Luka 14 - Vame

Yesu mbər ɗu gə zhek ene i shufəɗay bək həts mbas

¹ Bək həts mbas s'iŋgeɗe niya ga, Yesu laka ala adə ɗu ɓile a məlmal hay Farisa hay de a pə s'away adiyana. Ɗa gə akənahan ɗa ɗəfək sləmay aba apəna.

² Ɗu gə zhek ene i shufəɗay kini niya akənahan apə miya ayina.

³ Mezlene Yesu mbutsəktənamiya a malum hay me gurɗay‑a, atə a Farisa hay, wa: «A me gurɗay man de mà, ciba niya təku a mbər ɗaha bək həts mbas, niba bəhe?»

⁴ Amá ɗa pakənande aba me tan. Wuran ane bərika ɗu kuza sahan, mbərika, nəŋkəla ala adaw.

⁵ Mezlene dzəktəna, wa: «Wiya ayikunde abə kine ene, bi asla ene nanide a suwa de bək həts mbas ni, ɗivirke ba a ləɗay a təfɗiyede saŋa?»

⁶ Wutan ane ɗa dzəgwika bə vərɗin jawapa.

Kəɓ ŋa atə vərɗina away a ɗaha

⁷ Yesu cece ɗa gə ɗa həktan a wumbri, ɗa dzadzər mazaɗay hay gə iŋgeɗe niba cine aŋade ahan hay saŋa ga, dzəktəna araja saŋa, wa:

⁸ «Abə ɗa hiken ala a wumbri təf hərmana ga, zhede ba a mazaɗay de gə iŋgeɗe niba aŋade a ahan saŋa. Aɗaba bi ɗa hika ɗu s'iŋgeɗe ndimken ike i daradza.

⁹ Ɗu gə ba wuran hikkwene cawuna kwan saŋa á dzaaka bə zlama, wa: “Slabakude, harənhənde a mazaɗay saŋa a menya.” Ike ane ikə slabakude adəɓa i mbəray ala apə mazaɗay‑a gə adede a ɗaha hay cak‑caka saŋa.

¹⁰ Bira, abə ɗa hiken ala ajiba wumbri sahan de ga, zakade apə mazaɗay‑a gə adede cak‑caka saŋa. Abə ɗu gə hiken ǎ naya ga, ǎ dzaaka, wa: “Yaga hwa, nay zakade a mazaɗay sələmna de.” Kugwan ga, ǎ ɗəfənhakaŋade a daradza a ma ɗa gə de kwa piya away caca.

¹¹ Aɗaba ɗu gə abə pakənŋakude a ŋa ene ga, à ɗá kaɓənka, ɗu gə abə kaɓika ŋa ene kini, à ɗá panŋakude.»

¹² Mezlene dzakəna a ɗu gə haka ala adiyana ane, wa: «Abə kə hehe ɗaha ala a ɗəfka adiyaka ga, gha lapas, gha hagak kini, hatan bə yaga hay aka, gha wayə mamay, gha yaha hay aka, gha ɗa gelipe gə kwene apə mavendew kini. Aɗaba abə kə həktan ga, wutan kini à ɗá hehekinde, à ɗá mbuliyakede.

¹³ Amá abə kə dika wumbri ga, hatənakude ike ba talage hay, lipe hay, ɗa dəre, ŋa ŋgulaf hay.

¹⁴ Kugwan ga, ikə nje gədəɗɗay, aɗaba ɗa sahan à ɗá jukka bə mbulɗiyakede ihay aka. Si ba s'Askwaf ǎ le a mbulɗiyakede bək slabaɗayede ɗa jire ada mika ka.»

Araja i ɗa gə ɗa həktan ala a pə s'away adə Ɗuduwuna

¹⁵ Ɗu s'iŋgeɗe a ɗa gə de ɗa piya away atə Yesu ane, ba sənay a ahan ga, dzakəna, wa: «Gədəɗɗay ǎ za a ɗu gə ǎ piya away a gurɗay s'Askwaf de.»

¹⁶ Yesu zləmkənhənaŋa, wa: «Dagwa s'iŋgeɗe niya dika away duna, hahəkakude ɗaha hay ba duna.

¹⁷ Sərte slaka a pə s'away ga, slənika ɗu sləra ene a ləɗay a dzaɗitəna a ɗa gə həktan ane, wa: “Nɨkwen, na away ba cecena i sluməɗay.”

¹⁸ Amá ba cecena ɗa gə wuran həktan saŋa, gha wiya tan kini takənmandar‑a a mbutsə ɓusəɗay. Ɗu zuŋŋuna, wa: “Niya əŋ səmika kuvak, əŋ le a tsaɗiya, əŋ gɨyək ba kəmkam, ɓushuwuka.”

¹⁹ Ɗu s'iŋgeɗe, wa: “Əŋ sumika aslagay mbətsɗay jem, əŋ le a sasəlɗitan, əŋ gɨyək ba kəmkam, ɓushuwuka.”

²⁰ Ɗu s'iŋgeɗe adəɓa, wa: “Ənne na əŋ təvika hərmana ba səgan, aɗaba sahan tsaw, əŋ jukka bə laɗaya.”

²¹ Ɗu sləra ane ba mbəɗɗiŋa ene, laka a mbəɗɗinande me hay tan sahan a pəban s'adaw ene. Bembec lək vəɗɗika ga, dzakəna a ɗu sləra ene sahan, wa: “Le ɗece ba yakwa yakwa ala a tənday hu de atə ala ande a ciba hay ene ba cecena, hitənakude talage hay, lipe hay atə ŋgulaf hay, ŋa ɗa dəre.”

²² Ɗu sləra ane laka, mbəɗiŋa ga, naya a dzaɗina, wa: “Paba s'adaw hwa, igə ike kə dzaka ane gaka, amá zlama mazaɗay maka.”

²³ Pəban s'adaw ene ane, wa: “Le ala ande a ciba hay, kutiyede aba atə ciba hay mishishina gə apə zhek s'adaw hay‑a saŋa, gha kə nzək wiya kini slinaŋade abi nzəɗa a ləɗide, gəni adaw hwa á ruhwa.

²⁴ Amá na əŋ dzakuna: Ɗa gə əŋ həktan zuŋŋwa saŋa ga, ba ɗu ɓile tan kini gəɗande bə cine ɗəfka hwa.”»

Mbəɗɗipan dəɓa a away hay ba cecena a kutə Yesu

²⁵ Ɗaha hay duna ɗa lak apə ciba ka atə Yesu, mezlene mbəɗəktənande aray, dzəktəna, wa:

²⁶ «Ɗu gə abə naya ala a ma hwa de ni, mickinwa bə ha ndəmika wutə pəban atə məman, hər ene, waghay ene, dagwa hay məman, dile hay məman, aba atə ŋasaray ene ga, jukka bə gaɗaya ɗu kutəɗinaw.

²⁷ Gha wiya aŋa pakaŋade bə zlaɗa ene a kutəɗilnaw ga, jukka bə gaɗaya ɗu kutəɗinaw.

²⁸ Wiya ayikunde abə gus hən s'adaw tsəgwanna ni, zakade bə te a slasləɗika igə adaw sahan ǎ pɨka, atə a sənɗiyede mà, shiŋgu ene ǎ sliya he a kəɗɗilede saŋa?

²⁹ Aɗaba abə takənmandar‑a ɗaya ni, dzəgwika kəɗɗilede ga, ba cecena ɗa gə à ɗá caka adaw sahan, à ɗá mushiya, wa:

³⁰ “Cɨnka ɗece dagwa saŋa takənmandar‑a a hən s'adaw‑a, amá dzəgwika bə kəɗɗilede!”

³¹ Təku bay gəna abə ǎ le a zlər huma atə bay s'iŋgeɗe ni, zakade bə te a slasləɗika ŋa ba hasha, abə ǎ jukka ləɗay a vəɗ huma i ɗagadiyana dəbu jem (10000) atə bay gə ǎ ninəhan i ɗaha dəbu jem jem caw (20000) saŋa?

³² Abə ceciya ǎ jukka bə ga, slinka ɗa slənɗay ene ala a ma bay ɓile ene de saŋa, ba kwa zlama tə kwalala hay apə zhek‑a, a ləɗay a mbutsə sluməɗay.

³³ Kugwan saŋa ga, gha wiya kwan kini, jukka bə gaɗaya ɗu kutəɗinaw, abə mbəɗəkpan bə dəɓa a igə a razəge ene ba cecena.»

Mazay gə yamyama tsəre ene huwakede

³⁴ «Mazay ga, isələmna, amá abə yamyama tsəre ene huwakede mà, ɗa mbəɗəlhənariya kəma i yamyama tsəre ene adəɓa?

³⁵ A higay kini humanande ba, rəgwa kini gɨka ba, si ba ɗa le a hətsɗila a geshe. Ɗu gə abə sləmay ene dikkwa, á cukka me saŋa.»