Luka 23 - Vame

Yesu adə Pilatu

¹ Wutan ane ɗa slabakakude ba cecena tan, ɗa hukəla Yesu ala adə Pilatu.

² Ɗa laka hətsɗinaŋade me, wa: «Ma nzək dagwa saŋa slabəl me a dagava ɗagadima de, dzatəna wa ɗá hadzəna bə hadama a Kaysara. Adəɓa kini wa: “Ənne Kristu, ənne bay.”»

³ Pilatu mbutsəkənamiya, wa: «Ba s'ike təku ike bay Zhuwif hay saŋa?» Zləmkənhənaŋa, wa: «Ba s'ike aŋa kə dzaka.»

⁴ Pilatu dzəktəna a məlmal hay ɗa slumə ɗaha hay atə Askwaf atə a ndikɗay ɗaha hay saŋa, wa: «Ənne əŋ nzəka bə hipe apə dagwa saŋa ka ni, ha slaka a nəŋɗiya saŋa.»

⁵ Amá ɗa ɗəfkənaŋade a dzaɗiya ba dunduna, wa: «Wuran saŋa sləbkəlhətənakude bembec a ɗaha hay a higay Zhude de ba cecena i tsugəɗay ene saŋa dəgiya! Tá tinmandar‑a ada Galile ka, səgan gə na mika ala akəna!»

Yesu a ma Hirudus de

⁶ A aŋəde Pilatu sənay a ahan ga, mbutsəka, wa: «Dagwa saŋa humas ɗa Galile he?»

⁷ Sənkede gəni Yesu nay ada gurɗay Hirudus‑a ga, wa ɗá mɨnika a Hirudus‑a, aɗaba a hənɗay hay sahan de, wuran kini niya aba Zheruzalem sahan.

⁸ Hirudus ba hadzəkpan aray a Yesu ga, higak awiba. Hənaka gus ba hətsɗipan aray, aɗaba shinkay a labara ene, kum ba tsaɗika ajipu a ma ene de.

⁹ Mbutsəkənamiya me hay gərgərgəra, amá ba ŋguffa kini Yesu zləmkənhənaŋa ba.

¹⁰ Məlmal hay ɗa slumə ɗaha hay atə Askwaf atə malum hay me gurɗay gə ɗa niya akənahan saŋa, ɗa hadzəl me ala apəna zləkte ene niba.

¹¹ Mezlene Hirudus kini atə sluji hay ene ɗa takənmandar‑a a fəsuɗiya atə a gəɗil gege, ta ɗa fətkəlde a səɗava sələmna de, ɗa mbəɗkəlhənariya adəɓa a Pilatu‑a.

¹² Ba bək sahan aŋa wutə Hirudus atə Pilatu ɗa gaka yaga hay, aɗaba ɗa zak ba a zaɗaya.

Ɗa gəkənka sheriya shifa a Yesu‑a

¹³ Pilatu masləktənŋa a məlmal hay ɗa slumə ɗaha hay atə Askwaf atə bay hay, ŋa ɗaha hay ba duna.

¹⁴ Dzəktəna a ayitəna ane, wa: «Na kwa miwuka dagwa saŋa, kwene ika sləbkəlakude me a dagava ɗagadikwen de, na əŋ mbutsəkənamiya me aba a ma kwan de, amá əŋ nzəka bə hipe gə kwa naya a hətsɗinaŋade galəmnzay arde saŋa.

¹⁵ Hirudus kini nzəka bə hipe apəna, aɗaba na mbəɗɗilariya adəɓa ala a ma man de. Kugwan ga, niba hipe gə wuran gika ni, ha slaka a vəɗika shifa ene saŋa.

¹⁶ Aɗaba sahan, əŋ slalna abi taɗay, sləŋa əŋ nəŋla.»

¹⁷ [Ba ka aŋa gəkəlhətəna saŋa, ba kəla wumbri Paska, Pilatu niŋkilhətan daŋgay ɓile.]

¹⁸ Ba cecena tan ɗa takənmandar‑a a ŋguləhɗay ba dunduna, wa: «Viɗka dagwa saŋa, nanəlhəman Barabbas!»

¹⁹ Barabbas sahan ga, ɗa nəŋka arde a sləbkəlakude me a hu de atə aɗaba vəɗika shifa.

²⁰ Pilatu mbutsəktənamiya adəɓa, aɗaba gwasək nəŋɗil Yesu.

²¹ Amá wutan ɗa zləmkənhənaŋa abi ŋguləhɗay, wa: «Derɨka apə shishka ka, derɨka apə shishka ka!»

²² Pilatu mbutsəktənamiya zlama adəɓa ala apə məŋgan, wa: «I mà, mbəzika ama ɗəma wuran? Ənne ga, əŋ nzəka bə hipe gə wuran gika ni, ha slaka a vəɗ shifa ene saŋa. Kugwan ga, əŋ slalna abi taɗay, əŋ nəŋla.»

²³ Amá wutan ɗa ɗəfkənaŋade a ŋguləhɗay ba ka à ɗá ndawariya, gəni si ɗa derɨka apə shishka ka. Ŋguləhɗay tan sahan ndəmika nzəɗa Pilatu.

²⁴ Wuran ane zakəlpəna gə s'igə wutan ɗa mbutsəka sahan.

²⁵ Nəŋkəlhətan ɗu gə ɗa nəŋka arde a sləbkəlakude me a hu de atə aɗaba vəɗika shifa ane. Yesu ga, ɗəfəktənde a alay de gəni ɗá le a gə s'igə wutan ɗa mica sahan apəna.

Ɗa darika Yesu apə shishka ka

²⁶ A aŋəde niya ɗa hulə Yesu ga, ɗa zləŋkəldəŋa atə humas Sirene s'iŋgeɗe sləmay ene Simuŋ, wuran nikadaw ada kiɓa. Ɗa bərika, ɗa slakənaŋade a pa shishka a kutəɗil Yesu.

²⁷ Abaga ɗaha hay zləkte tan niba aŋa ɗa kutəka, hər hay ɗa hahətskənande alay a bembec, ghaya ɗa yimke.

²⁸ Yesu mbəɗkakude aray a ala a ma hər hay sahan de, wa: «Hər hay ɗa Zheruzalem, yimɨnnaw bə ənne, amá yɨmen ŋa kwan atə waghay kwan.

²⁹ Aɗaba zlama hənɗay hay niya à ɗá nay, ɗaha hay à ɗá jaka a hənɗay hay sahan de, wa: “Gədəɗɗay a hər hay təghar hay, ɗa gə ɗa ndaka bə mandar, ɗa ɗəfkənande ba ené tan a kine aride saŋa!”

³⁰ A ahan de sahan ga, ɗaha hay à ɗá tanmandar‑a a dzaɗitəna a kuwan hay, wa: “Zlezlɨnmənaŋade səke!” À ɗá dzatəna a tsəɓakw hay kini, wa: “Shuɓɨnlemena səke!”

³¹ Iya abə ɗa gɨna aŋa a shishka məndərɓak mà, i shishka kuŋgulɗay ɗəma mà, ǎ za kəma?»

³² Ɗa məktan atə abra hay caw a ləɗay a kəɗɗiltan atə Yesu.

³³ Ɗa məktəna a ma gə de ɗa hawa i «Kucke ŋa» saŋa, ɗa darika Yesu apə shishka ka. Ɗa dadarika abra hay saŋa kini apə shishka hay tan‑a, ɗu ɓile a alay ɗəfka de, ɗu ɓile kini a alay hədzan de.

³⁴ Yesu, wa: «Paba hwa, ɓushɨtənka hipe tan, aɗaba ɗa səna ba a igə ɗa giya.» Wutan ane ɗa hulika ifafətɗay ene a duvak tan de i kət s'afəka.

³⁵ Ɗaha hay ɗa tatavaka akənahan hirra, ɗa ceciya. Məlmal hay hu agira ɗa fəsawla ga, wa: «Wuran bəhe zluwiktəna ɗa s'iŋgeɗe saŋa, á zluka həmba ŋa ene kini, abə ba wuran tsaw Kristu gə Askwaf təfkede saŋa!»

³⁶ Sluji hay kini kaya a gəɗil gege, ɗa kəzəkpan, ɗa gus vərɗinde məhay ɗaŋɗaŋəna saŋa, wa:

³⁷ «Abə ba ike bay Zhuwif hay tsaw ga, zluka zlə ŋa aka!»

³⁸ I kufa ka aŋa ayina kini ɗa hadzika, wa: «Ɗu gə na saŋa ga, bay Zhuwif hay.»

³⁹ Ɗu ɓile s'abra hay gə ɗa darəktəna ane kini, kaya a gəgənəh Yesu, wa: «Ike Kristu bəhe? Zluka həmba ŋa aka, zlumena mene kini!»

⁴⁰ Amá ɓile ene saŋa sləkkənaŋade, wa: «Ike ni, zləŋwaɗ ba kutew kini viɗken ba ande a Askwaf? Ike kini ike aba zlaɗa sahan de tsa!

⁴¹ I man ga, igə ɗa gɨməna saŋa aba adaw ene de, aŋa ba deyday s'igə mene ma gəka, amá wuran ga, niba hipe gə gika.»

⁴² Mezlene dzana a Yesu, wa: «Ba kəmkam, ə̌ŋ diyakadəŋa ba, abə ikə mbəɗiŋa a bay tsəre aka de saŋa.»

⁴³ Yesu zləmkənhənaŋa, wa: «Na əŋ dzaaka ba jire, Ba bəkwa bəkwa saŋa, kə le a zaɗay aba a ma hwa de a zlana de.»

Mətsɗay Yesu

^44-45 Sləŋa apas kini tavaka ga, apas munzaka. Wurek pakənande a mene apə higay‑a ba cecena, ha bika saa məŋgan s'apas hagak. Kacakaca gə ɗa ŋgəɗkəlede mene a adaw s'Askwaf de saŋa ndakariya a dagava de kalkala.

⁴⁶ Mezlene Yesu ŋgulahaka ba dunduna, wa: «Paba hwa, əŋ ɗəfakade shifa hwa a alay de ayika.» Ba dzakede ahan ga, aba atə laɗayede a shifa ene.

⁴⁷ Məlmal sluji hay dərmak tsaka igə gaka sahan ga, zəmbəlkakude Askwaf, wa: «Dagwa saŋa, gha wiya dzaka kini, ɗu jire.»

⁴⁸ Ba cecena abaga ɗaha hay gə ɗa dzəfay a nəɗay a tsatsəɗiya saŋa, ba ɗa tsaka igə gaka sahan ga, gha wiya tan kini hətskənande ba s'alay a bembec a aŋəde ɗa huke ala adaw.

⁴⁹ Ba cecena ɗa gə ɗa səna a Yesu atə hər hay gə ɗa kutiya ada Galile ka saŋa, ɗa tatavaka dzaɗ‑dzaɗɗa a tsatsə s'igə gɨke saŋa.

Ɗa ɗəfide Yesu a mika de

^50-51 Ɗu s'iŋgeɗe niya sləmay ene Zhuzef, humas s'Arimatiya a higay Zhude de. Wuran ɗu sələmna, ɗu jire zlama adəɓa, bək ba nəɗay gurɗay s'Askwaf. Wuran kini məlmal tsa a ɗa kəndəkiya de, amá ɗəfide bə me ene a igə de ɗa s'iŋgeɗe ɗa zakəlpəna atə igə wutan ɗa gəka saŋa.

⁵² Laka ala a ma Pilatu de a mbutsə mətska Yesu.

⁵³ Mezlene fətkəlpəna mətska ane a shishka ka, fuɗide a iraɗay ləfəɗɗəna de, laka a ɗəfɗide a mika de. Mika sahan zak tsaw i raɗay, ɗa rak ba pəpərɗak, zlama ɗa ɗəfide bə mətska ede aride.

⁵⁴ Labara sahan gak bək slumə zhek, sləŋa sərte həts mbas ǎ tamandar.

⁵⁵ Hər hay gə ɗa zak kutə Yesu ada Galile ka ane ɗa kutika Zhuzef, ɗa laka a tsaɗika mika atə ɗa ɗəfide kəma mətska Yesu.

⁵⁶ Mezlene ɗa mbəɗiŋa ala a hu de, a nəɗay a slumə s'ambár hay atə atirsheŋ hay tan a ləɗay a pishɗipan a mətska. Amá bək həts mbas ga, ɗa hadzika mbas aba apə aŋa ka me gurɗay dzaka.