Luka 18 - Vame

Araja i wudəge hərmana atə ɗu nda sheriya

¹ Yesu dzəktəna araja a ɗa kutə wuran a dzaɗilhətan gəni ɗá hadzəl bə zhek aride a gə maduwa ba kəla mandaɗay, gha a sərte gəna de kini.

² Dzəktəna, wa: «Ɗu nda sheriya eɗe zak a hu s'iŋgeɗe de, ɗəfa bə mbəray apə Askwaf‑a, lambe ene niba apə ɗaha ka aride.

³ Wudəge hərmana s'iŋgeɗe kini zak aba a hu sahan de, ba kəla mandaɗay tewirke ala a ma ene de a dzaɗina, wa: “Mbazləlhan jire tsəre hwa a ɗu dawa hwa.”

⁴ Ɗu nda sheriya sahan kəraka, ha həhənaka ba duna. Adede a ahan ga, takənmandar‑a a dzaɗiya a ŋa ene de, wa: “Gha əŋ ɗəfa bə mbəray apə Askwaf‑a, lambe hwa niba apə ɗaha ka kini,

⁵ amá wudəge hər saŋa kaɗuwakude həŋkale saŋa ga, agwadza ba əŋ mbazləlhan jire tsəre ene a ɗu dawa ene sahan, gəni á tawaray bə cine a nəɗay a wushɗiw ŋa.”»

⁶ Ɗuduwuna ɗəfkənhətənaŋade adəɓa, wa: «Cukwɨna ɗece ba hasha igə ɗu nda sheriya gə giya ba away i ciba ene saŋa dzawa.

⁷ I ni, Askwaf ǎ vərtəna bə jire tsəre a ɗa gə wuran dzadzarəktənede, ɗa yimke ala a ma ene de, luvaɗ luvaɗ ba, lapas lapas bə saŋa aba apə yakwa yakwa ka he?

⁸ Na əŋ dzakuna: Ǎ vərtən jire tsəre aba apə yakwa yakwa ka. I mà, abə Kine ɗu səlammərzheŋ ǎ mbəɗiŋa mà, ǎ nay ɗəma a nzə ɗa gə ɗa ɗəfəkpənŋa apə higay‑a he?»

Araja i ɗu gə maməsl shiŋgu hadama atə humas Farisa

⁹ Wuran ane dzəktəna araja saŋa adəɓa a ɗa gə ɗa cece ŋa tan wa ma ɗa jire, ɗa nenik ɗa s'iŋgeɗe saŋa, wa:

¹⁰ «Mizhe hay caw ɗa dzənaka ala a adaw s'Askwaf de a gə maduwa, ɗu ɓile humas Farisa, ɗu ɓile kini ɗu maməsl hadama.

¹¹ Humas Farisa saŋa slabakakude, takənmandar‑a a gə maduwa a bembec ene de, wa: “Askwaf hwa, əŋ sləkəɗək me aɗaba ma gərgəra atə ɗa s'iŋgeɗe gə wutan akar hay, sləra tan ba gə ɓutsam tsəre, atə gwardzire saŋa, adəɓa kini ma gərgəra atə ɗu maməsl hadama gə na wuran saŋa.

¹² Ənne ba kəla kasuka əŋ bər meshahwam səlay caw. Ba kəla igə əŋ nzəka, əŋ təvakede ɓile a jem de.”

¹³ Ɗu maməsl hadama ane laka a tavaɗaya kwalala, ba s'aray ala a askwaf de kini zləhka bə paɗiya, hətskənande alay a bembec ene, wa: “Askwaf hwa, ba kəmkam yəmude mərga, ənne ɗu hipe.”»

¹⁴ Yesu, wa: «Na əŋ dzakuna: A aŋəde ɗa huke ala adaw saŋa, ba dagwa sahan aŋa Askwaf gəkəlka ɗu jire, aŋade a humas Farisa. Aɗaba ɗu gə abə pakənŋakude a ŋa ene ga, à ɗá kaɓənka, amá ɗu gə abə kaɓika ŋa ene ga, à ɗá panŋakude.»

Yesu gɨtənaŋade barka a wayə mishishina

¹⁵ Bigeɗe ɗaha hay niya ɗa cimkiya aba atə wayə gə apə alay‑a ala a ma Yesu de, gəni á ɗufepətan alay ene, a gəɗitənaŋade barka, ɗa kutə wuran ba ɗa tsaka ahan sahan ga, ɗa sləkəktənaŋade a ɗa sahan.

¹⁶ Amá Yesu həktənakude ala a ma ene, dzəktəna a ɗa kutə wuran, wa: «Herɨntənde a wayə mishishina ɗá nay ala a ma hwa de, ghɨntənŋa ba. Aɗaba gurɗay s'Askwaf saŋa, ba i ɗa gə ka wutan.

¹⁷ Na əŋ dzakuna ba jire, ɗu gə abə təvika bə gurɗay s'Askwaf ka i kine kutew ga, jukka bə ləɗide ede aride.»

Ɗu s'almane atə gurɗay s'Askwaf

¹⁸ Məlmal Zhuwif hay s'iŋgeɗe mbutsəkənamiya a Yesu‑a, wa: «Malum sələmna, əŋ ge kəma ta ə̌ŋ nje shifa gə kəɗɗay ene niba aride saŋa?»

¹⁹ Yesu zləmkənhənaŋa, wa: «Amnaya kə hanaw i ɗu sələmna saŋa? Ɗu sələmna s'iŋgeɗe niba, si ba s'Askwaf ɓile.

²⁰ Ike ga, kə səna a me gurɗay hay gə wa: “Giya bə gwardzire, vəɗa bə shifa apə shek aka, giya ba akar, giya bə siyade fida ala apə ɗaha ka, ɗəɗəm wutə pabay atə mamay,”» waka saŋa.

²¹ Dagwa ane, wa: «Ahan ba cecena əŋ kutika ba kwa ada kine ka.»

²² Yesu sənay ahan ga, dzakəna, wa: «Miyakaŋade ba s'iɓile. Le shumɨlakude ihay aka ba cecena, hulɨtənka shiŋgu ene a talage hay‑a, ike ikə le a nzə s'almane a askwaf de. Mezlene ga, nay kutɨnaw.»

²³ Dagwa ane ba sənay a me sahan ga, fəgakakude fiyuwwa, aɗaba almane ene lakede a aray‑a.

²⁴ Yesu ceciya dagwa ane fəgakakude saŋa ga, wa: «Zlazlaɗa a ɗa gelipe a ləɗide a gurɗay s'Askwaf de dəgiya!

²⁵ Butu ba s'i s'azləgwame a laɗayede a mika likeper‑a aŋade a i ɗu gelipe a ləɗide a gurɗay s'Askwaf de.»

²⁶ Ɗa gə ɗa sənay a me ene sahan, wa: «Abə ba kugwan mà, wiya ta jukka zluwaɗaya?»

²⁷ Wuran ane zləmkənhətənaŋa, wa: «Igə gɨkiya ba a ma ɗa səlammərzheŋ de ga, a ma s'Askwaf de gɨkiya.»

²⁸ Piyer dzakəna, wa: «Mene ga, ma hərkənde a away hay ba cecena a kutɨɗiken.»

²⁹ Yesu dzəktəna, wa: «Na əŋ dzakuna ba jire, ɗu gə abə hərkənde a adaw ene, bi a hər ene, bi a wayə məman, bi a wutə pəban atə məman, ŋa waghay ene, aɗaba gurɗay s'Askwaf ga,

³⁰ ǎ njiya ǎ ndimde aba atə ahan aba a zamane saŋa de kini. A zamane de gə ǎ nay ala apə miya kini ǎ nje shifa gə kəɗɗay ene niba aride saŋa.»

Yesu dzawa ala apə məŋgan me mətsɗay ene atə slabaɗayede ene ada mika ka

³¹ Yesu həktənakude ɗaha jaŋwa brecaw saŋa ala a ma ene, dzəktəna, wa: «Na ma jinke ala a Zheruzalem saŋa ga, ba cecena igə ɗa mbəɗɗitənande me s'Askwaf a ɗaha hay ɗa hətska ala apə Kine ɗu səlammərzheŋ‑a saŋa, ǎ le a gaɗaya akənahan.

³² Aɗaba à ɗá le a ɗəfɗitənde a alay de a ɗa gə ɗa səna ba a Askwaf, wutan à ɗá gɨl gege, à ɗá pishede i gənəhɗay, à ɗá tufɨnde minya a aray de,

³³ à ɗá slalna i kurpe, adede a ahan, à ɗá viɗka. A hənɗay de ala apə məŋgan ga, ǎ slabayede ada a mika ka.»

³⁴ Amá wutan ba s'ama kini ɗa səniyede a me sahan de, i shiɓɗay a ma tan de. Ɗa sənkede bə ɗəma a igə wuran gus dzaɗitəna.

Yesu mbər ɗu ŋgulaf

³⁵ Sləŋa Yesu hərzhika Yeriku ga, ɗu ŋgulaf s'iŋgeɗe kini niya i zaɗay ande a ciba, ŋeŋilke.

³⁶ Shinkay ɗaha hay duna ɗa likede saŋa ga, mbutsəka igə gaka.

³⁷ Ɗa dzakəna, wa: «Yesu humas Nazaret niya likede.»

³⁸ Wuran ane ŋgulahaka, wa: «Yesu, shef Davit, ba kəmkam yəmude mərga!»

³⁹ Ɗa gə wutə apə miya saŋa ɗa sləkkənaŋade wa á pawande, amá wuran ɗəfkənaŋade a ŋguləhɗay abi nzəɗa, wa: «Shef Davit, ba kəmkam yəmude mərga!»

⁴⁰ Yesu ane tavaka, dzəktəna wa ɗá minəka. A aŋəde ŋgulaf sahan kəzəkpan ga, mbutsəkənamiya, wa:

⁴¹ «Kə gwasa əŋ giyakana ama?» Ŋgulaf ane, wa: «Ɗuduwuna hwa, əŋ gwasa əŋ tsakika aray.»

⁴² Mezlene Yesu dzakəna, wa: «Aray hay aka ɗá pepemiya, ɗəfɗipənŋa aka zluwikina.»

⁴³ Ciɗa aba ahan de sahan, aray hay ene ane ɗa papəkmiya, kutək Yesu, ghaya ɗəɗəma Askwaf. Ba cecena ɗa gə ɗa tsaka ahan sahan, ɗa takənmandar‑a a zəmbəl s'Askwaf.