Zaburi 99 - Motingʼo Loko Manyien

Zaburi 99

¹ Jehova Nyasaye e Ruoth, ogendini mondo okirni; obet e kom lochne e kind kerubi, piny mondo oyiengni.

² Jehova Nyasaye duongʼ miwuoro e Sayun; otingʼe malo moyombo ogendini duto.

³ Owinjore gipak nyingi maduongʼ kendo miwuoro, nyinge ler.

⁴ Ruoth nyalo, ohero bura makare, isechungo adiera; isetimo ne joka Jakobo gima adier kendo makare.

⁵ Dhialuru Jehova Nyasaye ma Nyasachwa kendo lameuru, e tiend kome mobetie nikech oler.

⁶ Musa gi Harun ne gin jodolo mage e dier jodolo mamoko, Samuel ne en achiel kuom joma ne luongo nyinge; negiluongo Jehova Nyasaye kendo nodwokogi.

⁷ Ne owuoyo kodgi e siro mar bor polo; negirito chikene gi buche mane omiyogi.

⁸ Yaye Jehova Nyasaye ma Nyasachwa, ne idwokogi; ne in Nyasaye maweyo richo ne jo-Israel, kata obedo ni ne ikumo timbegi mobam.

⁹ Tingʼuru nying Jehova Nyasaye ma Nyasachwa kendo lamuru e gode maler, nimar Jehova Nyasaye ma Nyasachwa ler.