Zaburi 16 - Motingʼo Loko Manyien

Zaburi 16

Miktam mar Daudi.

¹ Rita maber, yaye Nyasaye nikech in e kar pondona.

² Ne awacho ne Jehova Nyasaye niya, “In e Ruodha; onge gima ber machielo ma an-go makmana in.”

³ To jomaler manie piny, to gin kaka joma nigi duongʼ ma ahero gi chunya duto.

⁴ Joma lawo nyiseche mamoko kuyo margi biro medore. Misengini magi mag remo ok abi olo oko kendo kata nying-gi ok abi hulo gi dhoga.

⁵ Jehova Nyasaye, isemiya pok makora kod okombena; iserita maber gi giga duto.

⁶ Kiepena duto ochopo kuonde mabeyo; adier, girkeni maga duto moro wangʼ adier.

⁷ Abiro pako Jehova Nyasaye mangʼadona rieko; kata gotieno chunya puonja.

⁸ Asiko aketo Jehova Nyasaye e nyima ndalo duto. Nikech ka entie e lweta korachwich, to onge gima nyalo yienga.

⁹ Emomiyo chunya mor kendo lewa yot; ringra bende biro yweyo gi kwe,

¹⁰ nikech ok inijwangʼa ei liel, to bende ok niyie Ngʼati Maler tow.

¹¹ Isenyisa yor ngima; inipongʼa gi mor mogundho ka an e nyimi, kendo gi mor mosiko e badi korachwich.