɗ‑ndəɗɗa, ciba hay gə dzaŋwasl‑dzaŋwasl‑a saŋa kini, à ɗá slumiya ba kalkala.

⁶ Ta ɗaha hay ba cecena à ɗá caka zlu ɗaha s'Askwaf.”»

⁷ Ɗaha hay duna ɗa dzəfay ala a ma Zhaŋ de a nəɗay a bunɗay. Wuran ane dzəktəna, wa: «Kwa wayə maf hay saŋa mà, wiya wakənpəkuna dabari ndumaɗaya ande a bembec daɗay s'Askwaf gə ǎ nay saŋa?

⁸ Gɨna igə à ɗá shinkwenede apəna wa kwa mbəɗkakude zaɗay kwan saŋa. Sleslɨna bə ɗaya kwene ika mene gə ma ɗa s'Abraham. Na əŋ dzakuna, ba kuwan hay gə na wutan saŋa kini, Askwaf jukka gəɗiltəna ɗa s'Abraham.

⁹ Ba səgan kini slabak niya abi sluməɗay a ŋguɗəɗiyede shishka hay aba atə slilke hay ene. Ba kəla shishka gə abə waha bə kine məɗinna saŋa, à ɗá ŋguɗiyede, à ɗá jufiltənde a akwa de.»

¹⁰ Abaga ɗaha hay ane ɗa mbutsəkənamiya, wa: «Səgan mà, ma ge kəma aye?»

¹¹ Zləmkənhətənaŋa, wa: «Ɗu gə abə niya al ifətɗay caw ga, á vərən ɓile ene a ɗu gə niba a ma ene de. Ɗu gə abə ipəɗay niya a ma ene de kini á giya ba kugunhan.»

¹² Ɗa maməsl hadama kini ɗa naya a gus bunɗay a ma ene de, ɗa mbutsəkənamiya, wa: «Malum, mene mà, ma ge kəma səgan?»

¹³ Zləmkənhətənaŋa, wa: «Kwene ga, ŋgiɗɨnnarde ba a igə ɗa dzəkkuna wa giɗɨna saŋa.»

¹⁴ Sluji hay kini ɗa naya a mbutsəɗinamiya ba kugunhan, wa: «Mene mà, ma ge kəma?» Zləmkənhətənaŋa, wa: «Kwene ga, sleɗɨnpəna bə shiŋgu a ɗaha ka i nzəɗa, gha i slaɗipan mbaɗe a ɗaha kini, higɨnaŋade aba a shiŋgu kiyəhka kwan.»

¹⁵ Ŋa ɗa sahan zak ba hiŋkilla apə Zhaŋ‑a sahan, ghaya ɗa dzama ala apəna a ŋa tan de ba cecena, wa: «Dagwa saŋa ni, ǎ za Kristu saŋa bə zlama?»

¹⁶ Zhaŋ zləmkənhətənaŋa ba cecena tan, wa: «Ənne ga, əŋ bunkwene al ahwam, amá ɗu s'iŋgeɗe niya ǎ nay, wuran ndəmnaw ənne i nzəɗa. Ba kutəɗinede kimak a səlay‑a kini əŋ slaka ba. Wuran zlə ga, ǎ bunkwene i Shinekw Cuɗiɗɗina atə al akwa.

¹⁷ Wuran niya al ifəvə s'away ene a alay de, ǎ fəviyede cinjeŋ a ahay‑a. Ahay ga, ǎ cimde a takwar de, cinjeŋ kini ǎ ndəkəna akwa gə munzəɗay ene niba aride saŋa.»

¹⁸ I ɗəfɗitənde nzəɗa a zhek de a ɗaha hay i me hay gərgəra saŋa tsaw, Zhaŋ nankəlhətan Labara Sələmna a ɗaha hay.

¹⁹ Amá mbakəlan a Hirudus bay higay Galile, aɗaba təvika Hirudiya hər dagwa məman atə aɗaba gika iɓutsam hay s'iŋgeɗe gərgəra,

²⁰ ɗəfkənaŋade zlama adəɓa a gə s'iɓutsam s'iŋgeɗe: Bərika Zhaŋ, nəŋkəlde a daŋgay de.

Zhaŋ niya bune Yesu

²¹ A aŋəde niya ɗa bune ɗaha hay ba cecena saŋa ga, Yesu kini ɗa bunika. Niya ge maduwa ga, askwaf pəkmiya,

²² Shinekw Cuɗiɗɗina fataya ala a ŋa de ayina ane ɗa gizhek atə takalak masare. Ɗa shinkay ba taŋw ada askwaf‑a, wa: «Ike ga, ike Kine s'awiya hwa, əŋ higike awiba ala apaka.»

Ceje hay ene a Yesu

²³ Yesu slɨkiya aveŋ kurkur məŋgan a aŋəde takənmandar‑a a gə sləra ene. Apə dzəmŋa ɗaha hay‑a ga, wuran saŋa kine Zhuzef, Zhuzef kine Heli,

²⁴ Heli kine Mattat, Mattat kine Lewi, Lewi kine Melki, Melki kine Yannay, Yannay kine Zhuzef,

²⁵ Zhuzef kine Mattatiya, Mattatiya kine s'Amus, Amus kine Nahum, Nahum kine Hesli, Hesli kine Naggay,

²⁶ Naggay kine Maata, Maata kine Mattatiya, Mattatiya kine Semeyin, Semeyin kine Yusek, Yusek kine Yuda,

²⁷ Yuda kine Yuwanan, Yuwanan kine Resa, Resa kine Zurubabila, Zurubabila kine Salatiyel, Salatiyel kine Neri,

²⁸ Neri kine Melki, Melki kine s'Addi, Addi kine Kusam, Kusam kine s'Elmadam, Elmadam kine s'Eri,

²⁹ Eri kine Yusuwa, Yusuwa kine s'Eliyezer, Eliyezer kine Yurim, Yurim kine Mattat, Mattat kine Lewi,

³⁰ Lewi kine Simeyuŋ, Simeyuŋ kine Yahuda, Yahuda kine Zhuzef, Zhuzef kine Yunam, Yunam kine s'Eliyakim,

³¹ Eliyakim kine Meleya, Meleya kine Menna, Menna kine Mattata, Mattata kine Natan, Natan kine Davit,

³² Davit kine Yessa, Yessa kine s'Ubet, Ubet kine Buwes, Buwes kine Salmuna, Salmuna kine Nahasunu,

³³ Nahasunu kine s'Amminadabu, Amminadabu kine s'Admin, Admin kine s'Arni, Arni kine Hesrunu, Hesrunu kine Peres, Peres kine Yahuda,

³⁴ Yahuda kine Zhakup, Zhakup kine s'Izak, Izak kine s'Abraham, Abraham kine Tara, Tara kine Nahur,

³⁵ Nahur kine Saruku, Saruku kine Ragu, Ragu kine Falek, Falek kine s'Eber, Eber kine Sala,

³⁶ Sala kine Kaynam, Kaynam kine s'Arfasada, Arfasada kine Sem, Sem kine Nuhu, Nuhu kine Lamek,

³⁷ Lamek kine Matusala, Matusala kine s'Anuhu, Anuhu kine Yaret, Yaret kine Maleliyel, Maleliyel kine Kaynam,

³⁸ Kaynam kine s'Enus, Enus kine Setu, Setu kine s'Adama, Adama kine s'Askwaf.