Luka 17 - Vame

Ɓusəɗin hipe a ɗaha

¹ Yesu dzəktəna a ɗa kutə wuran, wa: «Gəni ituvəɗinariya səlay a ɗaha ka a ala hipe de á za bə ga, ahan gɨkiya ba. Amá palase a ɗu gə abə wuran gaka ituvəɗinariya səlay a ɗaha ka sahan!

² Zlaɗa gə ǎ nje ɗuhan saŋa, agwadza ɗa nəŋkinde van a taŋw nde, ɗa dzəfkilde a heye de, aŋade a aŋa təvənariya səlay aba a ɗu ɓile kini a ɗa mishishina de saŋa ala a hipe de.

³ Ɗifɨna zlə sləmay ba kərətta apə ŋa kwan‑a. Abə kine mamay mbəziyakana me ga, sləkənaŋade. Abə mbəɗkakude zaɗay ene, ɓushɨnika.

⁴ Aŋa gha giyakana hipe səlay ciɓa a fəgəmɗay ɓile de kini, abə ba mbuɗiŋa tsaw ala a ma aka de səlay ciɓa a nəɗay a dzaɗiyaka, wa: “Əŋ mbəɗakude zaɗay hwa” ga, ɓushɨnika.»

Ɗəfɗipənŋa a Askwaf‑a

⁵ Ɗa slənɗay ɗa dzakəna a Ɗuduwuna, wa: «Ɗəfənhəmənaŋade a ɗəfɗipənŋa man.»

⁶ Ɗuduwuna zləmkənhətənaŋa, wa: «Abə ɗəfɗipənŋa kwan a nəkay ba ka shef pili i duna ga, gha kwa dzakina a kevirke gə na saŋa kwene, ika: “Kətede ada akəna, le ciba a heye de” kini, á tsukkikuna.»

Ɗu sləra gə gika bə sləra ene

⁷ «Wiya ayikunde i ɗu sləra ene gə mbətsən kuvak, bi tsəgən daba hay, abə nidaw ada a kiɓa ni, dzana, wa: “Nay ba yakwa yakwa ala aŋade a ipəɗay saŋa?”

⁸ Bira dzana, wa: “Ɗawuka ɗəfka, fetɨde a ifətɗay sləra aka de, tsəmiwede əŋ pɨka te, əŋ shaka, ta ikə piya, ikə sawa iyaka bə təku?”

⁹ Sləkəɗəna təku me a ɗu sləra ene sahan, aɗaba gika sləra gə wuran ɗəfkənaŋade saŋa?

¹⁰ I kwan kini ba kugunhan. Abə kwa gika sləra gə Askwaf ɗəfəkunaŋade ba cecena saŋa ga, jena kwene, ika: “Mene ba ma ɗa sləra ɗaya, ma gika ba s'igə ɗa ɗəfəkmənaŋa sləŋa.”»

Yesu mbər ɗa dərve tə jem

¹¹ Yesu aba apə ŋa ciba ka a ləɗay ala a Zheruzalem ga, laka a laɗayede a dagava wutə Samariya ka atə Galile.

¹² Laka a hu s'iŋgeɗe de ga, ɗa dərve jem ɗa laka a ŋgərɗinande ba ŋgərɗay, ɗa tatavaka dzaɗ‑dzaɗɗa i me ciba.

¹³ Ɗa hətskəlde a ŋguləhɗay abi nzəɗa, wa: «Yesu, malum, yəmmənde səke mərga!»

¹⁴ Yesu ane tsatsəktənakude, dzəktəna, wa: «Len mbezlɨnlehətan ŋa kwan a ɗa slumə ɗaha hay atə Askwaf.» Wutan ane zlama wutə aba apə ŋa ləɗay‑a ga, ɗa mburaka ba laŋ‑laŋŋa.

¹⁵ Ɗu ɓile tan ba tsaka mbəraka ga, mbəɗiŋa ala a ma Yesu de, ghaya zəmbəla Askwaf abi pa taŋw.

¹⁶ Naya a hətsɗinka galəmnzay miveŋ ene ba təppa apə higay‑a, kaya a sləkəɗɗin me. Dagwa sahan humas ɗa Samariya.

¹⁷ Mezlene Yesu, wa: «Ɗaha jem saŋa ba cecena tan ɗa mburaka ba laŋŋa bəhe? I mà, ede ta ɗaha tahke saŋa?

¹⁸ Ba ɗu ɓile tan kini dzamika bə a nəɗay a ɗəɗəmɗika Askwaf, si ba mbirkwe saŋa ɓile dəgiya!»

¹⁹ Mezlene dzakəna, wa: «Slabakude, le adaw, ɗəfɗipənŋa aka zluwikina.»

Nəɗay gurɗay s'Askwaf

²⁰ Farisa hay ɗa mbutsəkənamiya a Yesu‑a, wa: «Gurɗay s'Askwaf mà, ǎ nay bəgəna?» Zləmkənhətənaŋa, wa: «Gurɗay s'Askwaf ga, ǎ nay ka igə ɗa caka al aray ba.

²¹ À ɗá dzakuna bə zlama adəɓa, wa: “Na wuran akəna,” bi wa: “Tá wuran alata.” Aɗaba gurɗay s'Askwaf sahan niya aba a duvak kwan de.»

²² Dzəktəna a ɗa kutə wuran, wa: «Zlama hənɗay gem hay s'iŋgeɗe niya à ɗá nay, à kwá kum ba tsaɗika hənɗay gem ɓile a hənɗay gem hay s'i Kine ɗu səlammərzheŋ de, amá à kwá caka ba.

²³ À ɗá dzakuna, wa: “Na wuran akəna, tá wuran alata.” Amá kwene len ba, ɗivɨrintənarde ba.

²⁴ Ba ka i pə s'aray s'aveŋ gə tamandar‑a ada a dalbe ɓile ka, ha likiya ala a dalbe s'iŋgeɗe de saŋa ga, Kine ɗu səlammərzheŋ kini à ɗá caka ba kugunhan bək mbəɗɗiŋa ene.

²⁵ Amá ga, si shaka te zlaɗa hay gərgərgəra ba duna, ɗa zamane bəkwa saŋa ɗa ɓərpəna te a zhek‑a.

²⁶ Ba s'igə gaka a zamane Nuhu de saŋa ga, a hənɗay gem hay Kine ɗu səlammərzheŋ de kini ǎ ge ba kugunhan.

²⁷ Ɗaha hay ɗa pəka, ɗa saka, ɗa tuvək hər hay, ɗa vurəktən dile hay tan a mizhe hay, ha ala a bəga de Nuhu lide a palambak s'ahwam de. Ahwam kəɗɗil duniya, naya a ndərɓəɗitənakude ba cecena tan.

²⁸ Zlama adəɓa, ǎ giya ba ka aŋa gaka a zamane Ludu de: Ɗaha hay ɗa pəka, ɗa saka, ɗa suməka away hay, aŋa ɗa suməkəla, ɗa mbətska away hay tan, ɗa hahənka adaw hay tan saŋa.

²⁹ Amá bək naɗayede Ludu ada Suduma ka ga, Askwaf ndəɗitənaŋade akwa atə slahan hay ene ba ka kuwan hay a ɗa hu sahan, duləktənakude ba cecena.

³⁰ Bəga abə Kine ɗu səlammərzheŋ ǎ dziŋede kini ǎ ge ba kugunhan.

³¹ «Bək sahan ga, gha ɗu gə gəɗika apə adaw‑a kini á fatay bə cine ala adide a ləɗay a tsəm s'away hay ene. Ɗu gə a kuvak de kini á mbəɗŋa bə cine ala adaw.

³² Rirɨkkinakude igə zak gaɗaya apə hər Ludu‑a saŋa.

³³ Ɗu gə abə gus tsufə ŋa ene ga, ǎ səzəla, amá ɗu gə abə səskəla ga, ǎ nje ŋa ene.

³⁴ Na əŋ dzakuna: Luvaɗ bək sahan ga, gha ɗaha caw wutə aba apə mahənɗay ɓile ka kini, à ɗá hula ɗu ɓile, ɗu ɓile à ɗá harənde.

³⁵ Gha hər hay caw ɗa gən van amazhekde kini, à ɗá hula ɗu ɓile, ɗu ɓile à ɗá harənde. [

³⁶ Gha ɗaha caw wutə a kuvak de kini, à ɗá hula ɗu ɓile, ɗu ɓile à ɗá harənde.]»

³⁷ Mezlene ɗa kutə wuran ane ɗa mbutsəkənamiya, wa: «Ɗuduwuna, ahan sahan mà, ǎ ge a magəna de?» Wuran zləmkənhətənaŋa, wa: «Ba ma gə mətska s'away ǎ za apəna saŋa ga, makwada hay kini à ɗá məslŋa aba ala a ma sahan de.»