Luka 16 - Vame

Araja i ɗu sləra zlərma

¹ Yesu dzəktəna a ɗa kutə wuran, wa: «Ɗu gelipe eɗe zak i ɗu sləra ene, ɗəfkənde almane ene a alay de. Ɗa s'iŋgeɗe ɗa laka a dzaɗina wa ɗu sləra ene niya pucilhan almane.

² Wuran ane hakakude ɗu sləra ene sahan dzakəna, wa: “Ike mà, kə giya ama tete əŋ shinkay ɗa dzawa ala apaka saŋa? Abə kugwan ga, vəru lisafi sləra aka, aɗaba ike kə gɨkiya bə cine ɗu sləra hwa.”

³ «Ɗu sləra ane slasləkakude a ŋa ene de, wa: “Səgan mà, əŋ ge kəma? Aɗaba pitɗay ene niba, paba s'adaw hwa ǎ ɓərnuwede a sləra ka. A mbətsɗay, nzəɗa hwa niba. A ŋaŋəlɗay kini ǎ za mbəray ayuwa.

⁴ Yawwa, səgan gə əŋ səna a igə ə̌ŋ giya, gəni ɗaha hay à ɗá təfnaw aditan abə à ɗá ɓərnuwede a sləra ka.”

⁵ Hahəktənakude ɗa gə gwedere pəban s'adaw ene niya apə tan‑a i ɓili‑ɓiliya. Mbutsəkənamiya a ɗu zuŋŋuna ka, wa: “Gwedere paba s'adaw hwa kəmta apaka?”

⁶ Wuran ane zləmkənhənaŋa, wa: “Ambár dəraŋw jem jem caw.” Ɗu sləra sahan, wa: “Na wakita aka, zakade, hətspan dəraŋw jem ba yakwa yakwa.”

⁷ Mbutsəkənamiya a ɗu s'iŋgeɗe ka adəɓa, wa: “Ike mà, gwedere ene kəmta apaka?” Zləmkənhənaŋa, wa: “Alkame bəhwa dərmak.” Ɗu sləra ane, wa: “Na wakita aka, hətspan bəhwa kurkur zhire.”

⁸ «Pəban s'adaw ene ane, takənmandar‑a a zləba ɗu sləra ene zlərma zlərma sahan, aɗaba gək sləra i ɗemɗema tsəre. Ɗəma kini ɗa zamane saŋa ɗa ge ɗemɗema tsəre a duvak tan de, ndəma aba atə i ɗa gə wutə a parakka tsəre de.»

⁹ Yesu ɗəfkənhətənaŋade, wa: «Na əŋ dzakuna: Kwene kini burɨnle yaga al almane duniya saŋa, gəni abə kəɗəkkunaŋade ga, wutan à ɗá le a tifɗikwene ala a mazaɗay de gə kəɗɗay ene niba aride saŋa.

¹⁰ Ɗu gə abə gək jire a ikutewuna de ga, a iduwuna de kini ǎ giya ba kugunhan. Amá ɗu gə abə gək zlərma a ikutewuna de, a iduwuna de kini ǎ ge ba zlərma sahan.

¹¹ Abə kwa gəka bə jire tsəre al almane duniya saŋa mà, wiya ǎ le a ɗəfɗikunde almane hashina a alay de?

¹² Zlama adəɓa, abə kwa gəka bə jire tsəre al iɗaha mà, wiya ǎ vərkuna i kwan ayikuna?»

¹³ «Niba ɗu sləra gə jukka gəɗitənka sləra a pəbe s'adaw hay‑a caw. Ba bi harənde a ɗu ɓile, micɨka i ɗu ɓile. Bi bɨrka ɗu ɓile, fəshuka ɗu ɓile. Kwa jukka bə vərɗinka ŋa kwan a sləra s'Askwaf‑a, ghaya kwa vərənka ŋa kwan a gus s'almane ka.»

Me gurɗay Musa atə gurɗay s'Askwaf

¹⁴ Farisa hay ba ɗa sənay a ahan ga, ɗa hətskəlde a musəɗay a fəsuɗila, aɗaba wutan ɗa micɗiya i shiŋgu duna.

¹⁵ Yesu dzəktəna, wa: «Kwene kwa gɨl ŋa kwan ba ka kwa ɗa jire apə aray ɗaha hay‑a, amá Askwaf ga, səna a igə a bembec hay kwan de. Aɗaba igə ɗaha hay ɗa ceciya apə iduwuna ka saŋa, a ma s'Askwaf de ba ka itsatsəɗiya ba.»

¹⁶ «Wutə me gurɗay Musa atə wakita hay ɗa mbəɗɗitənande me s'Askwaf a ɗaha hay ga, ɗa gək sləra ha ala a zamane Zhaŋ ɗu bunə ɗaha de. Ba kwa ada ahan‑a sahan, ɗa nankəlhətan Labara Sələmna s'i gurɗay s'Askwaf a ɗaha hay. Gha wiya kini bɨrde ba zhek i nzəɗa ene ba cecena a ləɗide ede.

¹⁷ Butu ba səsɗay wutə askwaf atə higay aŋade a səsɗay s'igə i hətsɗay a me gurɗay de ba ikutewuna ene kini.

¹⁸ «Ɗu gə abə ɓərkede hər ene ni, təvika iŋgeɗe ga, gika gwardzire. Humas gə təvika hər gə ɗa ɓərkede sahan kini, gika ba gwardzire sahan.»

Wutə ɗu gelipe atə Lazar

¹⁹ «Ɗu gelipe eɗe zak, fafatək ba s'ifafətɗay ləfəɗ ləfəɗɗəna gə gane ene zlazlaɗa awiba saŋa. Kəla mandaɗay pe ba s'iməɗinna zləkte ene niba.

²⁰ Ɗu talage s'iŋgeɗe zak zlama adəɓa, hihinkakade ande a mavendew ɗu gelipe sahan. Sləmay ene Lazar, zhek ene ba cecena ba mbəlkay.

²¹ Aray ene ba təkka a pəspəs ɗəfka hay de gə nenike ada alay ɗu gelipe ka saŋa, amá kəlaghay ɗa ne a mitiɗɗin mbəlkay hay ene sahan.

²² Ɗu talage ane mətsaka, malika hay ɗa naya təfɗiyakude, ɗa hukəla ala apə zhek s'Abraham‑a. Ɗu gelipe sahan kini mətsaka, ɗa rika.

²³ Wuran ane niya sa zlaɗa adə ɗa gə a mika de, pakakude aray ga, tsa ba s'Abraham kwalala apə ayina, Lazar apə zhek ene ka.

²⁴ Kaya a ŋguləhɗay, wa: “Paba s'Abraham, ba kəmkam yəmude səke mərga! Slinka Lazar á le a taɗide ba me kine s'alay ene a ahwam nde, á nay a ndusləɗiwuka miɗesl al ayina, aɗaba əŋ sa zlaɗa duna a miɗesl s'akwa hay de saŋa!”

²⁵ «Amá Abraham zləmkənhənaŋa, wa: “Kine hwa, dzamakude gəni a aŋəde ike al aray saŋa ike kə pək ba məɗay tsəre, Lazar gə sak ba zlaɗa, səgan gə ɗa nduslɨn bembec ayina, ike taday kə sa zlaɗa.

²⁶ Ɗəma kini, mika tsəgwanna niya a duvak man de atə ayikuna, gəni ɗa gə ɗa guski ləɗay ada a ma man‑a ala a ma kwan de, ɗa jukka bə laɗaya. Ada a ma kwan‑a ala a ma man de kini ba kugunhan.”

²⁷ Ɗu gelipe ane dzakəna, wa: “Əŋ gɨyək ba kəmkam Paba hwa, slɨnka zla aye Lazar ala adə paba,

²⁸ aɗaba dagwa hay mama ɗa niya tə ɗara, á le a ɗəfɗitənde a zhek de, gəni wutan ɗá nay bə cine ala a ma sa zlaɗa de saŋa.”

²⁹ Abraham zləmkənhənaŋa, wa: “Wutan ɗa niya i wakita Musa atə i ɗa mbəɗɗitənande me s'Askwaf a ɗaha hay, ɗá tsukwa.”

³⁰ Amá ɗu gelipe ane, wa: “Kugwan ba paba s'Abraham, abə ɗu gə slabakede ada dagava ɗa gə ka wutə a mika de laka a nzəɗitan ga, à ɗá mbəɗakude zaɗay tan.”

³¹ Abraham kini dzakəna, wa: “Abə ba ɗa tsukkwa bə me Musa atə me ɗa mbəɗɗitənande me s'Askwaf a ɗaha hay ga, gha ɗu gə slabakede ada dagava ɗa gə ka wutə a mika de laka a nzəɗitan kini, ba à ɗá təvaŋade bə sahan.”»