Luka 10 - Vame

Yesu slən ɗa kutə wuran kurkur ciɓa ŋa ene caw

¹ Adede a ahan ga, Ɗuduwuna dzadzarika ɗa s'iŋgeɗe a ɗa kutə wuran de kurkur ciɓa ŋa ene caw. Slənəktan caw caw‑a apə miya ayina ala a hu hay de atə ala a ma hay de gə wuran a lələkay saŋa ba cecena.

² Dzəktəna, wa: «Away ga, gaka duna apə kuvak‑a a nzərɗiya, amá ɗa nzərɗiya ene tə duna ba. Aɗaba sahan, ŋeŋelɨn ɗu kuvak gəni á ɗəfnaŋade a slən ɗa sləra s'iŋgeɗe ala a kuvak ene de.

³ Len, əŋ slinkwene ba ka wayə təmbagay ala a dagava kəla kiɓe hay de.

⁴ Gha pərtete shiŋgu, gha mbalaw, gha kimak kini, tivɨnde ba a alay de. Tetevɨn ba ande a ciba a gə sa atə ɗaha hay.

⁵ Adaw gə abə kwa lide ede ga, jɨntəna te a ɗa s'adaw sahan kwene, ika: “Lapiya tsəre á zakwa a adaw saŋa de.”

⁶ Abə ɗu micɗiya i lapiya tsəre niya a adaw sahan de ga, lapiya tsəre kwan sahan ǎ le zaɗay a ɗuhan de. Abə kugwan bə ga, ǎ mbəɗiŋa ala a ma kwan de.

⁷ Zhɨnkwen aba adaw sahan de. Pɨna, shena igə abə ɗa vərəkkuna, aɗaba ɗu sləra ga, zlaya njiya ihive ene. Mbuɗɨna ba adaw a hu sahan de.

⁸ Gha kwa laka a hu gəna de kini, abə ɗa tivikkwena ga, pɨna igə abə ɗa vərəkkuna.

⁹ Mburɨntəna ɗa gə wutə apə kuza ka a hu sahan de. Jɨntəna kwene, ika: “Sləŋa gurɗay s'Askwaf naya a ma kwan de.”

¹⁰ Amá hu gə abə kwa lide ni, ɗa tivikkwene bə ga, len ala ande a ciba hay tan, jɨntəna kwene, ika:

¹¹ “Aba atə argutak hu kwan gə apə səlay hay man‑a kini, tá ma tanpəkuna ikwan, amá gə shinɨnede kwene ika sləŋa gurɗay s'Askwaf naya.”

¹² Na əŋ dzakuna, bək sheriya ga, ǎ za i ndusləɗay ba sheriya ɗa Suduma aŋade a i ɗa hu sahan.»

Palase ǎ za a hu hay gə ɗa ɗəfəkpənŋa ba a Yesu‑a

¹³ «Palase a ɗa Kurajin! Palase a ɗa Baytisayda! Aɗaba ajipu hay gə Askwaf gəka adikwen saŋa, abə a gəkiya a Tirus atə a Sidun ga, kwakwahan ɗa hu hay sahan ɗa mbəɗkiyakude zaɗay tan, ɗa fafətkide a ashasha hay de, ɗa zazakayakade a arɓak de, ɗa takide ŋa tan ede.

¹⁴ Aɗaba sahan tsaw, bək sheriya ga, ǎ za i ndusləɗay ba sheriya wutə Tirus atə Sidun aŋade a i kwan.

¹⁵ Kwa ɗa Kafarnahum mà, kwa gurəkəl à ɗá pakunŋakude ha à kwá liya ala a askwaf de təku? Bira à ɗá ndikkunde ŋa ala adə ɗa gə a mika de.»

¹⁶ Yesu ane ɗəfkənhətənaŋade adəɓa a ɗa kutə wuran, wa: «Ɗu gə abə tsukwika me kwan ga, tsukuk ba me hwa ayuwa, ɗu gə abə ɓərəkpəkuna a zhek‑a kini, ɓərəkpuwa ba s'ənne a zhek‑a. Ɗu gə ɓərəkpuwa ənne a zhek‑a ga, ɓərəkpəna ba ɗu gə sləninaw a zhek‑a.»

Ɗaha kurkur ciɓa ŋa ene caw ane ɗa mbəɗiŋa

¹⁷ Ɗaha kurkur ciɓa ŋa ene caw ane ɗa nidaw abi higəɗay, ɗa dzakəna a Yesu, wa: «Ɗuduwuna, aba atə jini hay kini ɗa gəka igə mene ma dzəktəna i sləmay aka!»

¹⁸ Yesu zləmkənhətənaŋa, wa: «Aŋa gə ba kugwan, əŋ tsək Shetene niŋkike ada askwaf‑a ba ka pə s'aray s'aveŋ.

¹⁹ Cɨkuna, əŋ vərəkkun hakuma ŋgərəsl s'azam hay atə ardzak hay, ŋa hakuma a ŋgərəsl nzəɗa ɗu dawa man ba cecena. Niba igə jukka gəɗikunarde.

²⁰ Amá gə higen ba aɗaba jini hay ɗa tsukwika me kwan, higen aɗaba sləmay hay kwan niya i hətsɗay a askwaf de.»

Higəɗay Yesu

²¹ Aba a ahan de sahan, Shinekw Cuɗiɗɗina ruhkede Yesu i higəɗay, dzaka, wa: «Əŋ sləkəɗək me Paba hwa, ike Ɗuduwuna gə askwaf atə higay a alay de ayika saŋa, aɗaba kə shiɓkəlhətənamiya ihay sahan a ɗa həŋkale ka atə a ɗa sənɗiya a away‑a, kə mitənede a ɗa mishishina. Ba kugunhan Paba hwa, gaka aba apə aŋa ka ike kə micka.

²² Paba hətskude away hay ba cecena a alay de. Niba ɗu gə səna a Kine, abə Pəbe ba. Pəbe kini, niba ɗu gə səna, si ba Kine ene atə ɗu gə abə Kine ene sahan mickinhan a mbəslɗilhan.»

²³ Mezlene mbəɗkakude aray ala a ma ɗa kutə wuran de, dzəktəna ba wutan i ŋa tan, wa: «Gədəɗɗay a ɗa gə aray tan caka igə na kwene kwa ceciya saŋa.

²⁴ Na əŋ dzakuna zla, ɗa mbəɗɗitənande me s'Askwaf a ɗaha hay atə bay hay duna ɗa gwasək ba tsaɗika igə na kwene kwa ceciya saŋa, amá ɗa tsaka ba. Ɗa gwasək ba ɗa sənkay a igə na kwene kwa tsukwa saŋa, amá ɗa sənay ba.»

Araja i humas Samariya sələmna

²⁵ Malum me gurɗay s'iŋgeɗe slabakakude, gwasək bər Yesu apə me‑a, mbutsəkənamiya, wa: «Malum, əŋ gɨka ama, ta əŋ nje shifa gə kəɗɗay ene niba aride saŋa?»

²⁶ Yesu zləmkənhənaŋa, wa: «Igə i hətsɗay a me gurɗay man de mà, ama? Abə kə dzawa mà, kə shinkay kəma?»

²⁷ Dagwa ane zləmkənhənaŋa, wa: «Mica i Ɗuduwuna Askwaf aka i bembec ɓile, i shifa aka ba cecena, i nzəɗa aka ba cecena atə i dzəmŋa aka ba cecena. Adəɓa gə wa: Mica i ɗu gə kwa caca ba ka ŋa aka.»

²⁸ Yesu dzakəna, wa: «Aŋa ga, kə zləmkənaŋa ba kalkala ene, giya zla apə ahan‑a, ikə nje shifa gə kiɗke ba aride.»

²⁹ Amá wuran sahan gus gəɗilka ŋa ene ɗu jire, dzakəna a Yesu, wa: «Wiya wuran ɗu gə ma caca sahan?»

³⁰ Yesu zləmkənhənaŋa, wa: «Ɗu s'iŋgeɗe niya slabakakude ada Zheruzalem‑a, fatak ala a Yeriku ga, laka slaɗitənande a abra hay. Ɗa tsəməkpəna away hay ene ba cecena, ɗa slakəlna i taɗay, ɗa hərkənde shifa mide aba bembec de.

³¹ Ɗu slumə ɗaha hay atə Askwaf s'iŋgeɗe kutək ba ciba sahan, naya a zlərɗipənŋa a dagwa ane ga, ŋgəɗkənpan a ciba, ba huɗay ene.

³² Humas ɗa Lewi s'iŋgeɗe kini nayede abi ma sahan‑a, wuran kini ba tsaka ga, ŋgəɗkənpan a ciba, ba huɗay ene.

³³ Amá humas Samariya s'iŋgeɗe niya like a shula, laka a ma sahan de, ba tsək dagwa sahan ga, yəmkənde mərga.

³⁴ Laka ala a ma ene de, gəgəkənhənande ambár atə ajiba məhay eɗe a mbəlkay hay, nanəkənka. Mezlene pakakude, zakəlpəna a izhuŋwa ene ka, ləkəla ala adaw ma tsukɗay mbirkwe hay de, ɗəfkənande sləmay akənahan.

³⁵ Mandaka ene, tsəmkede gursa caw, vərkəna a ɗu s'adaw ma tsukɗay mbirkwe hay sahan, wa: “Ɗəfənande sləmay a dagwa saŋa, ba kəla igə ikə səzəla aŋade aŋa saŋa, ə̌ŋ naya a mbəlɗiyakede abə ə̌ŋ mbəɗiŋa.”»

³⁶ Mezlene Yesu, wa: «Apə ayika mà, a ɗaha məŋgan de saŋa mà, wiya ɗu gə tə caca atə dagwa gə abra hay ɗa gəkənka palase saŋa?»

³⁷ Wuran ane, wa: «Ɗu gə tə caca ba ɗu gə yəmkənde mərga saŋa.» Yesu dzakəna, wa: «Ike kini, le giya zlə ba kugunhan.»

Yesu adə wutə Marta atə Mari

³⁸ A aŋəde wutə Yesu atə ɗa kutə wuran wutə apə ŋa ciba ka, laka a hu s'iŋgeɗe de ga, hər s'iŋgeɗe, sləmay ene Marta, hakakude ala adiyana.

³⁹ Di məman a Marta sahan niya, sləmay ene Mari, naya a zaɗipan a Ɗuduwuna agide, tsukw me ene.

⁴⁰ Marta ga, didəŋa aba a gə sləra hay gərgəra. Ahan tsaw, naya a dzaɗina, wa: «Ɗuduwuna hwa, amnaya ike lambe aka niba apə sləra hay‑a gə di mama hərkənhude, əŋ giya ənne ɓile saŋa? Dzana səke á humawande!»

⁴¹ Amá Ɗuduwuna zləmkənhənaŋa, wa: «Marta, Marta, ike kə slan zluwa a ŋa aka i shiŋwil s'away hay gərgərgəra.

⁴² Igə zlaya shiŋwilɗiya gə ba ɓile. Mari təfkede i sələmna, niba ɗu gə ǎ təfpəna.»