Luka 20 - Vame

Hakuma Yesu mà, nike ada magəna?

¹ Bigeɗe Yesu niya cugɨlhətan away a ɗaha hay a adaw s'Askwaf de, ghaya nenilhətan atə Labara Sələmna ga, məlmal hay ɗa slumə ɗaha hay atə Askwaf atə malum hay me gurɗay, ŋa məlmal hay hu ɗa laka ala a ma ene de.

² Ɗa dzakəna, wa: «Dzaməna ɗece, ihay gə na kə giya saŋa mà, kə giya i hakuma gəna? Təku, wiya vəriyak hakuma sahan?»

³ Yesu zləmkənhətənaŋa, wa: «Ənne kini əŋ mbucekunamiya me ɓile, zlimkɨnhuwaŋa:

⁴ Zhaŋ mà, wiya sləniya a bunə ɗaha hay? Askwaf təku, ɗa səlammərzheŋ he?»

⁵ Ɗa takənmandar‑a a dzaɗay a duvak tan de, wa: «Abə mene, ənna: “Askwaf sləniya,” ǎ dzaməna, wa: “Amnaya kwa ɗəfəkpənŋa ba ayina?”

⁶ Abə mene, ənna: “Ɗa səlammərzheŋ,” ɗaha hay ba cecena à ɗá hətsmənaŋade kuwan, aɗaba ɗa ɗəfəkpənŋa gəni Zhaŋ ɗu mbəɗɗitənande me s'Askwaf a ɗaha hay.»

⁷ Mezlene ɗa zləmkənhənaŋa, wa: «Ma səna ba.»

⁸ Yesu, wa: «Abə kugwan ga, ənne kini əŋ dzakuna bə ɗu gə vərku hakuma gə s'ihay sahan.»

Araja i ɗa sləra gə zlasaw hay

⁹ Adede ahan ga, Yesu takənmandar‑a a dzaɗitəna araja gə na saŋa a ɗaha hay, wa: «Ɗu s'iŋgeɗe cubide inabuhi hay a kuvak ene de, ɗəfəktənde a alay de a ɗaha hay gəni ɗá ge sləra ede, à ɗá huliya. Wuran ba huɗay ene ala a shula, ǎ mbasaya duna.

¹⁰ Sərte ɗugə s'inabuhi naya ga, slənika ɗu sləra ene s'iŋgeɗe ala a ma ɗa gə de ɗəfəktənde kuvak a alay de ane a vərɗin dzaa s'inabuhi ene. Amá ɗa sahan ɗa slakəlna i taɗay, ɗa nəŋkəla, huwak al alay ene ɗara.

¹¹ Ɗu kuvak ane slənika ɗu sləra ene s'iŋgeɗe adəɓa, wuran kini ɗa slakəlna i taɗay, ɗa gəkəlariya, ta ɗa nəŋkəla, huwak al alay ene ɗara.

¹² Slənika zlama adəɓa ɗu s'iŋgeɗe ala apə məŋgan, wuran ga, ɗa nzanzəslkakude, ta ɗa ɓərkede ala a geshe.

¹³ Ɗu kuvak s'inabuhi ane, wa: “Əŋ ge kəma səgan? Əŋ slinka kine s'awiya hwa saŋa, wuran ga, bi à ɗá ɗəf mbəray apəna.”

¹⁴ Amá ɗa sləra ane ba ɗa hadzəkpan aray ga, ɗa dzaka a duvak tan de, wa: “Tá ɗu gə ǎ pe warata ene ane, viɗinmənka, ta warata ene sahan ǎ giya ande ayiməna.”

¹⁵ Ɗa ɓərkede ada kuvak‑a ala a geshe, ɗa vəɗika. «I mà, ɗu kuvak ǎ naya gəɗitəna ama a ɗa sahan?

¹⁶ Ǎ naya a kəɗɗiltəna ɗa sləra sahan, ǎ ɗəftənde kuvak s'inabuhi sahan a alay de a ɗa s'iŋgeɗe.» Ɗahay ane ba ɗa sənay a me sahan ga, wa: «Aŋa gɨkiya ba aride!»

¹⁷ Yesu tsatsəktan ba ndivva, ta dzəktəna, wa: «Me gə niya i hətsɗay, wa: “Ba kuwan gə ɗa ɗisl s'adaw ɗa nəŋkəla saŋa, ba s'ahan gaka kuwan təlkame saŋa mà,” gus dza s'ama?

¹⁸ Ɗu gə abə taŋaka apə kuwan sahan‑a ga, ǎ kakaɗa. Ɗu gə abə kuwan sahan nəŋkənaŋade ɗəma ga, ǎ muniyakude ba munɗay.»

¹⁹ Malum hay me gurɗay atə məlmal hay ɗa slumə ɗaha hay atə Askwaf ɗa gwasək bər Yesu aba a ahan de sahan, aɗaba ɗa sənkede gəni dzaka araja sahan ala apə tan‑a, amá zləŋwaɗ vəɗəktəna ande a ɗaha hay.

Me hətsɗin hadama a bay Ruma

²⁰ Mezlene ɗa takənmandar‑a a ɗəgəm Yesu. Ɗa slənəkpan ɗa s'iŋgeɗe, ɗa sahan ɗa gəkəlka ŋa tan ba ka ɗa jire. Ɗa gwasək bərɗika apə me‑a, ta ɗa məkina a guverner gə hakuma a alay de ayina saŋa a nda sheriya ene.

²¹ Ɗa mbutsəkənamiya, wa: «Malum, ma səna gəni igə kə dzawa atə igə kə cugɨla saŋa ba ndəɗɗa. Kə gəgəra bə ɗaha, kə cugɨlhətan zaɗay apə ciba s'Askwaf‑a a ɗaha hay i ciba ene.

²² Dzaməna ɗece, ciba niya təku ayiməna a hətsɗin hadama a Kaysara bay Ruma, niba he?»

²³ Yesu sənkede a ɗemɗema tsəre tan sahan, dzəktəna, wa:

²⁴ «Mbezlɨnlehwa ɗece shiŋgu sahan ɓile. Fataŋw atə sləmay gə na apəna saŋa mà, i wiya?» Ɗa zləmkənhənaŋa, wa: «I Kaysara bay Ruma.»

²⁵ Yesu, wa: «Kugwan ga, hajɨnna a Kaysara igə zlaya ene a Kaysara, a Askwaf kini igə zlaya ene a Askwaf.»

²⁶ Ɗa dzəgwika bə bərɗika apə me‑a gə wuran dzawa apə miya a ɗaha hay‑a saŋa. Bira zləmɗinhətənaŋa ene sahan vərəktən ba s'ajipu, ɗa pakənande aba me tan.

Mbutsəɗay ala apə slabaɗayede ɗaha hay ada mika ka

²⁷ Saduki hay s'iŋgeɗe ɗa kəzəkpan a Yesu. Ba Saduki hay sahan tsaw wa slabaɗayede ɗaha hay ada a mika ka niba saŋa. Ɗa mbutsəkənamiya, wa:

²⁸ «Malum, Musa hətskənpəman, wa: “Abə humas mətskənaŋa a hərmana ka wuhkəlka bə kine ga, si dagwa məman humawede hər sahan a ɗəfɗinka shef a dagwa məman gə mətsaka saŋa.”

²⁹ Iya, wayə məme s'iŋgeɗe ɗa zak tə ciɓa apə məme tan‑a. Məlmal tan təvika hərmana, mətskənaŋa wuhkəlka bə kine.

³⁰ Ɗu kutəɗay ene humakede hər sahan,

³¹ ɗu gə ala apə məŋgan kini ba kugunhan, ha ciɓa hətəna ɗa kəɗkənaŋa niba ɗu gə wuhkəlka kine.

³² Adede ayitəna ga, hər sahan kini mətsaka.

³³ I mà, hər sahan ǎ za ande a wiya ayitənde bək slabaɗayede ɗaha hay ada mika ka? Aɗaba ciɓa hətəna ɗa gəkəlka hər tan.»

³⁴ Yesu zləmkənhətənaŋa, wa: «A zamane saŋa de ga, mizhe hay atə hər hay ɗa tuve zhek.

³⁵ Amá ɗa gə ɗa slaka a nzə zaɗay a zamane de gə ǎ nay ala apə miya atə a slabaɗayede ada dagava ɗa gə ka wutə a mika de saŋa ga, à ɗá təva bə cine zhek.

³⁶ Wutan à ɗá mats bə cine, aɗaba à ɗá giya ba ka malika hay. Ɗa gaka wayə s'Askwaf, aɗaba wuran slabiltənede ada dagava ɗa gə ka wutə a mika de.

³⁷ Musa ga, zak dzaɗiya ba parakka a ma gə de dzak ala apə adəga tsəktsəkəna ka saŋa, gəni ɗa gə ɗa kəɗaka saŋa à ɗá slabayede ada mika ka. Aɗaba hak Ɗuduwuna al “Askwaf s'Abraham, Askwaf s'Izak atə Askwaf Zhakup.”

³⁸ Askwaf ga, wuran Askwaf mətska hay ba, amá i ɗa gə i shifa. Aɗaba wutan ba cecena saŋa wutə abi shifa a ma ene de.»

³⁹ Ɗa s'iŋgeɗe a malum hay me gurɗay de, ɗa zləmkənhənaŋa, wa: «Malum, aŋa gə kə dzika ba kalkala ene.»

⁴⁰ Aɗaba zləŋwaɗ vəɗəktəna a mbutsəɗinamiya me hay s'iŋgeɗe.

Wutə Kristu atə Davit

⁴¹ Yesu dzəktəna, wa: «Nay kəma ni, ɗa dzawa wa Kristu shef Davit saŋa?

⁴² Aɗaba ba Davit i ŋasaray ene kini dzaka a wakita s'Awar hay de, wa: “Ɗuduwuna dzakəna a Ɗuduwuna hwa, wa: ‘Zakade a alay ɗəfka hwa de,

⁴³ ha abə əŋ gəkəltəna ɗa dawa aka ma həts səlay aka.’”

⁴⁴ Abə Davit ɗəma hawa i Ɗuduwuna ene mà, Kristu gɨkiya kəma shef ene adəɓa?»

Ɗifɨn sləmay apə ŋa kwan‑a a ma malum hay me gurɗay de

⁴⁵ Yesu ane dzatəna a ɗa kutə wuran apə miya a ɗa gə ka ɗa tsukw me ene ba cecena saŋa, wa:

⁴⁶ «Ɗifɨn sləmay apə ŋa kwan‑a ba kərətta a ma malum hay me gurɗay de gə ŋgəmtan həsɗay i səɗava dəbələmməna, ɗa gus ɗa gɨtən sa apə aray ɗaha hay‑a ba cecena saŋa. Ɗa gus ba mazaɗay gə apə miya saŋa a adaw guɓaɗay hay de, a ma wumbri de kini ɗa gus ba mazaɗay gə i daradza saŋa a zaɗide.

⁴⁷ Ɗa pe wudəge hay hər hay apə adaw‑a. Ɗa kət maduwa hay tan duna, gəni ɗaha hay ɗá tsatəna. Aɗaba sahan, sheriya duwuna ǎ njɨtan.»