Zaburi 95 - Motingʼo Loko Manyien

Zaburi 95

¹ Biuru wawer gimor ne Jehova Nyasaye; wagouru koko matek ne lwanda mar warruokwa.

² Wabiuru e nyime gi erokamano kendo wami nyinge duongʼ ka wawer kendo wakok gi mor.

³ Nimar Jehova Nyasaye e Nyasaye maduongʼ, en e Ruoth maduongʼ moloyo nyiseche duto.

⁴ Otingʼo kuonde matut duto mag piny e lwete, kendo wi gode ma roboche bende mage.

⁵ Nam mare, nimar en ema nolose, kendo lwetene ema noloso lowo motwo.

⁶ Biuru wakulrene ka walame, biuru wago chongwa e nyim Jehova Nyasaye ma Jachwechwa;

⁷ nimar en e Nyasachwa kendo wan e joge mokwayo, wan e jambe morito. Kawuono ka uwinjo dwonde,

⁸ to kik chunyu bed mapek kaka ne utimo Meriba, kata kaka ne utimo chiengʼ cha Masa manie thim,

⁹ kama kwereu noteme gi tem, kata obedo ni ne giseneno gima ne atimo.

¹⁰ Kuom higni piero angʼwen iya nowangʼ gi tiengʼno; kendo nawacho niya, “Gin joma chunygi ohero rwenyo, kendo pok gingʼeyo yorena.”

¹¹ Omiyo mirima nomaka kodgi mi nasingora ka akwongʼora ni, “Ok ginidonji e yweyona ngangʼ.”