Luka 24 - Vame

Slabaɗayede Yesu ada mika ka

¹ Ba wərra al aguzlak hənɗay zuŋŋwa s'i tamandar kasuka ga, hər hay ane ɗa laka ande a me mika al atirsheŋ hay tan gə ɗa slumika saŋa.

² Amá ɗa laka a nzə mika abi me, pilmek gə ɗa pakəlhənande saŋa vecakamiya ala apə daya ka.

³ Wutan ane ɗa lide a mika de ga, ɗa nzəka bə mətska Ɗuduwuna man Yesu ede.

⁴ Ɗa gika ba kuvam ɗaya. Ciɗa mizhe hay brecaw ɗa dzəkŋa apə zhek tan‑a, wutə a ifafətɗay hay de, piya aray wulwulwula.

⁵ Hər hay ane ɗa zləgutsaka, ɗa nzuɓika ŋa ala agide. Amá mizhe hay sahan ɗa dzəktəna, wa: «Amnaya kwa gus ɗu gə niya aba al aray a dagava ɗa gə de ɗa mutsaka saŋa?

⁶ Wuran niba akəna, slabakede. Rərəkɨnakude me gə wuran zak dzaɗikuna a aŋəde wuran a Galile, wa:

⁷ “Si ɗa ɗəftənde Kine ɗu səlammərzheŋ a alay de a ɗa hipe, ɗa derɨka apə shishka ka, amá a hənɗay de ala apə məŋgan ga, ǎ slabayede ada mika ka” waka saŋa.»

⁸ Mezlene wutan ane ɗa rərəkika me hay Yesu sahan.

⁹ Ɗa mbəɗiŋa ada ande a me mika ka ane, ɗa naya a ruvəɗitənede ihay sahan ba cecena a ɗaha jaŋwa ɓile saŋa atə a ɗa kutə wuran s'iŋgeɗe ba cecena.

¹⁰ Hər hay sahan ga, wutə Mari hər ɗa Magdala, Yuwanna, Mari məman a wutə Zhak, ŋa hər hay s'iŋgeɗe gə ɗa zak caca saŋa. Ɗa ruvəktən ihay sahan aba amazhekde a ɗa slənɗay.

¹¹ Amá ɗa slənɗay ɗa gurəkəl me hər hay sahan ba me hadada, ɗa ɗəfəkpətənŋa ba.

¹² Piyer ga, tsəkwaɗ slabakakude, ɗəvəraka ala ande a mika ane, kaɓika ŋa ala ande, tsatside aray ede ga, nzək ba s'iraɗay. Mezlene ba huɗay ene ala adaw, ge ba s'ajipu s'igə gaka sahan.

Ande a ciba s'Emmawus

¹³ Ba bək sahan ga, ɗa s'iŋgeɗe caw a ɗa kutə wuran de niya ɗa like ala a hu s'iŋgeɗe de ɗa hawa al Emmawus. Dagava hu sahan atə Zheruzalem slɨkiya kilumetər jaŋwa ɓile.

¹⁴ Niya ɗa jeke a duvak tan de ala apə ihay‑a gə lalakede saŋa ba cecena.

¹⁵ Zlama wutə aba aŋade a me sahan, ɗa mbucike a duvak tan de ga, ba Yesu i ŋasaray ene laka a slaɗipətan, ɗa lak caca.

¹⁶ Niya ɗa ceciya tsa, amá is'iŋgeɗe pakənhətənande a aray a sənɗiyede ayina.

¹⁷ Mezlene mbutsəktənamiya, wa: «Kwa dza me s'ama kwene apə ŋa ciba ka saŋa?» Wutan ane ɗa tatavaka, ɗa lide a dzəmŋa de.

¹⁸ Ɗu ɓile tan niya sləmay ene Kleyupas zləmkənhənaŋa, wa: «Ba s'ike ɓile a mbirkwe hay de gə a Zheruzalem, kə səna ba igə lakede akənahan a hənɗay hay saŋa de təku?»

¹⁹ Mbutsəktənamiya, wa: «Ama lakede?» Ɗa zləmkənhənaŋa, wa: «Igə ɗa gəkəna a Yesu humas ɗa Nazaret, wuran zak ɗu mbəɗɗitənande me s'Askwaf a ɗaha hay, mbəslkəla nzəɗa ene a sləra hay ene de, atə a me dzaɗay ene de apə miya a Askwaf‑a, atə apə miya a ɗaha hay‑a ba cecena.

²⁰ Məlmal hay man ɗa slumə ɗaha hay atə Askwaf atə məlmal hay man s'iŋgeɗe, ɗa ɗəfəktənde a alay de a ɗa Ruma a gəɗin sheriya shifa, mezlene ɗa darika apə shishka ka.

²¹ Mene ga, ma zak ɗəfɗika ŋa man hiŋkilla apəna, gəni ba wuran aŋa a səsəkərki Israyila. Amá aba al ahan kini, na hənɗay ala apə məŋgan bəkwa aŋa ihay sahan lakede apəna.

²² Adəɓa ga, hər hay s'iŋgeɗe wutə aba giwa man de, ɗa mimənka igə ma ge ba s'ajipu ene. Aɗaba ba bəkwa saŋa i ŋamandaɗay, wutan ɗa laka ande a me mika ga,

²³ ɗa lək ba a nzə mətska Yesu ede. Mezlene ɗa nidaw, ɗa naya a mbəɗɗimənande, gəni malika hay ɗa mbəslkəlhətan zhek, ɗa dzəktəna wa wuran niya aba al aray.

²⁴ Ɗa s'iŋgeɗe man ɗa laka ala ande a me mika sahan, ɗa laka a nzəɗiya ba ka aŋa hər hay ɗa dzaka saŋa. Amá ŋasaray ene ga, ɗa tsaka ba.»

²⁵ Mezlene Yesu dzəktəna, wa: «Kwene saŋa dəgiya, həŋkale kwan niba, kwa ɗəfpənŋa bə yakwa yakwa a me hay gə ɗa mbəɗɗitənande me s'Askwaf a ɗaha hay ɗa dzadzəka ba cecena saŋa!

²⁶ Kwa səna bə gəni si Kristu shaka te zlaɗa hay sahan, ta lɨde a duna tsəre ene de saŋa təku?»

²⁷ Mezlene paparəktənede igə wakita s'Askwaf dzaka ala apə ayina saŋa ba cecena, takənmandar‑a apə me Musa ka atə me ɗa mbəɗɗitənande me s'Askwaf a ɗaha hay ba cecena.

²⁸ A aŋəde sləŋa ɗa laka a hu de gə ɗa like ede sahan ga, Yesu gəka ba ka zlama huke kwalala.

²⁹ Amá ɗa sahan ɗa bərkənka taŋw, wa: «Nay han a ma man de, aɗaba sləŋa apas niba cine, mene niya wurke.» Wuran ane təfkaŋade, laka a hənɗay a ma tan de.

³⁰ Wutə aŋade a ipəɗay ga, təvika dipeŋ, gəkənaŋade barka, kəɗkənariya, vərəktəna.

³¹ Mezlene aray tan ndaka, ɗa sənkede ayina ane, amá ba ciɗa mimiɗeka ande a aray tan.

³² Wutan ane ɗa takənmandar‑a a dzaɗiya a duvak tan de, wa: «Bembec man zak ba ka aməmak bə təku a aŋəde ruvəkmən me ande a ciba, paparəkmənede igə wakita s'Askwaf dzaka saŋa?»

³³ Aba a ahan de sahan, ɗa slabakakude, ɗa mbəɗiŋa ala a Zheruzalem, ɗa laka a nzə ɗaha jaŋwa ɓile ane, ɗa masləkŋa atə ɗagaditan s'iŋgeɗe.

³⁴ Ɗa dzawa, wa: «Ba jire Ɗuduwuna slabakede ada mika ka mbəslkəlhan zhek a Simuŋ!»

³⁵ Ɗaha caw ane kini ɗa dzəktən labara s'igə lakede ande a ciba, atə sənɗay gə ɗa sənkede a Yesu a aŋəde kəɗkənariya a dipeŋ‑a saŋa.

Yesu mbazləlhətan zhek a ɗa kutə wuran

³⁶ Ba me sahan kini zlama ɗa kəɗkəlede bə ga, ɗa tsa ba Yesu i ŋasaray ene a dagava tan de, dzəktəna, wa: «Askwaf á vərkun lapiya tsəre.»

³⁷ Amá wutan ɗa zləgutsaka awiba, bembec slaslaɗəktənde, aɗaba ɗa gurəkəl ɗa tsək shinekw ɗu gə a mika de.

³⁸ Yesu, wa: «Amnaya ŋa kwan wushakakude? Amnaya kwene i dzəmŋa caw caw‑a?

³⁹ Cecɨnka alay hay hwa atə səlay hay hwa, aŋa ba s'ənne. Ɗifɨnpaw alay hay kwan, cɨnnuwa. Aɗaba shinekw ɗu gə a mika de ga, niba i sluwe zhek atə asləslak a zhek de ka aŋa na kwa tsanuwa ənne ənne al ayina saŋa.»

⁴⁰ Dzəktənede ahan sahan, mbəslkəlhətan alay hay ene atə səlay hay ene.

⁴¹ Ɗa dzəgwika bə te ɗəfɗipənŋa a ahan de sahan, aɗaba ɗa ruhwaka i higəɗay atə gə s'ajipu apəna. Sləŋa dzəktəna, wa: «Ipəɗay niya təku a ma kwan de akəna?»

⁴² Wutan ane ɗa vərkən ŋgəɗɗay kuciɗek ndəɗɗay ɓile.

⁴³ Təvika, kutsika aba a ma tan de.

⁴⁴ Mezlene wa: «A aŋəde əŋ zak a ma kwan de saŋa ga, əŋ zak dzaɗikuna, gəni si igə ɗa hətska ala apuwa a me gurɗay Musa de atə a wakita hay ɗa mbəɗɗitənande me s'Askwaf a ɗaha hay de, ŋa a wakita s'Awar hay de saŋa gɨkiya ba cecena.»

⁴⁵ Mezlene pakənhətənmiya a həŋkale ka a sənɗiyede a igə wakita s'Askwaf dzawa.

⁴⁶ Dzəktəna, wa: «Na i hətsɗay a wakita s'Askwaf de kugwan, wa: Si Kristu shaka te zlaɗa, a hənɗay de ala apə məŋgan ga, ǎ slabayede ada dagava ɗa gə ka wutə a mika de.

⁴⁷ Si à ɗá nenilhətan a jiba ɗaha hay ba cecena i sləmay ene, gəni ɗá mbəɗakude zaɗay tan, ta Askwaf ɓushɨtənka hipe hay tan. À ɗá tanmandar‑a nanəɗila a Zheruzalem.

⁴⁸ Ba kwene aŋa kwa siyade hay s'i me hay sahan.

⁴⁹ Ənne ga, ə̌ŋ slənikunka igə Paba wa ǎ vərikuna saŋa. Amá ga, zhɨnkwen aba bərni saŋa de, ha ala a bəga de à kwá ruhwa i hakuma gə ǎ nay ada akufa ka saŋa.»

Huɗay Yesu ala a askwaf de

⁵⁰ Mezlene Yesu hukəltənede ada bərni‑a, ɗa laka ba dikkwa i Baytaniya ga, pakakude alay hay ene, gəktənaŋade barka.

⁵¹ A aŋəde gɨtənaŋade barka sahan ga, hulaka atə ayitəna, ɗa hukəla ala a askwaf de.

⁵² Wutan ane ɗa hətskənka galəmnzay, ta ɗa mbəɗiŋa ala a Zheruzalem, bembec tan ba ka aməmak.

⁵³ Ba kəla mandaɗay ɗa ŋgəɗak ba a adaw s'Askwaf de a zəmbəl s'Askwaf.