Luka 12 - Vame

Ɗifɨn sləmay apə mbambəɗɗay Farisa hay‑a

¹ A ahan de sahan ga, ɗaha hay ɗa guɓaka gha dəbu kəmta kini ɗa slɨkiya, ha ɗa like aba apə səlay hay tan‑a. Yesu ane takənmandar‑a a dzaɗitəna te a ɗa kutə wuran, wa: «Ɗifɨn sləmay apə mbambəɗɗay Farisa hay‑a gə sleke a mene de ka ba gəɗay shehi makala saŋa.

² Ba kəla igə i shiɓɗay saŋa, ǎ mbazlayede. Ashilire hay kini ɗaha hay à ɗá sənede.

³ Aɗaba ba cecena igə kwa dzaka a wurek de saŋa, à ɗá sənede a parakka tsəre de. Gha me gə kwa dzaka ala a sləmay de a kudak de kini, ɗaha hay à ɗá ŋguləhla ande a məskuwan.»

Wiya ɗu gə zlaya zləŋwaɗ á viɗkwene ande?

⁴ «Na əŋ dzakuna ayikuna yaga hay hwa, zləŋwaɗ á viɗkwene ba ande a ɗa gə ɗa jukka kəɗɗilkwena, adede a ahan gə niba cine igə ɗa jukka gəɗika saŋa.

⁵ Amá na əŋ wanpəkwan ɗu gə zləŋwaɗ á viɗkwene ande: Zləŋwaɗ á viɗkwene aba ande a ɗu gə jukka kəɗɗilkwena, niya zlama adəɓa i hakuma hətsɗilkunde a akwa de gə munzəɗay ene niba aride saŋa. Aŋa gə ba kugwan, ba wuran ɗu gə zlaya zləŋwaɗ á viɗkwene ande.

⁶ Fan hay mishishina gha ɗara ene mà, ɗa səmla bə təku apə shiŋgu caw‑a? Amá ba ɓile tan kini dɨnedəŋa ba a Askwaf.

⁷ Kwene ga, ba humbats ŋa kwan kini i ruvəɗay ba cecena a ma ene de. Zləŋwaɗ á viɗkwene ba aride, aɗaba fan hay sahan gha tə duna ba kəma kini, ba kwene kwa ndəmtan i daradza.»

Siyade hay Yesu

⁸ «Na əŋ dzakuna zla adəɓa, gha wiya aŋa dzakede i me ene apə miya a ɗaha hay‑a, gəni wuran ayude saŋa, Kine ɗu səlammərzheŋ kini ǎ dzawede a ma malika hay s'Askwaf de gəni wuran ande ayina.

⁹ Amá ɗu gə abə dzakede apə miya a ɗaha hay‑a wa wuran sənnaw bə ga, ənne kini ə̌ŋ dzawede apə miya a malika hay s'Askwaf‑a, ənna əŋ səna ba ayina.

¹⁰ Ɗu gə abə nəŋkəlede avaŋe ala apə Kine ɗu səlammərzheŋ‑a ga, Askwaf ɓushɨna. Amá ɗu gə abə gəgənahika Shinekw Cuɗiɗɗina ga, à ɗá ɓushɨna ba.

¹¹ Abə ɗa mikkwena ala a sheriya de a adaw guɓaɗay hay de, bi a ma bay hay de, atə ala a ma ɗa hakuma de ga, jemɨna bə ŋa s'igə à kwá zluwil ŋa kwan al ayina atə à kwá dzawa kəma.

¹² Aɗaba Shinekw Cuɗiɗɗina ǎ wawinpəkwan igə à kwá dzawa aba a ahan de sahan.»

Araja i ɗu s'almane gə həŋkale ene niba

¹³ Ɗu s'iŋgeɗe dzina a Yesu ada fuɗəɗay ɗaha hay‑a, wa: «Malum, dzana ɗece a dagwa mama, ma hulɨka warata pəbe man gə hərkənhəmənde saŋa.»

¹⁴ Yesu zləmkənhənaŋa, wa: «Yaga hwa, wiya gəkəlnuwa ɗu ndaɗikun sheriya ayikuna, gəni əŋ hulɨkunka warata kwan?»

¹⁵ Mezlene dzəktəna, wa: «Iŋ‑iŋ dəgiya! Ɗifɨn sləmay apə ndəsaray a away hay de gərgərgəra saŋa, aɗaba shifa ɗu səlammərzheŋ ga, zheke apə almane ba, aŋa gha ɗuhan gika gelipe ba kəma kini.»

¹⁶ Mezlene dzəktəna araja saŋa, wa: «Ɗu gelipe eɗe, away gaka duna apə kuvak hay ene ka.

¹⁷ Wuran ane slaslika a ŋa de ayina, wa: “Səgan mà, əŋ ge kəma? Aɗaba takwar hay hwa à ɗá bɨrka ba ihay hwa saŋa cecena.”

¹⁸ Adəɓa gə wa: “Yawwa, na igə ə̌ŋ giya: Agwadza əŋ pusliyakude takwar hay hwa saŋa, əŋ hehenɨde idəbələmməna hay, ta ə̌ŋ cumɨde ahay hwa atə ihay hwa s'iŋgeɗe ba cecena ala ede.

¹⁹ Kugwan ga, ə̌ŋ dzana a ŋa hwa, ənna: Dagwama, kə guɓika almane duna, gha a aveŋ kəmta kəmta de kini ikə kəɗla ba. Hadzede mbas, piya, sawa, hige iyaka.”

²⁰ Amá Askwaf dzakəna, wa: “Ike kuvam! Ba luvaɗ bəkwa bəkwa saŋa, ike kə hinke bə i shifa. I mà, almane aka gə kə guɓika sahan mà, ǎ za ande awiya?”»

²¹ Yesu ɗəfkənaŋade adəɓa, wa: «I ɗu gə guɓana almane aba ŋa ene, amá a ma s'Askwaf de gə ba s'ama ene kini niba saŋa, iyene kini ǎ za ba kugwan.»

Shiŋwilɨna bə ŋa kwan aride

²² Mezlene Yesu dzatəna a ɗa kutə wuran, wa: «Aɗaba sahan na əŋ dzakuna: Jemɨna bə ŋa s'igə à kwá za apəna, amana igə à kwá piya atə igə à kwá fata apə zhek‑a.

²³ Aɗaba duna ba shifa aŋade a ipəɗay, zhek kini duna ba wuran aŋade a ifətɗay.

²⁴ Cɨnka ɗece nzarak hay, wala ɗa nzasla away, wala ɗa nzəra ala a adaw, wutə i takwar a guɓa s'away ala ede ba, amá Askwaf ghərtan. I mà, kwene kwa ndəmtan bəhe fan hay sahan ala ede ede?

²⁵ Wiya ayikunde ɗu gə jukka ɗəfɗinaŋade a hənɗay gem hay ene ba kutew kini i dzəmŋa hay ene?

²⁶ Iya abə ba s'ikutewuna ka aŋa kini kwa jukka bə gəɗiya ene mà, amnaya kwa dzəmŋa s'ihay s'iŋgeɗe saŋa?

²⁷ «Cɨnka zlama adəɓa aba apə vuɗəɗay s'away hay‑a gə ɗa hɨke akiɓde, wala ɗa ge sləra, wala ɗa hiya ifətɗay. Amá na əŋ dzakuna, zaɗay ba Salamuŋ al almane ene saŋa kini, fatide ba a ifətɗay həslkanna de, ka i ɓile s'afəka hay sahan.

²⁸ Abə afəka hay gə akiɓde bəkwa ɗa niya, mandaka ene ɗa tsəmnande a akwa takaɗe, Askwaf fafatəltənde a away de ni, sakwamba kwene ǎ gɨkuna ba ayikuna he? Kwene saŋa ɗəfɗipənŋa kwan hətsaka dəgiya!

²⁹ Jemɨna bə ŋa s'igə à kwá piya atə igə à kwá sawa, shiŋwilɨna bə ŋa kwan aride.

³⁰ Aɗaba ɗa gə ɗa zheke aba a shiŋwil s'ihay sahan ba cecena saŋa, si ba ɗa duniya gə ɗa səna ba a Askwaf saŋa. Amá kwene ga, Pəbe kwan səna wa kwa niya i wudar s'ihay sahan.

³¹ Kwene gə shiŋwilɨn ba gurɗay ene, ihay sahan kini wuran ǎ hadzənhəkunaŋade ba cecena.»

Guɓena almane kwan ala a askwaf de

³² «Zləŋwaɗ á viɗken bə ŋgaɓa kutewuna, aɗaba Pəbe kwan micika a vərɗikun gurɗay ene.

³³ Shumɨnlakude away hay kwan, hulɨntənka shiŋgu ene a talage hay‑a. Guɗɨnka pərtete hay gə mbishke ba aride saŋa, guɓena almane gə kəɗɗay ene niba saŋa a askwaf de. Aɗaba akənahan ga, ɗa s'akar ɗa likiya ba, məndərnay hay kini ɗa mbishka ba.

³⁴ Aɗaba ma gə almane kwan apəna ga, ŋa kwan kini aba akənahan.

Zhɨnkwen abi slumə zhek kwan

³⁵ «Zhɨnkwen abi slumə zhek kwan a gə sləra. Lalam hay kwan kini ɗá za abi hənɗay.

³⁶ Zhɨnkwen ba ka i ɗa sləra gə ɗa ba pəbe s'adaw tan abə laka a ma təf hərmana de saŋa. Abə nidaw takakude ipa mavendew ga, ciɗa ɗa panhənmiya.

³⁷ Gədəɗɗay a ɗa sləra gə abə pəbe s'adaw tan ǎ naya a nzəɗitan wutə aba al aray saŋa. Na əŋ dzakuna ba jire, ba pəbe s'adaw tan sahan i ŋasaray ene ǎ fetɨde a ifətɗay sləra de, ǎ vərtən mazaɗay aŋade a ipəɗay, ba wuran ǎ hulɨtəna ipəɗay sahan.

³⁸ Gədəɗɗay zlama adəɓa a ɗa sləra sahan, abə pəbe s'adaw tan nidaw gha a meteka luvaɗ de, gha i ŋamandaɗay kini, ne a nzəɗitan aba al aray saŋa.

³⁹ Shinɨnede a me gə na saŋa ba hasha: Abə ɗu s'adaw á sənkiya a sərte nəɗay ɗu s'akar ala a adiyana ga, á hərkinde ba a ɗu s'akar sahan a ləɗide adide.

⁴⁰ Kwene kini zhɨnkwen abi slumə zhek kwan, aɗaba Kine ɗu səlammərzheŋ ǎ nay aba a sərte de gə kwene kwa dzəmka bə saŋa.»

Ɗu sləra hashina atə ɗu sləra sələmna ba

⁴¹ Piyer dzakəna, wa: «Ɗuduwuna, araja saŋa mà, kə dzaməna ayiməna ɗaya təku, atə a ɗaha hay ba cecena he?»

⁴² Ɗuduwuna zləmkənhənaŋa, wa: «Wiya ɗu sləra gə ge sləra i bembec ɓile, həŋkale ene niya saŋa? Ba ɗu gə abə pəban s'adaw ene ɗəfkənde adaw ene a alay de, wuran hulɨtəna ipəɗay a ɗa sləra ene s'iŋgeɗe abi sərte ene saŋa bə təku?

⁴³ Gədəɗɗay a ɗu sləra sahan, abə pəban s'adaw ene naya a nzəɗiya abi sləra ene a alay de.

⁴⁴ Na əŋ dzakuna ba jire, pəban s'adaw ene sahan ǎ ɗəfənde almane ene ba cecena a alay de.

⁴⁵ Amá abə ɗu sləra sahan dzamika a ŋa ene de, wa: “Paba s'adaw hwa nike ba ala adaw yakwa.” Mezlene tanmandar‑a a gəɗitən palase a ɗa sləra gə adide, mizhe hay atə hər hay, piya, sa ba məhay ha viɗka vəɗɗay ga,

⁴⁶ pəban s'adaw ene kini ǎ nidaw aba a hənɗay gem de gə niba a zhek ene de, atə a sərte de gə wuran səna bə saŋa. Ǎ mbembeɗyakude ɗu sləra sahan ka azəga, ǎ vərna ihive gə à ɗá vərtəna a ɗa gə ɗa ɗəfəkpənŋa bə saŋa.

⁴⁷ Ɗu sləra gə abə səna tsa a igə pəban s'adaw ene gwasa ni, sluməka bə zhek, gəka bə igə pəban s'adaw ene gwasa saŋa ga, ǎ nje taɗay ba duna.

⁴⁸ Amá ɗu sləra gə abə səna ba igə pəban s'adaw ene gwasa ni, gika igə slaka a taɗiya arde ga, ǎ nje taɗay ba kutew. Ɗu gə abə ɗa vərkəna away i səgaɗay ga, à ɗá mbucɨnamiya kini ba i səgaɗay. Ɗu gə abə ɗa ɗəfkənde iduwuna a alay de, mbutsəɗinamiya kini ǎ ndimde ahan.»

Yesu mitən hulɗay a ɗaha hay

⁴⁹ «Ənne ga, əŋ naya nəŋɗila ba s'akwa ala a duniya de, əŋ gus hinkakude ba səgan.

⁵⁰ Ajiba bunɗay eɗe niya əŋ gus nzəɗiya, ənne aba a dzəmŋa ene de, ha ala a sərte de gə abə gaka!

⁵¹ Kwa gurəkəl ənne əŋ mi lapiya tsəre təku ala a duniya de saŋa? Kay, na əŋ dzakuna, ənne əŋ mi ba hulɗay.

⁵² Ba kwa ada səgan‑a, abə ɗaha ɗara wutə a adaw ɓile de ga, à ɗá ndawariya caw, ɗaha məŋgan à ɗá zawa ba atə ɗaha caw, ɗaha caw kini à ɗá zawa ba atə ɗaha məŋgan.

⁵³ Wutə pəbe à ɗá zawa ba atə dagwa ene, kine humas kini à ɗá zawa ba atə pəban, wutə məme à ɗá zawa ba atə dile ene, kine dəna kini à ɗá zawa ba atə məman, wutə məman a humas à ɗá zawa ba atə dəna ene, dəna kini à ɗá zawa ba atə məman a humas ene.»

Sənɗiyede a səlay s'ihay gə à ɗá ge

⁵⁴ Yesu ɗəfkənhətənaŋade a dzaɗitəna a abaga ɗaha hay ane, wa: «Abə kwa tsək kumba hileɗɗa aŋade a heye ga, ciɗa kwa dzawa kwene, ika: “Aveŋ ǎ ge.” Ba jire gɨke ba kugunhan.

⁵⁵ Zlama adəɓa, abə kwa tsək humaɗe fukike ada zlemba s'iŋgeɗe ka ga, kwene, ika: “Sləŋa mapəɗak niya nike.” Ba jire gɨke ba kugunhan.

⁵⁶ Kwene ɗaha ɗa lɨde ba a tənday kwan de! Ihay gə ɗa gɨke apə askwaf‑a atə agide gə kwa səna a səlay ene ba cecena, i mà, amnaya kwa sənede ba a səlay s'igə Askwaf mbazləlhəkwan a zamane bəkwa de saŋa?

Slumɨna atə ɗu mbazhek aka

⁵⁷ «Amnaya kwene i ŋasaray kwan kwa ləkede bə igə abə a adaw ene de saŋa?

⁵⁸ Abə niya kwa like a sheriya de atə ɗu gə hadziyakaŋade galəmnzay ga, gus slumaɗaya atə ayina ba kwa zlama kwene ande a ciba. I bəga, ǎ mɨkina ala a ma ɗu sheriya de, ɗu sheriya ǎ ɗifkinde a alay de a sluji hay, sluji hay kini à ɗá zləŋakande a daŋgay de.

⁵⁹ Na əŋ dzaaka: Naɗayede aka niba aride, abə kə mbəlkede bə igə sheriya ɗəfiyakaŋade ba cecena.»