Zaburi 57 - Motingʼo Loko Manyien

Zaburi 57

Kuom jatend wer. E dwond “Kik iketh gik moko.” Miktam mar Daudi. Kane oringone Saulo mi opondo e rogo.

¹ Kecha, yaye Nyasaye, yie ikecha nikech kuomi ema chunya yudoe kar pondo. Abiro pondo e bwo tipo mar bwombeni nyaka chop apaka mager rum.

² Aywagora ne Nyasaye Man Malo Moloyo, Nyasaye machopona chenroge ema aywakne.

³ Ooro wach gie polo kendo oresa, kokwero joma lawa gi tekregi duto; Sela Nyasaye oro herane gi adiera mare.

⁴ An e dier sibuoche; anindo e dier le mager mangemo, joma lekegi chalo tonge gi aserni, ma lewgi chalo ligangla mabitho.

⁵ Nyingi mondo otingʼ malo moyombo polo, yaye Nyasaye; mad duongʼ mari opongʼ piny duto.

⁶ Ne giyaro jogo mondo omak tiendena, kane chuny lit odola. Ne gikunyo bugo e yora, to kata kamano gin giwegi ema giselutore e iye. Sela

⁷ Chunya otegno, yaye Nyasaye, chunya otegno; abiro paki gi wer kendo abiro loso wer mamit.

⁸ Chiew, in chunya! Chiewuru un orutu gi nyatiti! Abiro chiewo kogwen.

⁹ Abiro paki e dier ogendini, yaye Jehova Nyasaye. Abiro werni e dier ogendini.

¹⁰ Nikech herani maduongʼ chopo nyaka e polo; kendo adiera mari chopo nyaka ewi lwasi.

¹¹ Nyingi mondo otingʼ malo moyombo polo, yaye Nyasaye; mad duongʼ mari opongʼ piny duto.