Luka 2 - Vame

Wuh Yesu

¹ Aba ahan de sahan tsaw, Agustus bay Ruma təfkəla me gurɗay ene, gəni ɗá hadzakude sləmay ɗa gə a duniya de ba cecena.

² Həts sləmay ɗaha hay zuŋŋuna sahan ga, gak a zamane de gə Kiriniyus gure higay Siriya saŋa.

³ Ɗaha hay ba cecena, gha wiya kini laka a həts sləmay ene aba a hu ene de.

⁴ Zhuzef kini, slabakakude ada Nazaret‑a a Galile, huwak ala a Betlehem hu bay Davit a higay Zhude de. Lak ala akənahan sahan, aɗaba wuran nayede aba ada jiba Davit‑a sahan.

⁵ Ɗa laka a həts sləmay tan atə hər ene Mari gə i tənday ane.

⁶ A aŋəde wutə a akənahan sahan ga, tənday wuhɗay bərika Mari.

⁷ Wuhkede mikure ene kine humas, fuɗide a kacakaca de, hənkəlakade a ipə s'away daba hay de, aɗaba mene niba cine a kudak de gə mbirkwe hay ɗa cukke ede saŋa.

Malika nenilhətan Labara Sələmna a ɗa tsəgɗay

⁸ Ɗa tsəgɗay s'iŋgeɗe ɗa zak akiɓde aba a higay sahan de, ɗa tsəgək ŋgaɓa tan luvaɗ.

⁹ Malika Ɗuduwuna mbəslkəlhətan ŋa ene, duna tsəre Ɗuduwuna zləŋəktənariya i pə s'aray ene, wutan ane ɗa zləgutsaka awiba.

¹⁰ Amá malika ane dzəktəna, wa: «Zləŋwaɗ á viɗkwene ba, aɗaba əŋ mikun Labara Sələmna gə ɗaha hay ba cecena à ɗá higiya duna ede saŋa.

¹¹ Luvaɗ bəkwa saŋa ga, ɗa wahəkkunka Ɗu Zlu ɗaha a hu Davit de, ba wuran aŋa Kristu Ɗuduwuna.

¹² Na alama gə à kwá sənede a kine sahan apəna: À kwá le a nzə kine s'avenjanja i fuɗəɗay a kacakaca de, i hənɗay a ipə s'away daba hay de.»

¹³ Ciɗa malika hay s'iŋgeɗe zləkte tan niba ɗa fataya ada askwaf‑a ala a ma ene de, ɗa takənmandar‑a a zəmbəl s'Askwaf, wa:

¹⁴ «Zhimbilinməna Askwaf gə kwalala a askwaf de saŋa, a duniya de kini lapiya tsəre á za apə ɗa gə ka wuran mictan saŋa.»

Ɗa tsəgɗay ɗa like a Betlehem

¹⁵ A aŋəde malika hay ɗa harəktənde, ɗa mbəɗəkŋa ala a askwaf de ga, ɗa tsəgɗay ane ɗa dzaka a duvak tan de, wa: «Linmena ala a Betlehem sahan ba səgan, ma like a tsaɗika igə lakede, Ɗuduwuna a dzəkməna saŋa.»

¹⁶ Wutan ane ɗa lak ba yakwa yakwa, ɗa laka nzə wutə Mari atə Zhuzef, ŋa kine s'avenjanja ane i hənɗay a ipə s'away daba hay de.

¹⁷ A aŋəde ɗa tsək kine ane ga, ɗa ruvəktənede igə malika dzəktəna ala apə kine sahan‑a.

¹⁸ Ba cecena ɗa gə ɗa sənay a me gə ɗa tsəgɗay ɗa ruvəktəna saŋa, ɗa gək ba s'ajipu ene.

¹⁹ Amá Mari ga, bəride me hay sahan aba a ŋa ene de, gha a i gəna de kini dzəm ba s'ahan.

²⁰ Mezlene ɗa tsəgɗay ane ba mbəɗɗiŋa tan ala a mazaɗay tan de, ghaya ɗa ɗəɗəma Askwaf a duna tsəre ene de, ɗa zəmbəla aɗaba s'igə wutan ɗa sənay atə igə ɗa tsaka al aray tan ba cecena saŋa, aɗaba gaka aba apə aŋa ka malika dzəktəna sahan.

Ɗa laka a mbəslɗila kine a adaw s'Askwaf de

²¹ Hənɗay ala apə zhire, sərte slaɗin baŋwe a kine slaka ga, ɗa ɗəfkənka sləmay Yesu, apə aŋa ka malika zak haɗiya, kwa zlama ba tənday ene kini ɗa nzəka bə saŋa.

²² A aŋəde sərte slaka a ayitəna a bunɗika ŋa tan apə i me gurɗay Musa ka ga, ɗa ləkəla kine ane ala a adaw s'Askwaf de a Zheruzalem a mbəslɗilhan a Ɗuduwuna.

²³ Aɗaba niya i hətsɗay a me gurɗay Ɗuduwuna de, wa: «Ba kəla kine humas mikure ga, ǎ za ande a Ɗuduwuna.»

²⁴ Ɗa nay atə a vərɗin sadake, apə aŋa ka me gurɗay Ɗuduwuna sahan təfkəla, wa: «Takalak hay caw, bi wayə takalak masare hay caw,» waka saŋa.

²⁵ Dagwa s'iŋgeɗe zak a Zheruzalem sahan, sləmay ene Simeyuŋ. Wuran ɗu jire, ɗəf mbəray apə Askwaf‑a, bək ba nəɗay ɗu zlu s'Israyila gə ǎ nay nəɗay saŋa. Shinekw Cuɗiɗɗina kini niya atə ayina.

²⁶ Shinekw Cuɗiɗɗina sahan zak dzaɗina, gəni wuran micke ba, abə tsaka bə Kristu ɗu slənɗay Ɗuduwuna saŋa.

²⁷ Mezlene Shinekw ane ləkəla ala a adaw s'Askwaf de. Aba ahan de sahan ga, wutə Mari atə Zhuzef ane kini ɗa ləkəla kine tan Yesu a gəɗin igə me gurɗay dzaka ala apəna saŋa.

²⁸ Simeyuŋ təvide kine sahan a alay de, zəmbəlkakude Askwaf, wa:

²⁹ «Səgan gə Ɗuduwuna hwa ga, igə kə dzaka ane, gaka. Vərən ciba a ɗu sləra aka á mats a lapiya tsəre de.

³⁰ Aɗaba əŋ tsək ɗu zlu ɗaha al aray hwa,

³¹ ɗu gə ike kə sluməktənka a ɗaha hay‑a ba cecena saŋa.

³² Wuran parakka tsəre gə ǎ mbezlɨlkina a ma jiba hay s'iŋgeɗe de, daradza a ɗagadiyaka ɗa s'Israyila.»

Simeyuŋ mbəɗnande me s'Askwaf a Mari

³³ Wutə pəban atə məman a Yesu ane, ɗa ge ba s'ajipu apə me ka gə Simeyuŋ ruvəka ala apəna saŋa.

³⁴ Simeyuŋ gəktənaŋade barka, dzakəna a Mari məman a kine ane, wa: «Askwaf təfkede kine saŋa gəni ɗaha hay duna a ɗa s'Israyila de à ɗá tataŋa, ɗa s'iŋgeɗe à ɗá paŋakude aɗaba wuran. Wuran ǎ za alama gə ɗaha hay à ɗá təvaŋade bə saŋa.

³⁵ Ǎ miyede dzəmŋa ɗaha hay gə i shuɓəɗay a bembec hay tan de saŋa. Ike i ŋasaray aka kini, zlama zlaɗa ǎ njislkɨna ande a bembec ba ka mbərkwa.»

Anna mbəɗtənande me s'Askwaf a ɗaha hay

³⁶ Hər s'iŋgeɗe kini zak, ɗu mbəɗɗitənande me s'Askwaf a ɗaha hay, sləmay ene Anna, di Fanuwel a jiba s'Aser de, ghalaka ba kurcukkwa. Zak pəɗika aveŋ ciɓa adə humas, sləŋa humas mətskənaŋa.

³⁷ Zak ba wudəge hərmana, ha cikika aveŋ kurkur zhire ŋa ene fuɗaw. Luvaɗ luvaɗ ba, lapas lapas ba, zheke aba a adaw s'Askwaf de a hətsɗin galəmnzay, bər meshahwam, giya atə maduwa.

³⁸ Wuran kini laka a ahan de sahan, takənmandar‑a sləkəɗɗin me ene a Askwaf, dzəktən me kine sahan a ɗa gə ba cecena tan ɗa ba ba sərte gə Zheruzalem ǎ nje ŋa ene apəna saŋa.

Mbəɗɗiŋa ala a Nazaret

³⁹ A aŋəde wutə pəban atə məman a Yesu ɗa kəɗkəla gə s'igə me gurɗay Ɗuduwuna təfkəla ga, ɗa mbəɗəkŋa atə ayina ala a hu tan de a Nazaret a higay Galile de.

⁴⁰ Kine niya ghirke, nzəɗa ene atə həŋkale ene ɗəfkənaŋade awiba, Askwaf gəkənka səlam tsəre ene.

Yesu a adaw s'Askwaf de a Zheruzalem

⁴¹ Ba kəla vaɗay, wutə pəban atə məman a Yesu, ɗa ləlak a gə wumbri Paska a Zheruzalem.

⁴² A aŋəde Yesu gaka kine s'aveŋ jaŋwa brecaw ga, ɗa lak atə ayina ala akənahan apə isaɗe wumbri sahan‑a.

⁴³ Wumbri kəɗaka ga, wutə pəban atə məman ba huɗay tan ala adaw, mbatse Yesu zayakade a Zheruzalem, wutan ɗa səna ba.

⁴⁴ Ɗa gurəkəl niya a dagava ɗa gə de ɗa like caca, ha ɗa fəgəmak dəppa a ləɗay, ta ɗa takənmandar‑a a gusɗiya a ma yaha hay tan de atə a ma ɗa gə de ɗa səna a zhek.

⁴⁵ Amá ɗa nzəka ba, si ɗa mbəɗəkŋa adəɓa ala a Zheruzalem a ləɗay a gusɗiya.

⁴⁶ Hənɗay ala apə məŋgan, ta ɗa laka nzəɗiya i zaɗay a adaw s'Askwaf de a dagava malum hay s'i Zhuwif hay de, tsukw dzaɗay tan, ghaya mbucetənamiya me hay.

⁴⁷ Ba cecena ɗa gə ɗa tsukw dzaɗay ene saŋa, ɗa ge ba s'ajipu apə həŋkale ene ka atə jawapa hay gə vurɨtəna saŋa.

⁴⁸ Wutə pəban atə məman ane ba ɗa hadzəkpan aray ga, ɗa ge ba s'ajipu ene. Məman dzakəna, wa: «Kine hwa, amnaya zla kə gɨməna aŋa? Mene atə pabay dəgiya ŋa man wushakakude a gushɗiken.»

⁴⁹ Wuran ane zləmkənhətənaŋa, wa: «Amnaya kwa guskənaw? Kwa səna bə gəni ənne saŋa si əŋ zheke a adaw Paba de təku?»

⁵⁰ Amá wutan ɗa sənkede ba a igə wuran dzəktəna sahan.

⁵¹ Mezlene Yesu ane tsukwika me tan, huwak atə ayitəna ala a Nazaret. Məman ga, bəride ihay sahan ba cecena a ŋa ene de.

⁵² Yesu təf ba ghərɗay, həŋkale ene kini təf ba ɗəfɗinaŋade, Askwaf hiyiika, ɗaha hay kini ba cecena ɗa hiyiika.