Luka 15 - Vame

Araja i təmbak gə zak səzaɗaya

¹ Ɗa maməsl hadama atə ɗa hipe, ɗa kəzəkpan a Yesu ba tə duna a tsukɗika me ene.

² Farisa hay atə malum hay me gurɗay ɗa takənmandar‑a a dəduŋɗipan a duvak tan de, wa: «Dagwa saŋa təf ɗa hipe, ɗa piya away aba amazhekde dəgiya!»

³ Mezlene wuran dzəktəna araja saŋa, wa:

⁴ «Wiya ayikunde abə i təmbagay dərmak, ɓile ene səzaka ni, hərtənde ba a ɗa gə ɗa maka kurkur tahke ŋa ene tahke saŋa akiɓde, a ləɗay a gus ɓile gə səzaka sahan, ha abə nzəka saŋa?

⁵ Abə nzəka ga, pekɨpan a taŋw abi higəɗay.

⁶ Abə nidaw kini, hehetənakude yaga hay ene atə ɗa mavendew ene, dzatəna, wa: “Higinmen, aɗaba əŋ nzək təmbak hwa gə zak səzaɗaya ane.”

⁷ Na əŋ dzakuna: A askwaf de kini ǎ za higəɗay ba kugunhan aŋade a ɗu hipe ɓile gə abə mbəɗkakude zaɗay ene, ndəma i ɗaha kurkur tahke ŋa ene tahke gə tə ɗa jire, ɗa niba i wudar mbəɗɗiyakude zaɗay tan saŋa.»

Araja i gursa gə zak səzaɗaya

⁸ «Təku hər gəna abə i gursa ene jem, ɓile ene səzakariya ni, hənnande ba akwa a lalam, patede bə kudak sahan a gusɗiya al əŋkale ene, ha abə nzəka saŋa?

⁹ Abə nzəka ga, hehetənakude yaga hay ene atə ɗa mavendew ene, dzatəna, wa: “Higinmen amazhekde, aɗaba əŋ nzək gursa hwa gə zak səzaɗaya ane.”

¹⁰ Na əŋ dzakuna: Malika hay s'Askwaf kini ɗa higike ba kugunhan abə ɗu hipe ɓile mbəɗkakude zaɗay ene.»

Araja i kine gə zak səzaɗaya

¹¹ Dzəktəna adəɓa, wa: «Ɗu s'iŋgeɗe zak i wayə mizhe hay caw.

¹² Kudar dzakəna a pəban, wa: “Paba, vəru dzaa s'almane hwa gə əŋ pəkiya a warata de saŋa.” Pəbe tan ane huləktənka almane ene.

¹³ Hənaka kutew adede ahan ga, kudar ane suməkəlakude almane ene ba cecena, ba huɗila ene ala a higay s'iŋgeɗe de kwalala. Laka a putsɗilakude shiŋgu ene sahan ba cecena a gənda tsəre de.

¹⁴ Ba wuran kini putsəkəlakude ba cecena ga, may duwuna naya ala a higay sahan de, takənmandar‑a a gə palase.

¹⁵ Wuran ane laka a gə sləra adə ɗu s'iŋgeɗe aba higay sahan de, ɗuhan slənka ala a kuvak hay ene de a ləɗay a tsəg s'avizhaw hay.

¹⁶ Aray ene lide a ipəɗay s'avizhaw hay de, gus ba pəɗiya, amá niba ɗu gə vərna.

¹⁷ Mezlene takənmandar‑a a dzəmɗiya ala apə zaɗay ene ka, wa: “Ba ɗa gə ɗa ge sləra adə paba takaɗe, ɗa harənde ba hərɗay a ɗəfka ni, ənne əŋ mickiya i may akəna!

¹⁸ Si əŋ slibkakude, əŋ le a nzə paba, əŋ le a dzaɗina ənna: Paba hwa, əŋ mbəskənka me a Askwaf‑a, ayika kini əŋ mbəziyakana.

¹⁹ Ba haɗinaw i kine aka kini əŋ slaka bə cine. Gɨlnuwa ɗaya ba ka ɗu ɓile s'i ɗa sləra aka.”

²⁰ Wuran ane zipəna a ciba ka a ləɗay a nzə pəban ane. «Ba kwa zlama wuran kwalala, pəban ane tsaka ga, gəkən aray duna. Ba ɗəvərɗay ene, laka a təkulɗika al alay cicaw, kaya a gəɗin sa abi higəɗay.

²¹ Kine ene ane dzakəna, wa: “Paba hwa, əŋ mbəskənka me a Askwaf‑a, ayika kini əŋ mbəziyakana. Ba haɗinaw i kine aka kini əŋ slaka bə cine.”

²² Amá pəban dzəktəna a ɗa sləra ene, wa: “Len ba yakwa yakwa, cimkɨnka səɗava sələmna, fetɨnlide, shiɓɨnnipan jeɗe a alay, shuɓɨnnide kimak a səlay de.

²³ Birkɨnka kine təghwam gərɗay, slɨnnitaŋw‑a, kucinməna, Higinmen.

²⁴ Aɗaba kine hwa gə na saŋa zak mətsaɗaya, səgan gə mbərakede, zak səzaɗaya, amá əŋ nzəka adəɓa.” Mezlene ɗa takənmandar‑a a gə wumbri i higəɗay.

²⁵ «A ahan de sahan, mageje ene zlama akiɓde. A aŋəde nike ala a adaw hərzhika adaw ga, shinkay ba gaŋka adide atə awar jikka arde.

²⁶ Wuran ane hakakude ɗu ɓile a ɗa sləra de, mbutsəɗinamiya igə gaka.

²⁷ Ɗu sləra sahan dzakəna, wa: “Dagwa mamay nidaw, sləŋa pabay slakəntaŋw‑a a kine təghwam gərɗay ane, aɗaba nzək kine ene ba lapiya layya.”

²⁸ Mezlene bembec vəɗika, kəraka a ləɗay ala adide. Pəban naya a sləpəlɗiya a ləɗide adide.

²⁹ Amá dzakəna a pəban, wa: “Ənne aveŋ kəmta əŋ gɨyək sləra aba ayika, ba səlay ɓile kini əŋ tsuɗəkənaŋa ba a me aka ka. Amá ba kine s'awak kwevevva kini kə vərkuwa ba a ndəhɗika a higaɗaya atə yaga hay hwa.

³⁰ Alay gə kine aka gə putsilhakakude almane apə zawar hay‑a nidaw ni, kə slakənhəntaŋw‑a a kine təghwam gərɗay‑a!”

³¹ Pəban ane dzakəna, wa: “Kine hwa, ike gə ba kəla mandaɗay ma caca, ba cecena igə a razəge hwa de saŋa ba s'iyaka.

³² Amá ga, zlaya ma deka wumbri, ma higike, aɗaba dagwa mamay saŋa zak mətsaɗaya, amá mbərakede, zak səzaɗaya, amá əŋ nzəka adəɓa.”»