Zaburi 87 - Motingʼo Loko Manyien

Zaburi 87

Zaburi mar yawuot Kora. Wer.

¹ Oseguro mise mare ewi got maler;

² Jehova Nyasaye ohero rangeye mag Sayun, moloyo kuonde dak duto mag Jakobo.

³ Ji wacho gik madongo kuomi, yaye dala maduongʼ mar Nyasaye: Sela

⁴ “Abiro kwano Rahab gi Babulon e kanyakla mar joma ongʼeya, nyaka Filistia bende, kod Turo, kaachiel gi Kush kendo abiro wacho ni, ‘Ngʼatni nonywol ei Sayun.’ ”

⁵ Adier, nowachi kuom Sayun niya, “En min ogendini mathoth, kendo Nyasaye Man Malo Moloyo owuon biro chunge.”

⁶ Jehova Nyasaye biro ndiko e kitabu mindikoe nying ogendini kama: “Jali nonywol ei Sayun.” Sela

⁷ Sa ma giloso wer to giniwer niya, “Soknina duto ni e iyi.”