Luka 19 - Vame

Wutə Yesu atə Jakayus

¹ Yesu lide a hu Yeriku de, niya like a tənday hu de.

² Akənahan sahan, dagwa s'iŋgeɗe niya sləmay ene Jakayus. Wuran məlmal ɗa maməsl hadama, ɗu gelipe zlama adəɓa.

³ Gwasək tsaɗika Yesu a sənɗiyede, amá dzəgwika ba a ma fuɗəɗay ɗaha hay de, aɗaba wuran ɗu dekkuna.

⁴ Kugwan ga, wuran ane ɗəvəraka ala apə miya, laka a dzənɗide a kevirke de a tsaɗika, aɗaba Yesu like i ma sahan‑a.

⁵ A aŋəde Yesu laka a ma kevirke de sahan ga, pakakude aray ala akufa, dzakəna, wa: «Jakayus, fatayede yakwa yakwa, aɗaba bəkwa saŋa si əŋ le a tsukɗay adiyaka.»

⁶ Jakayus ane ba ciɗa fatayede, təvika abi higəɗay ala adiyana.

⁷ Ɗa gə ɗa tsaka ahan sahan ba cecena tan ɗa takənmandar‑a a dəduŋɗay, wa: «Caka ɗece, le a tsukɗay adə ɗu hipe dəgiya!»

⁸ Amá Jakayus tavaka apə miya a Ɗuduwuna ka, wa: «Ɗuduwuna hwa, ənne əŋ hulɨtənakude tiɗma s'almane hwa a talage hay. Ɗu gə abə əŋ zak təfɗipəna away i zlərma kini, əŋ mbəɗəlhənde aray tənday fuɗaw.»

⁹ Yesu, wa: «Bəkwa ga, ɗa s'adaw saŋa ɗa nzək zluwaɗaya, aɗaba ike kini ba ike shef s'Abraham.

¹⁰ Aɗaba Kine ɗu səlammərzheŋ ga, naya a gusɗiya atə a zlu ba s'igə zak səzaɗaya saŋa.»

Araja i mbəɗ s'alay i shiŋgu

¹¹ Ɗaha hay niya ɗa tsukw me Yesu ga, dzəktəna araja s'iŋgeɗe, aɗaba sləŋa hərzhika Zheruzalem atə aɗaba ɗaha ɗa gurəkəl gurɗay s'Askwaf ǎ nay aba a ahan de sahan.

¹² Amá gə na igə wuran dzəktəna, wa: «Dagwa eɗe kine məlmal, slabakakude huwaka ala a higay s'iŋgeɗe de kwalala a ləɗay a nzəɗin bay tsəre a ŋa ene, ta ǎ mbəɗiŋa.

¹³ Ndala huke ga, həktənakude ɗa sləra ene jem, huləktənka shiŋgu mbalaw ɓili‑ɓiliya. Dzəktəna, wa: “Mbiɗɨnla alay ha ala a sərte naɗayadaw hwa de.”

¹⁴ Amá ɗa hu ene ɗa micka ba, ɗa slənika ɗa s'iŋgeɗe adede ayina a ləɗay a dzaɗiya, wa: “Mene ma zləha bə dagwa sahan gɨkiya bay aŋade ayiməna.”

¹⁵ Wuran ane a aŋəde nzək bay tsəre sahan ga, mbəɗiŋa ala higay ene de. Həktənakude ɗa sləra gə zak huləɗitənka shiŋgu ane, a sənɗiyede a igə gha wiya tan kini nzəkənarde.

¹⁶ «Ɗu zuŋŋuna naya, wa: “Paba s'adaw hwa, a shiŋgu aka ane ga, əŋ nzəkənaŋade mbalaw jem.”

¹⁷ Pəban s'adaw ene, wa: “Həslka duna, ike ɗu sləra sələmna. Ba ka aŋa kə gək jire tsəre a ikutewuna de saŋa ga, əŋ gɨlkina ɗu gurə hu hay gərgəra jem.”

¹⁸ Ɗu gə ala apə caw kini naya, wa: “Paba s'adaw hwa, a shiŋgu aka ane, əŋ nzəkənaŋade mbalaw ɗara.”

¹⁹ Wuran ane dzakəna ayina kini, wa: “Ike kini əŋ gɨlkina ɗu gurə hu hay gərgəra ɗara.”

²⁰ Iŋgeɗe tan naya ga, dzakəna, wa: “Paba s'adaw hwa, na shiŋgu aka gə zak kə vərkuwa ane, əŋ nanide a bagwadza de, əŋ shiɓkəla hakkwa.

²¹ Zləŋwaɗ vəɗkənwa ande ayika, aɗaba əŋ səna ike ɗu zlazlaɗanna. Igə ike bə kə ɗəfka kini ba kə təva. Igə ike bə kə mbətska kini ba kə nzəra.”

²² «Pəban s'adaw ene ane, wa: “Ŋguɗi s'aweɗe! Əŋ niŋken abi me hay aka sahan. Kə səna ika ənne ɗu zlazlaɗanna, igə əŋ ɗəfika bə kini əŋ təva, igə əŋ mbətska bə kini əŋ nzəra bəhe?

²³ I mà, amnaya kə hətskude ba almane hwa sahan a baŋ de, gəni abə əŋ nakayadaw, əŋ nəkay a tsəmɗiyede al ahwam arde?”

²⁴ Mezlene dzatəna a ɗa gə wutə akənahan saŋa, wa: “Tivɨnpəna mbalaw ɓile ene sahan, ɗifɨnnəhənaŋade a ɗu gə niya i mbalaw jem saŋa.”

²⁵ Ɗa sahan ɗa dzakəna, wa: “Paba s'adaw man, shiŋgu niya tsaw mbalaw jem a ma ene de dəgiya!”

²⁶ «Wuran ane, wa: “Na əŋ dzakuna: Ɗu gə abə away niya a ma ene de ga, à ɗá ɗəfənhənaŋade adəɓa. Amá ɗu gə abə away niba a ma ene de ga, aba atə aŋa kutew a ma ene de saŋa kini à ɗá sləɗpəna.

²⁷ I ɗa dawa hwa gə ɗa zləhka bə əŋ gɨkiya bay aŋade ayitəna saŋa ga, mikɨntan ala a ma hwa de, kiɗɨnletəna aba apə aray hwa‑a.”»

Ləɗay Yesu ala a Zheruzalem

²⁸ Adede a me hay ene sahan ga, Yesu ane lakede apə miya, a dzənɗay ala a Zheruzalem.

²⁹ A aŋəde hərzhika Baytifaji atə Baytaniya, apə zhek kuwan‑a gə ɗa hawa i kuwan s'Aniranira saŋa ga, slənika ɗa kutə wuran s'iŋgeɗe caw,

³⁰ dzəktəna, wa: «Len ala a hu de gə tá apə miya saŋa. Abə à kwá lɨde ga, à kwá le a nzə kine s'izhuŋwa i nəŋɗay, zlama ɗa dzənəkpəna ba aride, pirkɨnpəna, mikɨnwa.

³¹ Abə ɗeɗe mbutsəkkunamiya, wa: “Amnaya kwa para saŋa?” Jɨnna a ɗuhan kwene, ika: “Ɗuduwuna niya i wudar ene.”»

³² Ɗa gə slənəktan ane ba huɗay tan, ɗa laka a nzə s'away hay ba ka aŋa wuran dzəktəna sahan.

³³ Niya ɗa para izhuŋwa ane ga, ɗahay ene ɗa mbutsəktənamiya, wa: «Amnaya kwa para izhuŋwa saŋa?»

³⁴ Ɗa zləmkənhətənaŋa, wa: «Ɗuduwuna man niya i wudar ene.»

³⁵ Ɗa minəka kine s'izhuŋwa ane a Yesu‑a, ɗa ndikkinpan ifafətɗay hay tan, ta ɗa dzənkəlpəna Yesu.

³⁶ A aŋəde niya like ga, ɗaha hay ɗa fəfətərkənhənande ifafətɗay hay tan a ciba.

³⁷ Sləŋa laka ba dikkwa i Zheruzalem, a ma gə de fitkike ada apə ŋa kuwan s'Aniranira ka saŋa ga, ba cecena abaga ɗa kutə wuran saŋa ɗa ruhwaka i higəɗay, ɗa takənmandar‑a a zəmbəl s'Askwaf abi pa taŋw, aɗaba s'ajipu hay gə wutan ɗa tsaka saŋa ba cecena.

³⁸ Ɗa dzawa, wa: «Askwaf á gɨnaŋade barka a bay gə nike i sləmay Ɗuduwuna saŋa! Lapiya tsəre á za a askwaf de, zhimbilinməna Askwaf gə kwalala a askwaf de saŋa!»

³⁹ Farisa hay s'iŋgeɗe a fuɗəɗay ɗaha hay de sahan, ɗa dzakəna a Yesu, wa: «Malum, sləktənaŋade a ɗa kutɨɗiken saŋa ɗá pawande.»

⁴⁰ Wuran zləmkənhətənaŋa, wa: «Na əŋ dzakuna: Gha wutan ɗa pakande kini, kuwan hay saŋa à ɗá ŋgulah!»

Yesu yəm Zheruzalem

⁴¹ A aŋəde Yesu hərzhika hu sahan, ba hadzəkpan aray ga, kaya a yəmɗiya,

⁴² wa: «Ba s'ike i ŋasaray kə sənkiyede həmba a igə ǎ vərak lapiya tsəre a hənɗay saŋa de! Amá a səgan de ga, i shiɓɗay ande a aray aka.

⁴³ Aɗaba hənɗay hay s'iŋgeɗe niya à ɗá naya a njiɗiken ga, ɗa dawa aka à ɗá zləŋakariya i dalaha tan gəni ba ɗu ɓile kini á lede ba, à ɗá pislɨkinakude gha i magəna kini.

⁴⁴ À ɗá naya a ginɗikwenakude atə waghay aka gə wutə a tənday hu de. Ba kuwan ɓile kini à ɗá harənde ba apə miya ene kuwan‑a, aɗaba kə sənkede ba a sərte gə Askwaf naya a tsaɗiyakaŋa aray saŋa.»

Yesu ɓər ɗa mbəɗ s'alay a adaw s'Askwaf de

⁴⁵ Mezlene Yesu lide a adaw s'Askwaf de, kaya a ɓurɗiyede ɗa mbəɗ s'alay ala a geshe,

⁴⁶ dzəktəna, wa: «Niya i hətsɗay a wakita s'Askwaf de, wa: “Adaw hwa ga, ǎ za ba s'adaw gə maduwa,” amá ni, kwene kwa gəkəlka ghəlkwe s'abra hay!»

⁴⁷ Tsətsugəkəlhətan away a ɗaha hay a adaw s'Askwaf de ba kəla mandaɗay. Məlmal hay ɗa slumə ɗaha hay atə Askwaf atə malum hay me gurɗay, ŋa məlmal hay hu ga, ɗa zheke aba a gus vəɗɗika shifa ene.

⁴⁸ Amá ɗa səna ba a igə ɗa giya, aɗaba ɗaha hay ba cecena ɗa vərkənka həŋkale tan a tsukw me ene.