Zaburi 5 - Motingʼo Loko Manyien

Zaburi 5

Kuom jatend wende miwero gi asili. Zaburi Mar Daudi.

¹ Chik iti mondo iwinj wechena, yaye Jehova Nyasaye, para kuom pek manie chunya.

² Winj ywakna mar dwaro kony, Yaye Ruodha kendo Nyasacha, nikech in ema alami.

³ Yie iwinj dwonda gokinyi, yaye Jehova Nyasaye; aketo kwayona e nyimi gokinyi, kendo arito dwoko ka an gi geno.

⁴ Ok in Nyasaye mamor gi timbe maricho. Joma richo ok nyal dak kodi kanyachiel.

⁵ Josunga ok nyal chungʼ e nyimi; imon gi ji duto matimo gik maricho.

⁶ Itieko joma wacho miriambo; Jehova Nyasaye ok mor gi joma dwaro chwero remo, kod jo-miriambo.

⁷ An to, nikech kechni maduongʼ, abiro donjo e odi; abiro kulora gi luor ka achomo hekalu mari maler.

⁸ Telna, yaye Jehova Nyasaye, kuom adiera mari, nikech wasigu molwora, yie iriena yori tir e nyima.

⁹ Kata wach achiel mowuok e dho jogi ok nyal gen; chunygi opongʼ gi kethruok. Dwondgi chalo gi liel mapok oum; lewgi olony e wacho miriambo.

¹⁰ Kwan-gi kaka joketho, yaye Nyasaye! Ket obadho ma giketo ne ji ogajgi gin giwegi. Riembgi nikech richogi mathoth, nimar gisengʼanyoni.

¹¹ We ji duto moketi kar pondo margi obed mamor; we gisiki ka giwer gimor. Umgi gi rit mari, mondo joma ohero nyingi omor kodi.

¹² Nikech igwedho joma kare adier, yaye Jehova Nyasaye; igengʼogi gi hapi mana ka okumba.