Zaburi 98 - Motingʼo Loko Manyien

Zaburi 98

Zaburi.

¹ Weruru ne Jehova Nyasaye wer manyien, nimar osetimo gik miwuoro; lwete korachwich gi bade maler osekelone warruok.

² Jehova Nyasaye osemiyo warruokne ongʼere kendo osefwenyone ogendini timne makare.

³ Oseparo herane kod adierane ne dhood Israel; kuonde duto ma piny ogikie oseneno warruok mar Nyasachwa.

⁴ Koguru gi mor ni Jehova Nyasaye, un piny duto, weruru kod ilo gi dwol mamit;

⁵ weruru mamit ne Jehova Nyasaye kugoyo nyatiti; werneuru mamit kugoyo nyatiti gi dwond wer molungi,

⁶ werneuru gi turumbete kod tung im maywak matek, koguru gi mor e nyim Jehova Nyasaye ma Ruoth.

⁷ Nam mondo owuo, kaachiel gi gik moko duto manie iye, kod piny duto, gi ji duto modak e iye.

⁸ Aore mondo opam lwetgi, gode mondo ower kaachiel ka gimor;

⁹ onego giwer e nyim Jehova Nyasaye, nimar obiro mondo ongʼad bura ne piny. Obiro ngʼado bura ne piny e yo makare kendo obiro yalo ji maonge dewo wangʼ.