Luka 1 - Vame

Me zuŋŋuna gə Luka hadzəna a Tiyufil

¹ Tiyufil ɗu duwuna hwa, ɗaha hay duna ɗa kutsak a hətsɗika labara s'ihay gə gagaka a duvak man de saŋa.

² Ɗa hadzək ba s'ihay gə mene ma nzəka a ma ɗa gə de ɗa tsaka ihay sahan al aray tan kwa ada tamandar ene ka saŋa. Ɗa sahan ga, sləra tan gaka ba nanɗilhətan labara sahan a ɗaha hay.

³ Ənne kini əŋ sakede te ahwam a me sahan‑a ba cecena kwa ada a tamandar ene ka. Kugwan ga, əŋ hiyiika awiba a hətsɗiyakana ayika kini, abi kutə zhek i kutə zhek Tiyufil ɗu duwuna hwa,

⁴ gəni kə sənede a jire tsəre tsugəɗay hay gə kə nzənzəka saŋa.

Malika dza labara wuh Zhaŋ ɗu bunə ɗaha

⁵ A zamane de gə Hirudus bay a higay Zhude de ga, ɗu slumə ɗaha hay atə Askwaf s'iŋgeɗe zak, sləmay ene Zakari, wuran a giwa s'Abiya de. Hər ene shef Haruna, sləmay ene Elizabet.

⁶ Cawuna tan atə hər ene, ɗa jire a ma s'Askwaf de, ɗa ɗəf mbəray apə me gurɗay hay Ɗuduwuna ka atə ihay gə wuran tatəfkəla saŋa ba cecena apə kalkala ene ka.

⁷ Amá ga, ba kine ɓile kini ɗa wahika ba, aɗaba Elizabet zak təghar, cawuna tan kini ɗa ghaghalaka.

⁸ Bigeɗe ga, Zakari niya ge sləra ene a slumə ɗaha hay atə Askwaf a adaw s'Askwaf de, aɗaba laka apə alay s'ahwam giwa tan‑a.

⁹ Ɗa slumə ɗaha hay atə Askwaf sahan ba ka aŋa gəkəlhətəna saŋa, ɗa kətka afəka ga, bək sahan taŋəkpan a Zakari, lide ala a ma cuɗiɗɗina Ɗuduwuna de, a ləɗay a ɗuzəɗin kajiji.

¹⁰ A aŋəde wuran ɗuzhe kajiji sahan ga, fuɗəɗay ɗaha hay saŋa ba cecena ɗa ŋaŋala Askwaf amide.

¹¹ Kugwan ga, Zakari ane tsa ba malika Ɗuduwuna i təfɗay a alay ɗəfka ma ɗuzə kajiji de sahan.

¹² Zakari ba tsaka ga, zləgutsaka, kaya a dadəɗay.

¹³ Amá malika dzakəna, wa: «Zakari, zləŋwaɗ á viɗken ba, aɗaba Askwaf təvika maduwa aka. Hər aka Elizabet ǎ wahakana kine humas, ikə ɗəfən sləmay Zhaŋ.

¹⁴ Ikə hige awiba, ɗaha hay kini duna à ɗá higiya apə barka wahaɗaya ene ka.

¹⁵ Aɗaba wuran ǎ za məlmal a ma Ɗuduwuna de. Ǎ sawa bə məhay, atə ba kəla igə ŋgushike ŋgusɗay. Ǎ ruhwa i Shinekw Cuɗiɗɗina ba kwa ada tənday məman‑a.

¹⁶ Ǎ mbəɗiltənŋa i ɗa s'Israyila duna ala a ma Ɗuduwuna de, Askwaf tan.

¹⁷ Wuran ǎ nayede te apə miya a Ɗuduwuna ka, i shinekw atə i nzəɗa gə Eliya ɗu mbəɗɗitənande me s'Askwaf a ɗaha hay zak al ayina saŋa, a mbəɗɗilŋa i bembec pəbe hay ala a ma waghay tan de, a təfɗitənŋa a ɗa gə ɗa ge dəkdəka tsəre ŋa, gəni ɗá nje həŋkale ka i ɗa jire, a slumɗinka ɗaha hay a Ɗuduwuna ka.»

¹⁸ Zakari dzana a malika ane, wa: «Ə̌ŋ sənede kəma ənna ahan sahan jire saŋa? Aɗaba na ənne əŋ gika midisher, hər hwa kini ghalaka duna.»

¹⁹ Malika ane zləmkənhənaŋa, wa: «Ənne ga, ənne Gabriyel, əŋ zheke a ma s'Askwaf de a gəɗin sləra. Ba wuran sləninaw a dzaɗiyak me saŋa, atə a məɗiyakana Labara Sələmna saŋa.

²⁰ Amá ike kə ɗəfəkpənŋa bə tsaw a me hwa‑a gə ǎ giya ba jire abə sərte ene ǎ naya saŋa ga, ikə giya ɗu gə peka bə me, ikə dzawa bə cine ha ala sərte de gə isahan ǎ giya.»

²¹ A ahan de sahan, ɗaha hay ɗa ba Zakari, ghaya ɗa ge ba s'ajipu s'i mbasaɗaya ene a adaw s'Askwaf de saŋa.

²² Wuran ane nayede ga, dzəgwika bə cine dzaɗitən me. Mezlene ɗa sənkede wa aŋa gə tsaya aweɗe a adaw s'Askwaf de. Akura dzaɗay ene ga, ndukikinpətan aba al alay, dzəgwika bə cine paɗipəna me a dzaɗay.

²³ A aŋəde sərte sləra ene kəɗaka a adaw s'Askwaf de ga, huwak aba ala adaw.

²⁴ Hənaka kutew adede a ahan ga, hər ene Elizabet nzək tənday, ha pika kiyəhka ɗara shuɓɨkəla, mezlene, wa:

²⁵ «Na igə Ɗuduwuna gəkuka ayuwa: Pakuwaŋa mbəray s'i təghar tsəre hwa saŋa a ma ɗaha hay de ba cecena.»

Malika nenil labara wuh Yesu

²⁶ Kiyəhka s'Elizabet dzəkŋa ala apə marka ga, Askwaf slənika malika Gabriyel ala a hu de gə ɗa hawa i Nazaret saŋa a higay Galile de,

²⁷ ala a ma kine dile s'iŋgeɗe de sləmay ene Mari. Di sahan ga, dagwa s'iŋgeɗe sləmay ene Zhuzef shef bay Davit yawa.

²⁸ Malika ane laka ala a ma ene de, wa: «Hige Mari! Askwaf giyakana səlam tsəre ene, Ɗuduwuna niya atə ayika.»

²⁹ Me malika sahan wushkənakude ŋa a Mari, ha dzəmka igə sa sahan gus dzaɗiya a ŋa ene de.

³⁰ Mezlene malika dzakəna, wa: «Zləŋwaɗ á viɗken bə Mari, aɗaba Askwaf giyakana səlam tsəre ene.

³¹ Zlama ikə nje tənday, ikə wihka kine humas, ikə ɗəfən sləmay Yesu.

³² Kine sahan ǎ za məlmal, à ɗá hawa i Kine s'Askwaf gə i kufa ka aŋa a away hay‑a ba cecena. Askwaf Ɗuduwuna ǎ vərən kurshi bay tsəre ceje ene Davit.

³³ Ǎ gure shef Zhakup ha ala bəgəna bəgəna de. Bay tsəre ene, kəɗɗay ene ǎ za ba aride.»

³⁴ Mari dzakəna a malika ane, wa: «Ahan sahan mà, ǎ giya kəmkəma, aɗaba ənne zlama əŋ səna ba a ɗaha?»

³⁵ Malika zləmkənhənaŋa, wa: «Shinekw Cuɗiɗɗina ǎ niyakaŋade, nzəɗa s'Askwaf gə i kufa ka aŋa a away hay‑a ba cecena saŋa ǎ fatiyakaŋade ba ka shinekw. Aɗaba sahan tsaw, kine gə ikə waha saŋa ǎ za cuɗiɗɗa, à ɗá hawa i Kine s'Askwaf.

³⁶ Elizabet di pabay nzək tənday, ǎ wuh kine humas. Gha ghalaka ɗəma, ɗa dzawa wa təghar kini, səgan gə nzək tənday, na kiyəhka ene dzəkŋa ala apə marka.

³⁷ Aɗaba niba igə firshiya Askwaf.»

³⁸ Mari ane, wa: «Ənne ga, ənne ɗu sləra Ɗuduwuna. Á giya aba apə dzaɗay aka ka sahan.» Mezlene malika ane hərkənde, ba huɗay ene.

Mari like adə Elizabet

³⁹ A ahan de sahan ga, Mari huwak ba yakwa yakwa ala a hu s'iŋgeɗe de a tənday kuwan s'i gurɗay Zhude de.

⁴⁰ Laka ləɗide a tənday s'adaw Zakari de, gəkən sa a Elizabet.

⁴¹ A aŋəde Elizabet sənay a sa ene sahan ga, kine ene hahavakakude a tənday de. Mezlene Elizabet ruhwaka i Shinekw Cuɗiɗɗina.

⁴² Ŋgulahaka ba dunduna, wa: «Askwaf giyakaŋade barka ndəmika i hər hay ba cecena, kine gə ike ikə waha saŋa kini niya i barka.

⁴³ Ənne wiya ta ɗəma ni, ha məman a Ɗuduwuna hwa nike ala a ma hwa de saŋa?

⁴⁴ Aɗaba a aŋəde əŋ sənay a sa aka ga, kine hwa hahavakakude a tənday de, a ma higəɗay de.

⁴⁵ Kə nzək higəɗay, aɗaba kə ɗəfəkpənŋa a igə Ɗuduwuna dzayaka, ǎ giya saŋa.»

Mari zəmbəla Askwaf

⁴⁶ Mezlene Mari, wa: «Shifa hwa niya ɗəɗəm Ɗuduwuna,

⁴⁷ bembec hwa ruhwaka i higəɗay ala apə Askwaf hwa‑a, Ɗu Zluɗinaw.

⁴⁸ Aɗaba wuran tsiwaŋa aray a ayuwa ənne ɗu sləra ene gə aba a ama kini əŋ slaka bə saŋa. Ba kugwan, ba kwa bəkwa bəkwa, ɗa zamane hay ba cecena à ɗá dzawa wa ənne i barka.

⁴⁹ Aɗaba Askwaf gə nzəɗa ba cecena a alay ene de saŋa gəgəkuka idəbələmməna. Sləmay ene ayina cuɗiɗɗa,

⁵⁰ gɨtən səlam tsəre ene a ɗa gə ɗa ɗəf mbəray apə ayina ada zamane tan‑a, ha ala ceje hay tan de.

⁵¹ Wuran gika sləra duwuna i nzəɗa s'alay ene, putsəkəltənakude ɗa gə wutə i dzəmŋa wawaɗa tsəre a ŋa de.

⁵² Fafətkəlpətəna ɗa nzəɗa a kurshi bay tsəre tan‑a, papəktənŋakude a ɗa mishishina.

⁵³ Tsuməktənka isələmna sələmna a ɗa gə wutə i may a tənday de, amá ɗa gelipe ga, ɓərəktənakude al alay tan ɗara.

⁵⁴ Təfkənde adede a Israyila ɗu sləra ene, səlam tsəre ene dəkəndəŋa ba,

⁵⁵ ka ba s'aŋa dzəktəna a ceje hay man wutə Abraham atə shef hay ene, ha ala bəgəna bəgəna de saŋa.»

⁵⁶ Slɨkiya kiyəhka məŋgan, Mari pika adə Elizabet, ta huwak ala adaw.

Ɗa wahika Zhaŋ ɗu bunə ɗaha

⁵⁷ Sərte s'Elizabet slaka a wuhɗay ga, wahika kine humas.

⁵⁸ Ɗa mavendew ene atə yaha hay ene ɗa sənay wa Ɗuduwuna gəkənka səlam tsəre ene duna ga, ɗa naya a higəɗay amazhekde.

⁵⁹ Hənɗay adəɓa ala apə zhire ga, ɗa masləkŋa a slaɗin baŋwe a kine ane, wutan ɗa guski ɗəfɗin sləmay pəban, Zakari.

⁶⁰ Amá məman a kine, wa: «Kugwan ba, ma ɗəfən Zhaŋ.»

⁶¹ Wutan ane ɗa dzakəna, wa: «Ajiba sləmay saŋa ba ɓile kini niba a ɗagadiyaka de.»

⁶² Ɗa ndukikinka al alay a pəban a kine ka a mbutsəɗinamiya sləmay gə wuran gus ɗəfɗina a kine ene sahan.

⁶³ Zakari mbutsəktənamiya ihətsɗipan away, ɗa minəka ga, hadzəkpan, wa: «Sləmay ene Zhaŋ.» Wutan ane ba cecena tan ɗa ge ba s'ajipu ene.

⁶⁴ Ciɗa me Zakari ane pəkmiya, miɗesl ene paparakede, takənmandar‑a a dzaɗay, kaya a zəmbəl s'Askwaf abi pa taŋw.

⁶⁵ Mezlene zləŋwaɗ vəɗəktəna ɗa slala tan ba cecena, a tənday kuwan s'i Zhude de ba cecena ɗa dza ba me hay sahan.

⁶⁶ Ba cecena ɗa gə ɗa sənay a labara sahan ɗa takənmandar‑a a dzəmɗiya a ŋa tan de, wa: «Kine saŋa mà, ǎ za wiya ta wuran?» Aɗaba nzəɗa Ɗuduwuna niya a kine sahan de ba parakka.

Zakari zəmbəla Askwaf

⁶⁷ Mezlene Zakari pəban a kine ane, ruhwaka i Shinekw Cuɗiɗɗina ga, takənmandar‑a a mbəɗɗitənande me s'Askwaf, wa:

⁶⁸ «Zhimbilinmən Ɗuduwuna, Askwaf s'Israyila, aɗaba ɗəfəktənande sləmay a ɗagadiyana, səsəkərəktənede.

⁶⁹ Dzakəlhəmənŋa i ɗu zluɗimene gə nzəɗa ene niya saŋa, a shef Davit de, ɗu sləra ene,

⁷⁰ ka ba s'aŋa zak dzaɗiya zuwuna ada me ɗa cuɗiɗɗina ene ka gə ɗa mbəɗəktənande me ene a ɗaha hay saŋa.

⁷¹ Zak dzaɗiya wa ǎ mbirzlemenede ada alay ɗa dawa man‑a, atə ada alay‑a ɗa gə ka ɗa micmene bə saŋa ba cecena.

⁷² Gəktənka səlam tsəre ene a ceje hay man‑a, amana cuɗiɗɗina ene saŋa dəkəndəŋa ba.

⁷³ Aɗaba zak pəɗinka muɗəɗay a ceje man s'Abraham‑a,

⁷⁴ wa ǎ mbirzlemenede ada alay ɗa dawa man‑a, gəni ma gɨna bə sləra i zləŋwaɗ aride,

⁷⁵ ma gɨkiya ɗa cuɗiɗɗina atə ɗa jire, a aray ene de a zaɗay man de ba cecena.

⁷⁶ Ike kini, kine hwa, à ɗá heken i ɗu mbəɗɗitənande me s'Askwaf gə i kufa ka aŋa a away hay‑a ba cecena saŋa a ɗaha hay, aɗaba ike ikə ŋgəran a Ɗuduwuna a slumɗinka ciba.

⁷⁷ Ikə ɗəftənde a zhek de a ɗagadiyana a sənɗiyede gəni wuran ǎ naya a zluɗitəna i ɓusɗitənka hipe hay tan.

⁷⁸ Aɗaba Askwaf man wuran ɗu magwe, səlam tsəre ene awiba, ahan tsaw, parakka tsəre s'i ŋamandaɗay ǎ nimənaŋade ada akufa,

⁷⁹ a mbəslɗilhətan parakka tsəre a ɗa gə wutə a wurek de, ghaya wutə abi humbats mətska a ŋa de saŋa, atə a məɗimene ala apə ciba lapiya tsəre ka.»

⁸⁰ Zhaŋ ane təf ba ghərɗay, həŋkale ene kini təf ba ɗəfɗinaŋade. Wuran zak aba akiɓde ha laka apə sərte ka gə mbəslkəlhətan ŋa ene a ɗa s'Israyila.