Zaburi 88 - Motingʼo Loko Manyien

Zaburi 88

Wer. Zaburi mar yawuot Kora. Kuom jatend wer. Kaluwore gi mahalath leanoth. Maskil mar Heman ja-Ezra.

¹ Yaye Jehova Nyasaye, in e Nyasacha ma resa, aywagora e nyimi odiechiengʼ gotieno.

² Mad lamona chop e nyimi; yie ilok iti ne kwayona.

³ Nimar chandruok opongʼo chunya kendo ngimana sudo machiegni gi liel.

⁴ Ikwana kaachiel gi joma ridore piny ei bur matut; achalo ngʼama onge teko.

⁵ Ojwangʼa kaachiel gi joma otho, mana kaka joma onegi monindo e bur, makoro ok ipar kuomgi kendo, joma ongʼad kargi oko e ritni.

⁶ Iseketa ei bur matut mogik, ei piny mogik, kama olil ti.

⁷ Mirimbi mager ogore kuoma mapek; isetamo wangʼa gi apaka magi duto. Sela

⁸ Isemiyo osiepena mane ni machiegni koda mogik oringa, kendo isemiyo koro achalonegi mana koko. Odinna ma ok anyal tony;

⁹ wengena ok nen maber nikech kuyo ma an-go. Aluongi odiechiengʼ kodiechiengʼ, yaye Jehova Nyasaye; achikoni lwetena.

¹⁰ Bende itimo honni magi ne joma otho? Joma otho bende nyalo chier kendo mi paki? Sela

¹¹ Herani bende inyiso joma ni ei liel; adier, koso adierani bende yudore e kethruok piny?

¹² Timbeni miwuoro bende ongʼere kama otimo mudhono, kata timbeni makare e piny ma ilalieno?

¹³ Anto aywakni mondo ikonya, yaye Jehova Nyasaye; lamona chopo e nyimi gokinyi.

¹⁴ Yaye Jehova Nyasaye, angʼo momiyo idaga kendo ipandona wangʼi?

¹⁵ Aseneno chandruok chakre tin-na mi adwa tho; asewinjo malit nikech thagruok misekelona, kendo chunya oseol.

¹⁶ Mirimbi mager oseywaya; thagruok mimiya osetieka.

¹⁷ Gilwora ka ataro odiechiengʼ duto; gisedinona chuth koni gi koni.

¹⁸ Isemaya osiepena gi joherana; mudho mandiwa ema koro odongʼ machiegni koda kaka osiepna.