Zaburi 46 - Motingʼo Loko Manyien

Zaburi 46

Kuom jatend wer. Mar yawuot Kora. Kaluwore gi dwond alamoth . Wer.

¹ Nyasaye e kar pondowa kendo tekowa, en e kar konyruok man kodwa seche duto.

² Emomiyo ok wabi luor, kata bed ni piny okethore kendo gode mukore e chuny nam,

³ Kata obedoni pige manie nam wuo kendo golo buoyo kata obedo ni gode yiengni kendo dhwolore. Sela

⁴ Nitie aora moro ma pige kelo mor e dala Nyasaye, e dala maler kama Nyasaye Man Malo Moloyo odakie.

⁵ Nyasaye odak e iye omiyo ok obi podho; Nyasaye biro konye ka piny oyawore.

⁶ Ogendini nigi chandruok, kendo pinjeruodhi podho; otingʼo dwonde mi piny leny nono.

⁷ Jehova Nyasaye Maratego ni kodwa; Nyasach Jakobo e ohingawa. Sela

⁸ Biuru uneye tije Jehova Nyasaye, bi uneye kethruok mosekelo e piny.

⁹ Omiyo lwenje rumo e tungʼ piny koni gi koni; oturo atungʼ kendo ochodo tongʼ matindo tindo, bende owangʼo kuodi gi mach.

¹⁰ “Bed mos, kendo ngʼe ni an Nyasaye; ogendini biro miya duongʼ; piny duto biro miya duongʼ.”

¹¹ Jehova Nyasaye Maratego ni kodwa; Nyasach Jakobo e ohingawa. Sela