Zaburi 30 - Motingʼo Loko Manyien

Zaburi 30

Zaburi. Wer mar gwedho hekalu. Zaburi mar Daudi.

¹ Abiro tingʼi malo, yaye Jehova Nyasaye, nikech ne igola e bur matut, kendo ne ok iyiene wasika mondo obed mamor kuoma.

² Yaye Jehova Nyasaye Nyasacha, ne aluongi mondo ikonya kendo ne ichanga.

³ Yaye Jehova Nyasaye, ne igola oko e liel, ne iresa kane oyudo aridora piny e bur matut mar joma otho.

⁴ Werneuru Jehova Nyasaye, un joge maler; pakuru nyinge maler.

⁵ Nikech mirimbe bedo mana kuom kinde matin kende, to ngʼwonone osiko nyaka chiengʼ; ywak nyalo bedo gotieno to mor biro mana gokinyi.

⁶ Kane aparo ni adhi maber, ne awacho niya, “Onge gima biro bwoga.”

⁷ Yaye Jehova Nyasaye, kane itimona ngʼwono, ne imiyo achungʼ motegno kaka got; to kane ipando wangʼi, to piny nochama.

⁸ In ema ne aluongi, yaye Jehova Nyasaye; Ruoth Nyasaye ema ne aywakne mondo okecha.

⁹ “Ere ohala ma thona biro kelo, ere gima dhina e liel biro konyigo? Buru bende nyalo paki adier? Bende dohul adierani kasetho?

¹⁰ Winja, yaye Jehova Nyasaye, kendo kecha; yaye Jehova Nyasaye bed konyruok mara.”

¹¹ Ne iloko ywakna modoko miel; ne igolo lawa mar kuyo mi irwakona law mor,

¹² mondo chunya owerni kendo kik olingʼ. Yaye Jehova Nyasaye Nyasacha, abiro goyoni erokamano nyaka chiengʼ.